Россиялъул регионазда гьоркьоб бищун учузаб чед батун буго нилъер республикаялда. Гьеб рагIула хIукуматалъ чед бежулел чагIазда кверчIвалеб букIиналъул хIасил. Гьедин бицана ДРялъул росдал магIишаталъул министрасул заместитель Эмин ШайххIасановас.

    Щибаб соналъ нилъер республикаялда бежулеб буго чадил 250 000 тонна. Амма гьелъул гьоркьохъеб багьа 30 гъурщидаса тIаде унеб гьечIин абуна ШайххIасановас. Гьелъие гIиллаги — РФялъул хIукуматалъул рахъалдаса щолел субсидияз квербакъи гьаби.

    Ролъ ххенолел ва чед бежулел идарабазе кумек хIисабалда, 2020 соналъул ахиралда чанго регионалъе улкаялъул хIукуматалъ кьун буго 4, 7 миллиард гъурущ. Нилъер республикаялъе гьеб гIарцуда гьоркьоса щун буго 80 миллион гъурущ. Амма телеграмм-каналазда хъвалеб буго гьеб субсидиялъул гIарац дагьабги цIикIкIун кьезе бегьулаанин нилъер республикаялъе. Щайин абуни, улкаялда гIумру гьабун ругезул гIаммаб къадаралда гьоркьоб, нилъер республикаялъул халкъалъул 2,1 процент буго. Амма тIолабго Россиялъе бикьулеб субсидиялъул гIарцуда гьоркьоб нилъее 1,7 процент гурони кьун гьечIо. Экспертазул пикруялда рекъон, кумекалъулаб гIарцул 0,4 процент тIадеги щвезе тун гьечIо нилъее. Гьелда рекъон, субсидиялъул гIарцул щвезе кколаан 98 миллион гъурущ.

    Чадил багьа нилъер гьаниб бищун гIодобегIанаб букIаниги щибин, ролъул хъапалъул багьа цогидал регионаздаго гIадин бугониян тIаде жубалеб буго социалиял гьиназдасан кIалъалел экспертаз. Гьелъ бихьизабулеб бугин, респу- бликаялда чед бежулел бакIазда хIалтIулел гIадамазул мухь, цогидал регионазде дандеккун, дагьаб бугеблъиян рикIкIунеб буго гьез. Гьединлъидал субсидиялъул щибаб кепкил гьел киназего кIудияб мунпагIатги букIинаанин.

Ашахан ЮСУПОВ