12 апрелалда ДРялъул хIукуматалъул минаялъуб тIобитIараб данделъиялда бицунеб букIана республикаялъул школазда лъимал лъабго ригьалда цIалулеб къагIида лъугIизабизе ккеялъул хIакъалъулъ. Гьединал школал цIакъго гIемер ругин бицана данделъиялда ДРялъул премьер ГIабдулмуслим ГIабдулмуслимовас.
2024 соналде 20 цIияб школа базе буго республикаялда: МахIачхъалаялда — 10, Хасавюрт районалда — лъабго, Каспийскиялда — кIиго. Гьединго цо-цо школа базе буго Лаваша, Догъузпара, Ахти, Табасаран районаздаги Хасавюрт шагьаралдаги.
— Ленинкент, ЦIияб Хушет ва Семендер гIадал поселоказда цIакъго гIемерлъун руго лъимал. Щиб рес батунги гьел бакIаздаги разе ккола цIиял школал, — ин абуна ГI. ГIабдулмуслимовас ва гьеб суал гIумруялде бахъинабизе т1адкъана вице-премьер Муслим Телякавовасда.
Мисалалъе, Ахти районалда лъимал лъабго ригьалда цIалиялъул суал исана сентябралде тIубанго лъугIизе бугинги бицана данделъиялда. Луткун абураб росулъ 2017 соналъго базе байбихьун букIана школа. Исана 1 сентябралде гьеб бан лъуг1изе ккола.
