РФялъул президент Владимир Путинил Указалда рекъон, Гьудуллъиялъул орден кьуна ДРялъул муфти, шайих АхIмад-хIажи-афандие.

Дагъистаналъул гIалимзабазул Советалъул председатель гьеб шапакъаталъе мустахIикълъана рухIиялгун культуриял гIадатал цIунаралъухъ ва церетIезаруралъухъ, гьединго халкъазда гьоркьоб гьудуллъи-вацлъи щула гьабиялъул мурадалда гьабулеб бугеб хIалтIухъ.
Гьал къоязда Дагъистаналъул бетIер Владимир Васильевас тIобитIараб данделъиялда, муфтиясул каранда гьеб орденги бан, регионалъул нухмалъулес абуна:
«Нилъер республикаялда гIумру гьабулеб буго батIи-батIиял миллатазул ва батIи-батIиял диназул вакилзабаз. Гьезда гьоркьоб унго-унгояб гьудуллъи букIинабиялъеги гьеб цIуниялъеги гIемераб хIалтIи гьабулеб буго диниял идарабазги гьезул церехъабазги. Гьеб гьедин букIин нилъеда бихьана Дагъистаналъе ва гIаммаб къагIидаялъ Россиялъего рукIарал захIматал соназда. 20 соналъ цебе республикаялде рачIун рукIарал «ахIичIел гьалбадерие» мустахIикъаб къимат кьуна дагъистанияз. Гьелъул хIакъалъулъ Дагъистаналде вачIиндалги бицана улкаялъул президент Влaдимир Путиница ва республикаялъул муфти АхIмад-афандиеги ягьудиязул общинаялъул советалъул председатель Валерий Дибияевасеги Гьудуллъиялъул орден кьеялъул указалдаги гъоркь гъулбасана», — ян.
«ХIакъикъат» газеталъул коллективалъ ракI-ракIалъ баркула ДРялъул муфти, шайих АхIмад-хIажи-афандиясда гьеб тIадегIанаб шапакъат, гьарула сахлъи ва хIалтIулъ бергьенлъаби.