Дагъистаналъул бетIерав казначей — ГIабдулпатахI ГIамирханов

 

 

 

   22 марталда Федералияб Казначействоялъул ДРялда бугеб Управлениялъул (УФК) нухмалъулевлъун тIамуна экс-премьер ГIабдулпатахI ГIамирханов.

Гьеб мурадалда МахIачхъалаялде вачIарав Федералияб Казначействоялъул нухмалъулесул заместитель Эли ГIисаев дандчIвана ДРялъул бетIер Сергей Меликовгун. Гьеб дандчIваялда вукIана хIукуматалъул председатель ГIабдулмуслим ГIабдулмуслимовги.

  Сергей Меликовас Эли ГIисаевасда абуна бицен гьабулеб хъулухъалде ГIабдулпатахI ГIамирханов тIамизе рахъккуралъухъ гьев жанив хIалтIулеб идараялдасаги Россиялъул финансазул министр Антон Силуановасдасаги кIудияб разилъи бугин жиндир.

  ГIабдулпатахI ГIамирханов УФКялъул нухмалъиялда теялдалъун жидееги бигьалъизе бугин республикагун цадахъ рекъон хIалтIизе, гъалатIал ккечIого, кIуди-кIудиял проектал тIуразе бажаризе рес букIинилан ГIисаевасги тIаде жубана.

Гьелдаса хадуб УФКялъул коллективалда ГIабдулпатахI ГIамирханов вихьизавизе гьениве ана хIукуматалъул председателасул заместитель Руслан ГIалиевги.

Цевехун бицен гьабурав Эли ГIисаевасда цадахъго гьеб тадбиралда гIахьаллъана Чачан Республикаялда ва Ингушетиялда УФКязул нухмалъулеллъун ругел ГIабдул МухIамадовги Ильяс Угурчиевги.

 ГIабдулпатахI ГIамирхановасде щвезегIан ДРялда бугеб УФКялъул нухмалъулесул ишал тIуразарулаан гьабсагIаталда гьесул заместительлъун вугев Исрапил ТIинамухIамадовас.

PS. Казначействоялъул контора Россиялда гIуцIун букIана Пётр ТIоцевесесул заманалда, 1710 соналдаго.

Цинги улкаялъул бетIерлъуде батIи-батIиял пачазаби ккедалги советияб заман бачIингунги, гьеб хъулухъалъул хIалтIулъ хиса-басиял лъугьун рукIана. 1991 соналда абуни пачалихъалъул цогояб бюджеталъул бакIалда баккана лъабго батIияб даражаялъул бюджеталъул къагIида.

1992 соналда улкаялъул президентас кьураб буюрухъалда рекъон, Россиялда гIуцIана Федералияб Казначейство.

Дагъистаналда гьеб хIалтIизе лъугьана 1996 соналда.