Гьал къоязда Гъизилюрталда ДРялъул бетIер Сергей Меликовас хал гьабуна 2008 соналдаса нахъе балеб бугеб шагьаралъул больницаялъул, стадионалъул ва кьодул, гьединго щвана цо предприятиялде ва гара-чIвари гьабуна гIадатиял гIадамазулгун.

     13 соналъ балеб бугеб больница лъугIизегIан шагьаралдасаги сверухъ ругел хъутабаздасаги унтарал сах гьарула некIого жагъаллъараб, басрияб больницаялда.

    Меликовасда бихьана 1987 соналда бараб шагьаралъул кьоги къачIазе кколеб хIалалда букIин. Больницаго гIадин, бан лъугIулеб гьечIо Гъизилюрталда стадионги. Документация рукIалиде ккезабун гьечIолъиялъ 2010 соналда чIезабун буго гьенибе биччалеб гIарац.

    Меликов щвана «Юг-Спецгидроэнергомонтаж» абулеб предприятиялдеги. Гьелъ къватIибе биччалеб буго ГЭСазе, насосазул станциязе, кьоязе хIажатаб къайи.

   Хадув гьев гIенеккана гIолохъанал хъизаназухъ. Гьел рази гьечIоан жидее балеб бугеб гIемертIалаяб мина рагIалде бахъунгутIиялдаса. Сергей Меликовас рагIи кьуна гьелъиеги церехун рехсарал объектазеги республикаялъул бюджеталдаса гIарац балагьизе.