РФялъул мелиоративияб комплекс цебетIезабиялъул ва росдал магIишаталъе хIажатал ракьал хIалтIизариялъе пайдаял къагIидаби ратиялъул мурадалда къабул гьабураб пачалихъияб программаялда гIахьаллъулеб буго Дагъистанги. Гьелда бан гьаризе тIадал тадбиразул хIакъалъулъ бицана ДРялъул премьер-министр ГIабдулпатахI ГIамирхановас тIобитIараб данделъиялда.
Дагъистаналъе кIудияб кIвар бугеб проект букIиналъулги бицун, ГIабдулпатахI ГIамирхановас муниципалитетазул бутIрузда тIадкъана гьелда гIахьаллъизе жигаралда документал хIадуреян абун. Гьесул пикруялда рекъон, проекталъ рес кьела росдал магIишаталъул нигIматал гIезариялъе бюджеталъул кумек щвеялъе. «Соналдаса соналде камуларо лъедалъун хьезариялъул рахъалъ захIмалъаби. Хасго цIикIкIуна гьел рекьарулеб яги бачIин бакIарулеб заманалда. Гьебмехалда гIадамазул рукъзабахъе бачараб лъел цIикIкIарасеб бутIа уна хурзал лъалъазе. Гьелъги нугIлъи гьабула мелиорациялда масъалаби рукIиналъе. Гьединлъидал, хIажат буго цIияб пачалихъияб программаялдаса пайдаги босун, росдал магIишаталъе хIажатал ракьал цIикIкIун хIалтIизаризе, гьелъул кьучIалда АПК цебетIезабизе ва мелиоративияб комплекс цIи гьабизе», — ян бицана премьер-министрас.
Россиялда пачалихъияб программа гIумруялде бахъинабулаго, ракIалда буго 10 соналда жаниб росдал магIишаталъул ракьул 13 млн гектар хIалтIизабизе. ДРялъул хIукуматалъул вице-премьер ГIабдулмуслим ГIабдулмуслимовас бицанихъе, ракIалда буго рехун тарал рекьизе пайдаял ва гьарзаяб бачIин кьеялъе квербакъулел республикаялъул ракьалги хIалтIизаризе. «Гьеб- го заманалда хутIулел руго жеги хIалтIизабичIеб ракьул 65 азаргоялдаса цIикIкIун гектар, гьезда гьоркьоб 38500 гектар – бищунго къиматаб ракьул. Ракьул бетIергьабазухъа гьеб хIалтIизабизе бажарулеб гьечIони яги бокьун батичIони, хIажат буго гьелде рекъон кколел хIукмаби гьаризе. Бе- гьизего нилъер беэнал ракьазда минаби разе яги рощнол гохIал эхетизе», — ян абуна ГI. ГIабдулмуслимовас.
Пачалихъияб программа гIумруялде бахъинабулаго, Дагъистаналъул рекьулел ракьазул 10 азаргоялдаса цIикIкIун гектар хIалтIизабизе буго лъабго соналда жаниб (2022- 2024 с.с.) ва жеги 7600 гектар – 2025- 2026 соназда. Гьелъул мурадалда къваригIун буго муниципалиял гIуцIабазул жигараб гIахьаллъи.
ДРялъул бетIерасулги хIукуматалъулги администрациялъул пресс-хъулухъ
