Сделать домашней|Добавить в избранное
 
Главная » Общество - ЖамгIият » РакьугIеч - чакрил унтуе дару
на правах рекламы

РакьугIеч - чакрил унтуе дару

  • Версия для печати
Добавил(а): Musa от 29-12-2012, 16:57

Болъихъ районалдаса ИсмагIиловас хъвалеб буго: "10 соналъ хIехьон буго дица чакрил унти, дарабазги кумек гьабулеб гьечIо. Дида рагIана гIурускъвалиялъ (топинамбур) бигьалъи гьабулин. Бокьилаан гьелъул хIакъалъулъ бицани".

 

ГIурускъвали буго тIагIамаб ва пайдаяб нигIмат. Гьелъулъ руго инсанасе хIажалъулел пайдаял гIемерал витаминал.


ГIурускъвали кваназе лъикIаб буго бидул тIадецуй бугезе, хехго жо кIочонезе, ракI унтаразе. Гьалун бахъараб гьелъул гIубалъ (сокалъ) кумек гьабула бидулъ бугеб чакар дагьлъизабизе, хIалакъ гьаризе, щукIдузулъа цIам инабизе. Гьелъ дагь гьабула холестирин.


Буссараб гIурускъвалиялъул гьабураб маска гьурмада бахани, рукIкIалаби иналъе кумек ккола. Гьелъ тIом гIолохъанлъизабула.


Кьибилгун жибго пихъ гуребги, дарудае хIалтIизарула гIурускъвалиялъул тIамхал, хIубал ва тIугьдул. ГIелмиял цIех-рехаз бихьизабулеб буго, гIурускъвали кваналеб бугони, бидулъ бугеб чакаралъул къадар рукIалиде кколеблъи. Кванирукъалда ругъун бугезе лъикIаб буго гIурускъвалиялъул кьалбал.


ЩукIдузулъ цIам бугезе ва радикулиталъ кIвекIулезе мадар гьабула гIурускъвалиялъул тIамхал ва хIубал гъорлъ гьализабураб лъеца. Гьелъул кьибил бичIун ругънада тIад чIвани, лъалаго мадар лъугьуна.


Европаялда гIурускъвали анкьида жаниб 2-3 нухалъ кваназе лъикIаблъун бихьизабун буго. Гьелъ бидулъ бугеб чакаралъул къадар дагь гьаби гуребги, тIуладе хIал ккезеги биччаларо. Амма гьеб гIемер кваназе лъикIаб гьечIо чехь-бакьалда жаниб кидаго гьури-муч букIунев чиясе.


ГIурускъвали тIаса хъалги бахъун гIемераб заманалъ тезе бегьуларо, бецIаб кьер рехулеб букIиналда бан. Гьединлъидал, хехго кваназе ккола. Нахъе цIунизе бокьани, цIамулъелъе базе ккола.


МахIачхъала шагьаралъул сахлъи цIуниялъул управлениялъул штаталда гьечIей бетIерай эндокринолог, анлъабилеб поликлиникаялъул тохтур Л. Ю. Коссаковскаялъ гьадин бицана:


Тохтуралъул баян


- ХIакъикъаталдаги, гIурускъвалиялъ тIадехун рехсараб макъалаялъулъ рехсарал киналго унтаби сах гьариялъе кумек гьабула. ЦIакъго кIудияб пайда букIуна чакрил унтиялъ унтаразе. Ахирал соназда гьарурал гIелмиял цIех-рехаз бихьизабуна гIурускъвали кваналеб бугони, бидулъ бугеб чакрил къадар гIодобе кколеблъи. Гьедин бугониги, чакрил унти бугезе лъикIаб буго тохтурзабаз рихьизарурал дарабигун цадахъ гьеб кваназе.

Россия - 97 бакIалда


2012 соналда Америкаялъул Bloomberg агентствоялъ, ТIолгодунялалъул сахлъи цIуниялъул гIуцIиялъул ва ТIолгодунялалъул банкалъул баяналги кьочIое росун, тIобитIана хасаб цIех-рех. Гьеб тIобитIулаго хIисабалде босулеб букIана инсанасул ригь, 14 сон бачIел лъималазул къадар ва 15-65 соналъул ригьалде ругел хвеялъе аслиял гIиллаби. Гьединго, халгьабуна сахлъиялъе хIинкъи бугел шартIазухъ: хъалиян цIай, гIаракъи гьекъей, гIемерисеб заман гIодор чIун тIобитIи, кьариял гIадамазул процент, бидул тIадецуялъул гIунгутIаби ругел гIадамазул къадар.


Дунялалда бищун "сахаб" пачалихълъун батана Сингапур, хадуб - Италия, Австралия, Швейцария, Япония. Гьединго, бищун "сахаб" анцIго пачалихъалда гьоркьоб буго ИзрагIил, Испания, Голландия, Швеция ва Германия. Франциялъе щвана 13 бакI, Великобританиялъе - 21, СШАялъе - 33, Китаялъе - 55, Индиялъе - 103 бакIал.


Советияб пачалихъазда гьоркьор рукIарал пачалихъазул бищунго "сахаб" батана Эстония - 57 бакI ва Грузия - 77 бакI.
Россияйин абуни буго 97 бакIалда. Гьелдаго аскIор руго Тимор-Лешти пачалихъ (96 бакI) ва ГIиракъ (98 бакI). Гьеб кIиябго пачалихъалда сахлъиялъул рахъалъ квешаб ахIвал-хIал букIиналъе гIилла буго гражданиял рагъал рукIин. Экспертаз абулеб буго гьеб сияхIалда Россия "рачIчIалда" букIиналъе гIилла кколила хIасилго кьечIел реформаби гьари, сахлъи цIуниялъе гIураб гIарац биччалеб гьечIолъи ва медицинаялъулаб лъай кьеялъул даража загIипаб букIин.
Марям Къурбанг1алиева

Автор: Марям КъурбангIалиева

Газета №: 54, от 28 декабрь 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!