29 декабралда республикаялъул нухмалъулесул ишал тIуралев Сергей Меликовас тасдикъ гьабуна цIияб хIукумат.
ХIукуматалъул нухмалъулесул тIоцересел заместителаллъун тIамуна Нюсрет ГIумаровги Батир Эмеевги.
Нюсрет ГIумаров хIалтIулев вукIана республикаялъул нухмалъулесул ва хIукуматалъул администрациялда.
Батир Эмеев — республикаялъул промышленносталъул министрасул ишал тIуралевлъун.
Анатолий Карибовги, Владимир Лемешкоги, ГIабдулмуслим ГIабдулмуслимовги, Муслим Телякавовги, Рамазан Жафаровги рукIарабго хъулухъалда — хIукуматалъул нухмалъулесул заместителаллъун тана.
Ракьулгун ва малмулкалъул гьоркьорлъабазул рахъалъ министрлъун тIамуна Заур Эминов.
ТIабигIиял сурсатазул ва экологиялъул рахъалъ министрасул хъулухъалде тIамуна РахIман ХIамидов.
ГIорхъолъа рорчIарал ахIвал- хIалазул, тIабигIиял балагьазул ва гражданияб оборонаялъул министрлъун тана, цевеккунги гьелъул вукIарав нухмалъулев Нариман ГъазимухIамадов. Гьединго республикаялъул гIолилазул министрлъун тасдикъ гьавуна Камил СагIидовги.
Дармилгун промышленносталъул министрлъун тIамуна Низами Халидов. Экономикаялъулгун бакIалъулаб цебетIеялъул министрлъун — Руслан ГIалиев.
Росдал магIишаталъулгун нигIматазул министрлъун тIамуна чанго соналъ цевеги гьелъул нухмалъулевлъун вукIарав Батал Баталов.
ЖКХялъулгун энергетикаялъул министрлъун вачIана Манвел Мажонц.
Информатизациялъул, бухьеналъул ва массовиял коммуникациязул министерство кIийиде бикьана. Гьелъул гьабуна Печаталъулгун информациялъул министерство ва нухмалъулевлъун тIамуна, чанго соналъ цевеги гьебго хъулухъалда вукIарав ГIумаргIусман ХIажиев. Массовиял коммуникациязул бакIалда гIуцIараб, Цифровоялъулаб министерствоялъул нухмалъулевлъун тIамуна, гъоркьго вукIарав министр Сергей Снегирев.
Гьединго жидерго хъулухъал цIунана бакIал раялъул министр Малик Баглиевасги, Культураялъул министерствоялъул нухмалъулей Зарема Бутаевалъги, транспорталъулгун нухазул магIишаталъул министр Ширухан ХIажимурадовасги, миллияб политикаялъул ва диниял ишазул рахъалъ министр Энрик Муслимовасги, лъай кьеялъул министр Уммупазил ГIумаровалъги, туризмалъул ва халкъияб махщелчилъиялъул рахъалъ министр Расул Ибрагьимовасги.
Гъоркьго букIараб хъулухъалда тана финансазул министр Юнус СагIадуевги, спорталъулгун физкультураялъул министр МухIамад МухIамадовги, жидерго хъулухъ цIунана захIматалъулгун социалияб цебетIеялъул министрлъун йикIарай Изумруд Мугутдиновалъги ва юстициялъул министр КазимухIамад Сефиркъурбановасги.
Республикаялъул бетIерасул ва хIукуматалъул администрациялъул нухмалъулесул тIоцевесев заместительлъун тIамуна Мурад Казиев. Гьединго республикаялъул хIукуматалъул капиталиял бакIал раялъулаб управлениялъул нухмалъулевлъун тIамуна МухIамад ГIазизов.
Экономикаялъулгун бакIалъулаб цебетIеялъул министрлъун вукIарав ХIажи Султановасеги цIияб хъулухъ кьуна. Новолак районалъул халкъ цIияб бакIалде гочинабиялъул ва ГIавухъ район цIигьабун гIуцIиялъул суалазул рахъалъ, республикаялъул хIукуматалда рагьараб управлениялъул нухмалъулевлъун тIамуна гьев.
Культураялъул нахърателал цIунулеб ДРялъул агентствоялъул нухмалъулевлъун тIамуна МахIач Мусаев. Республикаялъул ГIелмияб централъул археологиялъулгун тарихалъул ва этнографиялъул институталъул нухмалъулевлъун вукIана гьев гьанжелъизегIан.
Жанир чIолел рукъзабазул рахъалъ Пачалихъалъулаб инспекциялъул нухмалъулевлъун тIамуна Сергей Касьянов.
Республикаялъул ветеринарияб комитеталъул нухмалъулевлъун тIамуна МухIамад Шапиев, пачалихъияб къайицIа босиялъул рахъалъ комитеталъул нухмалъулевлъун — Жафар ХIажибеков.
Рохьил магIишаталъул рахъалъ комитеталъул нухмалъулевлъун тIамуна Вагьаб ГIабдулхIамидов, тарифазул рахъалъ республикаялъул хъулухъалъул нухмалъулевлъун тана Камил ГIалигъалбацIов, Россиялъул президентасда цеве нилъер республикаялъул кидагосев вакиллъун тIамуна Жамаладин ХIасанов.
Финансазда хадуб хал кколеб ДРялъул пачалихъалъулаб хъулухъалъул нухмалъулевлъун тасдикъ гьавуна МахIач Ибрагьимов. Гьеб ккола цебе Финансазул министерствоялъул къайимлъиялда гъоркьги букIун, гьанже гьелдаса батIа тIезабун гIуцIараб цIияб хъулухъ.
