Щай МахIачхъалаялда законал хIалтIуларел?

СТС («Современные транспортные системы»)

компаниялъе моцIалъ щивав водителас кьезе
кколеб буго 10150 гъуруш

МахIачхъалаялда №2 маршруталъул водительзабаз ахIи бахъинабулеб буго жидехъа налогал кколелдаса цIикIкIун ракIарулел ругин. Гьезул рагIабазда рекъон, «Современные транспортные системы» (СТС) компаниялъе моцIалъ щивав водителас кьезе кколеб буго 10150 гъуруш. 2016 соналдагицин 3500 гъуруш кьолеб букIун буго. Ноябрь моцIалъ водителаз, рехсараб компаниялъул мугьру тIад кьабураб кагъат босун букIун буго, амма декабралда, хираго чIолеб букIиналда бан, гьелдаса инкар гьабун буго. ДПСалъул хIалтIухъабаз байбихьун буго шагьаралда хьвадизе ихтияр кьураб кагъат водителазухъа тIалаб гьабизе. Гьез абулеб буго гьединаб кагъат жидехъе чIобого кьезе кколин, цогидал налогазул суалалги жидецаго роцIинарилин. Амма тахшагьаралъул нухмалъиялъ ва ДПСалъул хIалтIухъабаз водителазда лъазабун буго «СТС» компаниялъ изну кьечIого хьвадизе риччазе гьечIин.
«Шагьаралда хьвадизе ихтияр кьолеб кагъат Россиялъул цогидал шагьаразда щола бигьаго, киналгIаги захIмалъаби дандчIвачIого. Гьебги букIуна Росстаталъ тасдикъ гьабураб. МахIачхъалаялдайин абуни гьеб щвезе хъатцIураб гIарац кьураб гIечIого, хьитал рагьизегIан рекерахъдизеги ккола. Бищунго гIажаибаб жо, щай нилъер гьанир Россиялъул законал хIалтIуларел?» — ан абулеб буго водительзабаз.
Маршрутниказ бицаралда рекъон, «Современные транспортные системы» компаниялъе нухмалъи гьабулеб буго МахIачхъалаялъул администрациялъул промышленносталъул, транспорталъул, бухьеналъул ва нухазул магIишаталъул управлениялъул начальникасул заместитель ХIажимурад МуртазагIалиевас. Живго хIакимасин абуни компаниялъулгун гьоркьоблъи букIин нагIадала кколеб буго. Маршруткабазул водителал щун руго гьесухъеги, амма тахшагьаралда хьвадизе ихтияр кьолеб кагътида сверухъ лъугьун бугеб ахIвал-хIал жинхъаги хисизабун бажаруларин лъазабуна гьес.
МахIачхъалаялда хьвадулел маршрутазе чIезарун руго батIи-батIиял багьаби, ай ункъазарго гъуршидаса байбихьун. Гьезда гьоркьоб бищун хирияб буго №2 маршрут (10150 гъуруш).
Темирхан ХIасанов