FaceBook  in  yt  rss

Рилъа Парижалде къуват борцине

Дунялалъул чемпионат унеб буго Франциялда

 

Гугариялъул лъабго батIияб тай­паялъул рахъалъ дунялалъул чемпионат унеб буго Франциялъул тахшагьар Парижалда. «Классиказда» ва руччабазда гьоркьоб чем­пионат рагIалде бахъана ва рузманкъоялъ рукIине ругел, дагъистаниязе бищунго хирияб, эркенаб гугариялъул рахъалъ къецазул хIакъалъулъ бицине буго газеталъул бачIунеб номералда.
Эркенаб гугариялъул рахъалъин абуни дунялалъул чемпионаталда Россиялъул тIасабищараб командаялъул мухъилъ гIахьаллъизе вуго Дагъистаналдаса ункъо спортсмен - Завур Угуев (57 кг), ХIажимурад Рашидов (61 кг), МухIамадхIабиб КъадимухIамадов (70 кг) ва ГIаб­дурашид Садулаев (97 кг). Гьезда гьоркьов халкъазда гьоркьосел тур­ниразда гIахьаллъун бищунго хIалбихьи щварав спортсмен ккола ГIабдурашид Садулаев.
Рио-де-Жанейроялда рукIарал Олимпиялъул хIаязул чемпион кIиго нухалъ гIахьаллъана дунялалъул чемпионатазда ва кIиябго нухалда бергьенлъигун тIадвуссана. ХIажимурад Рашидовгун Заур Угуев гугарана Европаялъул чемпионатазда ва, тIоцевесев гьелда бергьун ватани, кIиабилев гIарцулав призерлъун вахъана.
25 августалда, ай рузманкъоялъ, къецал рукIине руго 57, 61, 86 ва 125 кг цIайиязда гугарулел спортсменазда гьоркьор. Нахъисеб къоялъ атлетаз къуват борцине буго 65, 70, 74 ва 97 кг цIайиязда.
Гьединго эркенаб гугариялъул рахъалъ дунялалъул чемпионаталде Россиялъул тIасабищараб командаялъул мухъилъ руго: Алан Гагаев (65 кг, Алания), Хетаг Цаболов (74 кг, Алания), Владислав Валиев (86 кг, Алания) ва Анзор Хизриев (125 кг, Санкт-Петербург).
Гьединго Франциялда дунялалъул чемпионат тIобитIарабго эркенаб гугариялъул халкъазда гьоркьосеб федерациялъ тIасабищизе буго рехсараб спорталъул тайпаялъул рахъалъ 2018 соналъ Европаялъул чемпионат тIобитIизе бугеб бакI. Гьеб букIине бегьулел пачалихъазул, республикабазул сияхIалда гъорлъ буго Дагъистанги. Гьеб рахъалъ жиндирго пикру гьадин загьир гьабуна Дагъистаналъул бетIер Рамазан ГIабдулатIиповас.
«ТIоцебесеб иргаялда, дунялалъул чемпионаталда гIахьаллъулел Да­гъистаналъул гугарухъабазе гьа­рула икъбал ва бергьенлъаби. РакI­чIола гьел гьениса чанго медальгун тIадруссине рукIиналда. Дагъистан ккола эркенаб гугариялъул ватIан. Гьанир щибаб соналъ тIоритIула гьеб спортивияб тайпаялъул рахъалъ батIи-батIияб даражаялъул турнирал ва гьенир гIахьаллъизе рачIуна анцI-анцI пачалихъаздаса спортсменал. Нилъер гIадамаз жал къабул гьарулеб куцги, гьаниб букIунеб ахIвал-хIалги цIакъ кутакалда бокьула ва дандеккола гьезие. Тарихалда цогIаги нухалъ букIинчIо тIаса-масагояб турнир ва гьел лъикIаб даражаялда тIобитIиялъул ра­хъалъ цогидазда дандеккун цIи­кIкIараб хIалбихьи буго Дагъиста­налъул. Гьединлъидал, хьул бу­го Парижалдаса лъикIаб хабар бачIи­налде».

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Руководитель-главный редактор:

Камалов Али Ахмедович

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх