ДАССР гIуцIаралдаса 100 сон тIубаялда хурхун ва ДРялъул бетIерасул ишал тIуралев С. Меликовасул «2021 сон — ДАССРалъ 100 сон тIубаялъул лъагIеллъун лъазабиялъул» хIакъалъулъ указалда рекъон, республикаялда ва гьеб бахун къватIиб гьарулел руго батIи-батIиял тадбирал.
Нижеца цебеккунги хъван букIана РФялъул Федералияб собраниялъул Федерациялъул советалда ва Пачалихъияб Думаялда тIоритIанин ДРялъул къоялилан.
Гьелъул аслияб масъала букIана республикаялъул социалиябгун экономикияб ва культурияб цебетIеялъул бугеб ахIвал-хIал улкаялъул нухмалъулезда бихьизаби ва ругел гIунгутIаби тIагIинариялъе кумек тIалаб гьаби.
Нилъер республикаялъе кIвар цIикIкIараб данделъиялда бугеб ахIвал-хIалалъул бицун кIалъана С. Меликов. Нухмалъулесул хIалтIуе лъикIаб къимат кьуна Федерациялъул советалъул председатель В. Матвиенкоцаги.
Республикаялъул нухмалъулев дандчIвана федералиял министрзабигунги. Хасго пайдаяблъун ккана С. Меликовасул ва ДРялъул хIукуматалъул председателасул заместитель ГI. ГIабдулмуслимовасул Россиялъул росдал магIишаталъул министр Д. Патрушевасулгун букIараб дандчIвай. Гьез бицана республикаялъул агропромышленнияб комплексалъул, мелиорациялъул, цIибил гIезабиялъул, ччугIихъанлъи цебетIезабиялъул хIакъалъулъ.
2020 соналда республикаялъ лъикIал хIасилал рихьизаруна могьолал культурабазул ва гIаммаб тIощалил къадар цIикIкIинабиялда жанибги. Могьолал культурабазул бакIарана 422,4 азарго тонна, пурчIинадул — 111,6 азарго тонна, картошкадул — 357,1 азарго тонна.
Амма республикаялъе зарал гьабулеб буго Дагъистаналъул северияб рахъалда, Нугъаялъул авлахъазда ругел мучIдул салуца рахчизарулел рукIиналъ.
Исана гьеб бутIа цебетIеялъе Россиялъул «АПКялъул культураби экспорталде» абураб программаялдасан биччалеб буго 238,7 млн гъурущ.
Россиялъул федералиял министрзабазулгун гьарурал дандчIваязул хIасилалда къотIи-къай ккана хадурккунги республикаялъул магIишаталъул бутIаби церетIезариялъул рахъалъ чIванкъотIарал тадбирал гьаризе.
Зикрула ИЛЬЯСОВ
