БахIарчиясул хIурматалда

Арзулумил дарсал

Гуни росдал школалда тIоритIана районалъул

Гуниялдаса Россиялъул БахIарчи, полковник Арзулум Илясов кидаго вукIана гIолилазе мисаллъун. Гьесул гIумру букIана Дагъистаналда терроризмалде ва экстремизмалде данде гьабулеб къеркьеялда ва республикаялда гIадлу-низам цIуниялда щулаго бухьараб. Гьесул бетIерлъиялда Дагъистаналъул СОБРалъ гIахьаллъи гьабуна Северияб Кавказалда ккарал гIемерал тунка-гIусиязулъ. ГIолеб гIелалъе Арзулум цIакъ вокьулаан ва гьесде божилъиги гьабулаан. Районалъул гIолилазул ахIиялда рекъон, Арзулум вихьизавун вукIана жиндир заманалда Дагъистаналъул Халкъияб Собраниялде депутатлъиялде кандидатлъунги.
25 февралалда, гьев цIалараб Казбек районалъул Гуни росдал школалда тIоритIана районалъул школазда гьоркьоб рагъулалгун спортивиял къецазул турнир. Гьеб къоялъ росулъе рачIун рукIана СОБРалъул хIалтIухъабиги. Гьез жидерго вукIарав командир ва рагъулав гьалмагъ Арзулумие росдал школалда бараб памятникалда аскIоб автоматазул кьвагьиялдалъун хIурмат гьабуна.
СОБРалъул отделениялъул нухмалъулев, подполковник ХIасан ШагIбановас абуна Арзулум жидее гьабулеб ишалъулъ кидаго гвангъараб мисаллъун вукIанилан. Данделъиялда цIалдохъабаз цIалана А. Илясовасде гьарурал кучIдулги.
Гьединго турниказда гьунарал рихьизаруна Воркауталъул (къватIазда гьарулел, чорхол сахлъи цIуниялъул тадбирал) Дагъистаналда бугеб гIуцIиялъул президент СагIид Моллаевасул нухмалъиялда гъоркь бугеб М.А.D. командаялъул гIахьалчагIазги. Балагьаразе гьезул церерахъиназ кIудияб асарги гьабуна.
Къецазда тIоцебесеб бакI ккуна Гертма росдал, кIиабилеб — Гуниязул ва лъабабилеб — Буртунай школазул командабаз. Ункъабилеб бакIалъе мустахIикълъана Инчха росдал школалъул цIалдохъаби.
ВатIан цIунулезул къоялда хурхун щибаб соналъ тIобитIулеб гьеб тадбиралда кIалъазе рахъараз бицана гIолеб гIелалъе гьединаб тарбия кьей хасго гьаб заманалда цIакъго хIажат бугилан. Арзулум жакъаги гьезие гIицIго мисал гуревги, гIолилазе дарслъунги кколилан абулеб букIана гIахьалчагIаз.
Гьел къецал гIуцIиялъе хIаракатчилъи бихьизабуна росдал администрациялъ ва Дагъистаналъул ЦIех-рехалъул комитеталда хIалтIулев юстициялъул подполковник, БахIарчиясул вас Элдар Илясовас, школалъул военрук М. Мажидовас.
Гьединго дандчIваялда гIахьал­лъи гьабуна Дагъистаналъул ХIин­къигьечIолъиялъул советалъул сек­ре­тарь ГI. ГIабдулмуслимовас, Да­гъис­таналъул Журналистазул союзалъу­л председатель ГI. Камаловас, Дагъистаналъул Харабазул советалъул член, полковник А. МагьдихIажиевас, Россиялъул мустахIикъав художник, Арзулумие бараб памятникалъул автор ГI. МухIамадовас ва цогидазги.
Нижер мухбир