6 апрелалда Москваялда Россиялъул президент Владимир Путингун дандчIвана ДРялъул нухмалъулев Сергей Меликов.
Гьезул хабар ккана гьабсагIаталда республикаялда бугеб жамгIиябгун экономикияб ахIвал-хIалалда тIасан.
Мисалалъе, бицана коронавирусалда сверухъ регионалда бугеб ахIвал-хIалалъул, росдал магIишаталъул, ЧIикIаб хIоринисан МахIачхъалаялдегун Каспийскиялде гьекъолеб лъим бачиналъул, цIолбохъанлъиялъул, гьединго хIалтIи гьечIого хутIарал гIадамазе гьабулеб бугеб кумекалъул ва гьеб гуреб цогидалъулги х1акъалъулъ.
Сергей Меликовас улкаялъул бетIерасда бицана пандемиялда сверухъ ахIвал-хIал гьабсагIат парахатаб бугин, гьеб унтуда данде вакцина гьабиялъул ишги цIакъ цебетIунин республикаялда. Мисалалъе, 90 процент вакцина гьабурал районалги ругин баян кьуна республикаялъул бетIерас.
С. Меликовас президентасда абуна, мисалалъе босани, цIолбохъанлъиялъул рахъалъги чIел босанин республикаялъ. Гьесул рагIабазда рекъон, Дагъистаналъул цIибил гьанже баччула Крымалдегун Севастополалдегицин.
Гьеб дандчIваялда Владимир Путиница лъикIаб къимат кьуна олигарх Сулейман Керимовасе, хасго Дербент шагьар цебетIезабиялъе гьес лъолеб бутIаялъе.
А. Юсупов
