ГIияхъабазе-субсидия

 

   Гьал къоязда сапаралъ Москваялда вугев республикаялъул росдал магIишаталъул министр БатIал БатIалов дандчIвана РФялъул росдал магIишаталъул министрасул тIоцевесев заместитель Жамбулат Хатуовгун ва гьебго министерствоялъул боцIухъанлъиялъул ва тайпадулаб гIи гIезабиялъул рахъалъ Департаменталъул нухмалъулев Дмитрий Бутусовгун.

  Нилъер республикаялда гIи-боцIухъанлъи цебетIеялъул хIакъалъулъ бицана гьез.

   Улкаялда гIиял гьан хIадур гьабиялъул ва гIи-цIцIани цIикIкIинариялъул рахъалъ цебесеб кьерда бугин Дагъистан, гьединлъидал гьелда тIад чIарал чагIазе гIарцудалъун кумек гьабизе бокьун бугин абуна РФялъул росдал магIишаталъул хIакимзабаз.

    Мисалалъе, гIиял гьанал цо кило бича-хисизелъун хIалтIизабураб гIарцул хIисабги гьабун, Дагъистаналъе (субсидиял гIадин) 210 миллион гъурущ биччазе ракIалда буго Москваялда.

  Гьеб бутIаялда жаниб пачалихъалъ гьанжелъагIан гьабулеб букIараб кумекалъул цо хинлъиго чIван гьечIоан республикаялъул гIияхъабазда.

   Гьелъие гIиллабиги гIемер ругин абуна Москваялда букIараб данделъиялда БатIал БатIаловас. ГIиял гьан хIадур гьабизе лъикIаб къуваталъул цехал рагIуларо респу­бликаялда, гьеб цо. КIиабизе боса­ни, захIмат буго ахираб заманал­ да гIиял гьанал багьа цIикIкIунеб букIиналъги. ГьабсагIат цо кило 400 гъурщиде буго базаралда. Гьелъги квал-квал кколеб буго субсидиялъе биччараб гIарац жиндир хIажатаб нухда хIалтIизабизе.

   ДРялъул росдал магIишаталъул министрас абуна гьеб субсидиялъул гIарац гIи-боцIухъанлъиялъул цогидал бутIабаздеги щвезе хIажат бугилан. Мисалалъе, республикаялъул чIахIиял шагьаразда аскIор рахьдал фермаби рагьани, кIудияб мунпагIат букIинаанин. Школа­зе, ясли-ахазе сахаб, татуяб, эко­логиялъул рахъалъ бацIцIадаб нигIматги щвелаанин лъималазе.   

    БатIал БатIаловас бицунелъухъ мухIкангоги гIенеккун, жидехъа бажарараб кумек гьабизе рагIи кьуна РФялъул Росдал магIишаталъул министерствоялъул вакилзабаз.

Ашахан ЮСУПОВ