10 марталда Москваялда, РФялъул хIукуматалъул председателасул заместитель Виктория Абрамченкогун дандчIвана ДРялъул нухмалъулев Сергей Меликов.

    Гьез гьоркьоб лъуна республикаялъул северияб рахъалда ругел ракьал ракъдаллъиялде сверулел рукIиналъулги чанго соналъ бацIцIад гьабичIого тараб Терек гIурул тIину хIабтIил цIеялъулги суал. Гьелда бан Сергей Меликовас рахIатхвей загьир гьабуна их щведал гIорги къватIибе кIанцIун, сверухъ гIумру гьабулел гIадамазе зарал ккезе рес бугилан.

   ГIор бацIцIад гьабиялда хурхараб буго Аграханалъул залив, гьединго ччугIбуз тIинчI биччалел Аракумалъул, Гъоркьияб Терекалъул хIорал цIунизе бажари. ГIураб къадаралда гьениб лъим бугони, лъикI букIуна сверухъ ругел ччугIа гIезабулел магIишатазеги жибго экологиялъеги.

   Гьединго Сергей Меликов дандчIвана улкаялъул хIукуматалъул вице-премьер Александр Новакгунги.

    Гьез дандрана республикаялде инвестициял рачIинариялда, ТЭКалъулгун ЖКХялъул система рукIалиде ккезабиялда, газ бачиналда, дагъистаниязе хIалтIизе бакIал чIезариялда хурхарал суалал.

    Масала, газификациялъул программаялда бихьизабухъе, 2025 соналде нилъер гьаниб газ бачиналъул иш 79 проценталъ тIубазабун лъугIизе ккола.