Республикаялъул муфтияталъул нухмалъулев МухIамад Майрановас бицана, цереккунисел баяназда рекъон, исана Рамазан моцIалъул тIоцебесеб къо букIине рес бугин 3 апрель. Календаралъухъ балагьун, гьеб букIине кколаан апрелалъул кIиабилеб къо.
— Гьеб жеги мухIканаб баян гуро. ГIагарал къоязда гьеб суал дандбазе нижеца ахIизе буго республикаялъул гIалимзабазул данделъи. Апрелалъул тIоцебесеб къоялъ бакъ тIерхьун хадуса цIияб моцI бихьани, кIалкквезе буго 2 апрелалда. Апрелалъул кIиабилеб къоялъул маркIачIуда моцI бихьани, Рамазан моцIалъул тIоцебесеб къо букIине буго гьатIан къо — 3 апрель, — ин бицана М. Майрановас.
«ХIакъикъат» газеталъул коллективалъ бусурбабазда ракIракIалъ баркула тIаде щолеб баркат гIемераб, лъикIлъаби гьарзаяб Рамазан моцI. Аллагьас нилъее киназего радакь рахъинеги, кIал кквезеги, лъикIал, кири кIудиял ишал гьаризеги гьеб моцIалъ тавпикъги кIудияб къуватги кьеги. Амин.
