Сделать домашней|Добавить в избранное
 
Главная » Новости - ЦIиял харбал » Бицун лъугIулареб асар
на правах рекламы

Бицун лъугIулареб асар

  • Версия для печати
Добавил(а): progman от 11-09-2014, 11:19
Ахираб анцIила цо соналъ, гьоркьоса къотIизе течIого, тIобитIулеб буго Мармаралъул ралъдал рагIалда бугеб Ялова шагьаралда Кавказалъул халкъазул музыкаялъулгун кьурдухъабазул халкъазда гьоркьосеб фестиваль. Гьеб ишалъул хIаракатчи, Яловаялда бугеб Кавказалъул халкъазул цолъиялъул, ай дернекалъул кIудияв ккола нилъер ракьцояв, Дагъистаналъул ЧIикIаб росулъа Турциялде ккарал умумузул наслуялъул чи МухIамад Айдемир. Къогоялдаса цIикIкIун сон ун буго МухIамадица Ялова вилаяталда Кавказалъулго халкъал данде гьаризе хIаракат бахъулеб бугелдаса. Гьелъул хIасиллъун ккола тадбиралъ батIи-батIиял ишазул, хъулухъазул гIадамал гъорлъе цIалел рукIин ва гьеб сверулеб буго Россиялдаги Турциялдаги гьоркьоб гьудуллъиялъе лъолеб кьоялде.
Гьелъие нугIлъи гьабулел цо-цо гIаламаталги хутIулел руго турказул ракьалда: "МахIачхъала" парк, имам Шамилил ва исана лъураб  ХIамзатил Расулил памятникал. Гьаб нухалдаги фестивалалда гIахьаллъи гьабуна Хасавюрт шагьаралъул мэр Сайгидпаша ГIумахановас бетIерлъи гьабулеб кIудияб къокъаялъ. Гьелда гъорлъ рукIана Турциялда хIалтIулеб Россиялъул дармилал ишазул вакиллъиялда цебе рагьараб Дагъистаналъулаб вакиллъиялъул бетIерасул заместитель МухIамад ГIисаев, ХIамзатил Расулил яс СалихIат ХIамзатова, академик, профессор МухIудинов Тажудин, вацал Зелимхан ва Айдемир Хангерееваз нухмалъи гьабулеб "Молодость Дагестана" ва Хасавюрт шагьаралъул лъималазул "Хасавюрт" абурал коллективал, журналистал.
КIудияб хIурматалда Дагъистаналъул делегация къабул гьабуна Ялова вилаяталъул вали Живелек Эсенгюлалъ ва Ялова шагьаралъул мэр Вефа Салманица. Дагъистаналъул бетIер  Рамазан ГIабдулатIиповасул рахъалдасан саламги, Яловаялда Расул ХIамзатовасе бюст лъеялъулъ гьабураб кумекалъухъ баркалаги кьун, кIалъай гьабуна Сайгидпаша ГIумахановас.  
Щибаб соналъго гIадин исанаги Яловаялъул  амфитеатр цIун букIана Кавказалъул халкъазул гьунарчагIазухъ балагьизе рачIараз. Гьенир рукIана адыгеялги, гуржиялги, асатIиналги, дагъистаниялги, Яловаялда ругел Кавказалъул миллаталъул халкъазул лъималаздаса гIуцIарал кьурдухъабазул коллективалги.
Сордо бащалъизегIан лъугIичIо Кавказалъул халкъазул лъималаздаса данде гьарурал ансамблязул церерахъинал. Хасго Дагъистаналдаса лъималазул церерахъин балагьараз къабул гьабулеб букIана бахIарчилъиялъул гIаламат гIадин.
- Исана лъабабилеб сон буго  халкъазда гьоркьосеб  фестивалалда гIахьаллъи гьабизе рес щваралдаса, - ян бицана  "Лезгинка" ансамблялъул нухмалъулев Зелимхан Хангереевас. - ТIоцебесеб нухалда Дагъистаналъул делегациялда цадахъ рукIана журналисталги, хъвадарухъабигун шагIирзабиги, гIалимзабиги. Кинавниги 76 чи. Нилъер лъимал цере рахъараб мехалда тIубан залго тIаде бахъун бачIунаан. Истамбул, Ялова, Бурса шагьаразда концерт лъугIун къватIиве унев щивав чияс Дагъистаналъе, нилъер халкъалъе, культураялъе баркала кьун лъугIулеб букIинчIо. Хасавюрт шагьаралъул мэр Сайгидпаша ГIумаханов вукIинчIевани, дида лъаларо щиб гьабизе букIарабали. Гьес лъабабго соналъ тIаде росун харжал гьарулел руго Дагъистаналдаса Яловаялде фестивалалда гIахьаллъи гьабизе унеб къокъаялъе. Жинцаго гьелъие бетIерлъиги гьабулеб буго.
-  Расулие памятник лъуна, - ян бицана жамгIияв хIаракатчи, хъвадарухъан Шигьабудин Озденица. - Гьеб ккана Яловалъеги, магIаруллъиялъеги, Дагъистаналъеги кIудияб лъугьа-бахъинлъун.
- Доб бук1ана 1990 сон, - ан бицана Расулил вукIарав тохтур, профессор МухIудинов Тажудиница. - Цебесеб соналъ докторлъиялъул диссертацияги цIунун, хIухьбахъизе бакIалъе ургъулаго, тIаса бищун букIана Турция.  Ниж рещтIараб Топкапе гостиницаялде рачIана  Турциялда гIумру гьабун ругел магIарулал. Дун тохтур вугин абидал, гьез гьикъана гьединаб лъай щвезегIан цIализе изну кьолеб букIарабищан. Дица абуна дун тохтур гуревги, профессорги вугин. Гьеб хабаралъ цIакъ хIикмалъизарун рукIана дол. ЦIакъ кватIун гурони аскIоса нахъего унароан Истамбулалда рукIарал ракьцояз гIуцIараб цолъиялъул бетIер Рашид. Дида жеги рагIичIо нус-нус соназ цере къватIире ккарал гIадамазул наслабаз жидерго умумузул ВатIаналъулгун кунал тIезе риччачIого, дандчIваял гьарун, цоцазухъ хIасратго балагьун чIун гьадинал фестивалал тIоритIулеб Кавказалъул гIадинаб халкъ. Дида Яловаялда бихьичIо я Алания, я Майкоп абураб парк. Черкесалин абуни Турциялда гIемер  руго. Амма Яловаялъул мэриялда цун бугеб паркалда "МахIачхъала" абун цIар лъуна. АскIобго буго Шамил имамасе бараб памятник.
-  Дун киданиги щун вукIинчIо Турциялде, - ян пикру загьир гьабуна сапаралда цадахъ вукIарав ГIумахан ГIандийскияс. - Хасго лъикIаб асар гьабуна Ялова шагьаралъ.  Берцинаб, гьитIинаб, чIурканаб шагьар буго. Нилъер гьаниб гIадинаб ахIи-хIур гьечIо. Гьаракь борхун кIалъалев чиго вихьичIо.  Гьанир кигIан лъикI нилъер ракьцоял ратаниги, бихьулеб буго гъозул ракI Дагъистаналде цIалеб букIин. Дагъистаналда бихьичIеб нилъер гIолилазул  "АхIулгохI" абураб сцена, Хасавюрталъул гьитIичазул церерахъин Яловаялда бихьана. "АхIулгохIалъухъ" балагьулаго дидаго лъачIого тIаде ворхун вачIун ватана.
- Дунги цIакъ йохана гьаб дандчIваялда гIахьаллъизе рес ккеялдаса, - ян бицана Турциялда гьаюрай, гьений гIурай, Рихьунисаги Балахьунисаги умумузул яс Зугьайица.  
- Кидаго хIаракат бахъула дагъистаниял данделъун ругин рагIанщиналъуб гIахьаллъи гьабизе. Баркала гьаб гIуцIаразеги, гьанире рачIарал дагъистаниязеги, хасго нижеда "АхIулгохI" абураб хIикматаб асар бихьизабурал артистазеги. Араб соналда тIобитIараб Расулил байрамалда рагIун букIана тIоцебе Хасавюрт шагьаралъул бетIер Сайгидпаша ГIумахановасул бацIцIадаб магIарул мацIалда гьабураб кIалъай. Араб соналда рихьарал чагIи исанаги рихьана. Лъаларелги рачIана. Гьанир батIияб ракьалда гIурал ниж рохизаруралъухъ  кигIан кIудияб киридай букIина Сайгидпашае.
- Гьаб дандеруссиналъе  нилъеца байбихьи лъунин абизе бегьула 1991 соналдаго, - ян бицана Хасавюрт шагьаралъул администрациялъул нухмалъулесул заместитель ГIалиев Ибрагьимица. - Нилъехъа бажарана Дагъистаналъул хIакъикъияб гьумер бихьизабун.
- Яловаялъул валигун дандчIвараб мехалда хIикмалъи гьабизе бачIана, - ян бицана "Дагестанцы" газеталъул редактор ГъазимухIамадов ГIалисултаница.  - Дун  хIикмалъана гIезегIан кIудияб вилаяталъул вали, нилъер къагIидаялъ абуни, губернатор чIужугIадан ятиялда. Гьеб буго Турциялъул хIукуматалъ чIужугIаданалде божилъи гьабулеб букIиналъул гIаламат.  
ПалхIасил, гьадинал ва жеги батIи-батIиял рукIана исана Яловаялда тIобитIараб  фестивалалда гIахьаллъизе рачIаразулги гьенир гIумру гьабун ругел нилъер ракьцоязулги пикраби. Исана цIакъ лъикIаб хабарги ккана Яловаялъулги Хасавюрталъулги нухмалъулезда гьоркьоб. Сайгидпаша ГIумахановас рагIи кьуна Хасавюрт шагьаралъул цо къватIалда Ялова абураб цIар лъезе. ХIадурлъи гьабулеб буго рехсараб кIиябго шагьаралда гьоркьоб вацлъи рагIизабиялъул мурадалда  хIалтIи гьабизеги. Гьелде тIадеги, Хасавюрт шагьаралъул мэрас гьоболлъухъ ахIана Ялова вилаяталъул вали Живелек Эсенгюль ва Ялова шагьаралъул мэр Вефа Салман.

Автор: МухIамад КЪЕБЕДОВ, МахIачхъала - Истамбул – Ялова

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!