14 апрелалда Дагъистаналде вачIана РФялъул хIукуматалъул нухмалъулев Михаил Мишустин.
МахIачхъалаялъул аэропорталда гьесда дандчIвай гьабуна президентасул Северияб Кавказалъул федералияб округалда вугев вакил Юрий Чайкацаги, республикаялъул нухмалъулесул ишал тIуралев Сергей Меликовасги, РФялъул Оборонаялъул министрасул замести- тель Тимур Ивановасги ва цогидазги.
М. Мишустинида цадахъ рачIана РФялъул сахлъи цIуниялъул министр Михаил Мурашкоги, Ростуризмалъул нухмалъулей Зарина Догузоваги, тIабигIиял сурсатазул ва экологиялъул министр Александр Козловги, ралел бакIазул ва ЖКХялъул нухмалъулев Ирек Файзулинги, экономикияб цебетIеялъул министр Максим Решетниковги.
Аэропорталдасанго гьел ана Дербенталде. Оборонаялъул министерствоялъул кумекалдалъун бараб, шагьаралъул больницаялде щвана улкаялъул премьер ва хал гьабуна гьениб бугеб ахIвал-хIалалъухъ.
РФялъул хIукуматалъул нухмалъулев Дагъистаналде вачIиналде цересел къояз, улкаялъул хIукуматалъул министрзабазул чангоялги щун рукIана республикаялде. Гьеб батизе бегьула моцIалъ цебе РФялъул Федерациялъул Советалда «Дагъистаналъул къоял» тIоритIулеб заманалда Сергей Меликовас гьабураб кIалъаялъул хIасилги.
Гьел сапаразул хIасиллъун кканин абизе бегьула Каспийскиялдегун МахIачхъалаялде лъим бачинелъун цIияб лъел мухъ бахъизе хIукму гьабиги.
Дербенталъул «Хехаб кумекалъе» — 16 машина
Дербенталде щварав РФялъул премьер Михаил Мишустинида бихьизабуна машгьураб Нарын-хъала.
Гьенив премьер хIайран гьавуна экскурсия гьабулей гIадан Таиса ГIалибулатовалда тIад ретIун букIараб миллияб ратIлица. Хасго асар гьабуна гьесие риццатал щватабазда гъорлъ, тIад хьиталги гьечIого гьей хьвадулей йихьидал.
Гьел жураб-щватабазе 122 сон бугин бицана ГIалибулатовалъ Мишустиние. Жидер тухумалъул лъабго чIужугIаданалъ ретIанила гьел гьанжелъизегIан.
Гьебго сапаралда хIукуматалъул нухмалъулес тIадкъай кьуна Дербенталъул «Хехаб медицинаялъул кумекалъул» станциялъе 16 цIияб машина босизе гIарац биччазеги.
Ашахан ЮСУПОВ
