«Дун хекко тIагIине вачIарав гьечIо»

 

   Анлъабилеб сентябралдаса байбихьун республикаялда унел руго «ХъахIал къункърабазул къоял» абураб Р. ХIамзатовасул цIаралда халкъазда гьоркьосеб литературияб фестиваль.

    Исана гьеб тадбир тIобитIулеб буго 35-абилеб нухалъ. КIудияв шагIир гьавуралдаса исана тIубала 98 сон. Фестивалалъул тIоцебесеб къоялъ гьалбал щвана ДРялъул Хъвадарухъабазул союзалде, 51 соналъ Расулица нуцIа рагьараб ва къараб, гьесул кабинеталъуб бугеб музеялде.

   Нахъисеб къоялъ, 7 сентябралда, «Дагъистан» РГВК каналалда тIобитIараб «гургинаб столалдаги» гIахьаллъана гьалбал.

   Щвана гьел «Россия — дир тарих» музеялде, дандчIвана ДГУялъул студенталгун ва мугIалимзабигун.

   ШагIир гьавураб къоялъ, 8 сентябралда, киналго рахана Таргъу магIарда бугеб Расулил хабаде, сагIат ичIгоялда ГIурус театралда цебе бугеб гьесул памятникалда цере тIугьдулги лъун, киналго къокъана Ленинил комсомолалъул цIаралда бугеб ахикье.

     Республикаялъул хIукуматалъул рахъалдасан кIалъай гьабуна вицепремьер Муслим Телякавовас. 2023 соналда Расул ХIамзатов гьавуралдаса 100 сон тIубай кIодо гьабизе буго тIубараб улкаялдаго. Гьелъул хIакъалъулъ бицана Муслим Телякавовас дагьаб гIатIидго. Президент Владимир Путиница хас гьабун гьелда хурхун бахъараб указалда гъоркь гъулги басун буго. Гьеб указалда рекъон, 2023 сон лъазабун буго ХIамзатовасул лъагIеллъун. Улкаялъул киналго регионазда тIоритIизе руго Расулил хIурматалда дандеруссинал. Ниж тIадчIун хIадурлъулел ругин гьеб тадбиралдеян бицана М. Телякавовас.

   Хадув кIалъазе вахъана Россиялъул Хъвадарухъабазул союзалъул нухмалъулев Николай Иванов. Нилъер республикаялъул Хъвадарухъабазул союзалъул правлениялъул нухмалъулев МухIамад АхIмадовасулги букIана лъикIаб кIалъай. ХъахIал къункърабазул сипат цебе чIезабулеб ретIа-къайгун школлъималаз бихьизабуна берцинаб кьурди.

   Расулил къоялде МахIачхъалаялде рачIун рукIана Башкириялдаса, Сириялдаса, СагIудиязул ГIарабиялдаса гьалбал. Данделъи биххун хадуб «литературияб МахIачхъалаялда» свери бахъизеги ана гьел киналго.

    Гьединго микьабилеб сентябралда Россиялъул Хъвадарухъабазул союзалъул нухмалъулев Николай Ивановгун дандчIвана республикаялъул бетIер Сергей Меликовги.

  ДандчIваялда гIахьаллъи гьабуна МухIамад АхIмадовасги, ДРялъул культураялъул министр Зарема Бутаевалъги.

   Расул ХIамзатовасул гьунаралъул тIадегIанлъиялъеги, мегIергIан борхатаб гьесул поэзиялъеги кIудияб къиматги кьун, Сергей Меликовасги бицана 2023 соналда кIодо гьабизе бугин шагIирас 100 сон баялъул юбилей.

   Гьес абуна хIисабалде росичIого тарал цо-цо жалги хутIун ругин гьеб тадбиралда хурхун ва гьездеги кIвар кьезе бугин. Мисалалъе, Москваялда Расул ХIамзатовасул юбилеялъул хIурматалда «Дагъистаналъул анкь» абураб тадбир тIобитIани лъикIаб букIинаанин. Гьединго кIудияв шагIирасул юбилеялда хурхун тадбирал гьаризе бегьулин къватIисел пачалихъаздаги.

  ГIурус театралда, Расулил памятникалда цебе лъай-хъвай ккана дир Калугаялдаса гIолохъанай шагIир Фериде Ибрагьимовалъулгун. Гьелъул умумул ккола Сулейман-СтIал районалдаса. 40 соналъ цере гочун руго гьел гIурус ракьалде. Фериде гьаюна ва гIуна Калуга шагьаралда. Анлъго сон баралдаса нахъе хъвалел руго гьелъ кучIдул. ЦIакъ бокьулеб буго гьелъие поэзияги Расул ХIамзатовасул творчествоги. КIудияв шагIирасул хIурматалда тIобитIулеб тадбиралде щвезелъун ячIанин жий ватIаналдеян бицана Феридеца.

    Калугаялда гьелъ гIуцIун буго литература бокьулел гIолилазул къокъа. Гьединго интернеталда «Ютуб-каналалдаги» рагьун буго гьединабго канал. Расулил кучIдул жинца гьенисан цIалулин абуна гьелъ.

   Гьей ккола Москва шагьаралъул Хъвадарухъаби-таржамачагIазул союзалъулги, Профессионалиял литераторазул союзалъулги вакил. Миллияб ретIелги ретIун ячIун йикIана гьей Расулил памятникалда цере тIугьдул лъезе.

    КIудияв шагIирасул хIурматалда тIоритIулел тадбирал халат рахъине руго 10 сентябралде щвезегIан. Хъвадарухъабазул кIудияб къокъа щвезе буго Дербенталде, Гъунибе ва гьединго шагIирасул ватIан Хунзахъегун ЦIада росулъе.

   Гьелъул хIакъалъулъ нижеца гIатIидго хъвазе буго газеталъул хадусеб номералда.

Ашахан ЮСУПОВ