29 марталда Египеталъул тахшагьар Къагьиралда рагьана Расул ХIамзатов ракIалде щвезавиялъул хIурматалда гьесие лъураб бюст. ЦIадаса дунялалдаго машгьурав шагIирасул сураталда гьабураб ганчIил си эхетун буго Къагьиралъул «Эль-ХIуррия» ахикь. Гьениб аскIобго буго гьезул операялъул минаги.
Гьелъул автор ккола Египеталдаса скульптор ва художник ГIусама ас- Сеури. Дунялалда гьев лъала искусствоялъул ва гьединго гIелмуялъул тарихалда кIудияб лъалкI тарал машгьурал гIадамазе памятникал хIадурарав чи хIисабалда.
Шагьаралъул администрациялъе сайгъат гьабуна гьес ганчIида бикIараб ХIамзатил Расулил сурат.
ХIурматияб ишалъе кIудияб къимат кьуна Египеталда вугев Россиялъул вакил Георгий Борисенкоцаги. Нижер пачалихъалъул бечедаб тарихги маданиятги Египеталъул халкъалдаги лъазе лъураб галилъун букIине тейин жакъасеб тадбирилан абуна гьес памятник рагьулеб къоялъ.
КIудияв шагIир чанго нухалда щунги вукIана Египеталде. Гьезул хъвадарухъабазда ва искусствоялъул хIаркатчагIазда гъорлъ гIемерал гьудулзабиги рукIана Р. ХIамзатовасул.
Ашахан ЮСУПОВ
