ЧIел босана ункъо дагъистанияс

   РФялъул ГIелмуялъул ва тIадегIанаб лъай кьеялъул министерствоялъул гIахьаллъигун улкаялъул  студентазда гьоркьор тIоритIулел къецазда гьоркьоб бищунго къадруяблъун рикIкIуна «Я – профессионал» абураб ТIолгороссиялъул олимпиада. Исана гьеб тIобитIана ункъабилеб нухалда ва гьелъул букIана 72 батIияб рахъ – филологиялдаса робототехникаялде гIунтIун.
   2020-2021 цIалул соналда рехсараб олимпиадаялда гIахьаллъана Дагъистаналдаса 11393 студент.
   РикIкIадасан гIуцIараб туралъул  хIасилалда гьезда гьоркьоса тIаса вищана 1393 чи. Финалалда гIахьаллъана 55 студент.
   Гьезда гьоркьосаги ункъояв  мустахIикълъана олимпиадаялъул дипломазе: Камил Ниналалов (ДГУ), ХIасан Гучучалиев(ДГУНХ), Айна Мурадова (ДГПУ) ва Фатима Сайпудинова (ДГПУ).
   Гьел студентазе бигьалъи гьабизе буго церетIурал Россиялъул вузазул магистратураялде, аспирантураялде ва ординатураялде цIализе лъугьунаго. Гьединго гьезие рес кьола профилияб компаниялда стажировка гьабизе. Олимпиадаялда медаль щварал гIолилазе кьезе буго гIарцул премияги – 100-300 азарго гъурущ.