Сделать домашней|Добавить в избранное
 
Главная » Новости - ЦIиял харбал » ЦIиял хIалтIухъаби куцалел руго
на правах рекламы

ЦIиял хIалтIухъаби куцалел руго

  • Версия для печати
Добавил(а): Musa от 13-04-2014, 18:14
Республикаялъул хIукуматго гIадал идараби гIуцIила киналго муниципалитетазда

Ункъабилеб апрелалда ДРялъул нухмалъулев Рамазан ГIабдулатIипов дандчIвана ГIолилазул хIукуматалъул вакилзабигун. Гьениб ккара-таралъул хIакъалъулъ нижеца гара-чIвари гьабуна ГIолилазул хIукуматалъул председателасул заместитель Лабазанов АхIмадилгун. Гьев ккола муниципалитетазда бакIалъулаб самоуправлениялъул идараби гIуцIиялъул ва гьел церетIезариялъул проекталъул нухмалъулев.

 

 - АхIмад, сундул хIакъалъулъ бицараб данделъиялда?


    - ГьабсагIаталда республикаялда церечIарал масъалабазул хIакъалъулъ ва гьел тIуразариялъулъ ГIолилазул хIукуматалъ ва гIаммаб къагIидаялъ киналго гIолилаз кинаб гIахьаллъи гьабизе бегьулебали бицана цин Р. ГIабдулатIиповас. Хадуб нижеца гIолилазул проектазул хIакъалъулъ бицана: спорталъул, жамгIиял библиотекабазул, муниципалитетал церетIезариялъул ва цогидал проектазул. Дица бицана муниципалитеталда ГIолилазул хIукумат гIуцIиялъул проекталъул.


    ГьабсагIаталда республикаялъул хIукуматго гIадал идараби гIуцIизе руго киналго муниципалитетазда. Гьелъул аслияб мурад ккола пачалихъиял ишал тIуразариялъулъ гIолилал гIахьал гьари, ай гьел рукIинесел хъулухъчагIи хIисабалда хIалтIизе куцай. Нижер идараби гIуцIизе  руго ДРялъул нухмалъулесул вакилзабазда цере, ай ункъабго зонаялда. Щибаб районалъул администрациялъул бетIерасда цадахъ хIалтIизе вуго гIолилазул вакил. Щибаб бакIалъул администрациялда гьелъул хIалтIул рахъалги хIисабалде росун гIолилазул вакилзаби тезе руго. Гьелъул магIна кколаро бакIалъул администрациялъул хIалтIуда хадуб халкквей, яги гьезда малъари. БатIи-батIиял масъалаби тIуразарулел къагIидабигун гIолилазул лъай-хъвай гьаби ва гьезда гьоркьоса  бажари бугел хадурккун администрациялде хIалтIизе  роси - гьеле аслияб масъала. Жакъа киназго бицунеб буго, цере рукIарал ва хъамалчилъиялде, бикъа-хъамиялде ругьунал хIакимзабиги нахъе ритIун, цIиял гIадамал хъулухъазда тезе кколилан. Амма хIалтIун бажарулел ва нухмалъизе ругьунал цIиял гIадамал ратизе захIмалъулеб буго. Гьединлъидал гIуцIараб проект буго ГIолилазул хIукуматги.


    - БакIалъул администрациязул бутIрузе бокьичIони гIолилал жидер хIалтIуда гъорлъе рачине, гьединал идараби жидее къваригIунарилан чIеларищ гьел?


    - Нижер идараби бакIалъул администрациялъул бутIалъун кколаро. Гьел рукIине руго щибаб зонаялда вугев ДРялъул нухмалъулесул вакиласда цере. Масала, МугIрузул зонаялда вугев вакиласда цеве вугев ГIолилазул хIукуматалъул вакилас гIуцIизе буго жиндирго зонаялда гIолилазул багъа-бачари. Росабалъ, районазда лъугьа-бахъунел ишазул, хасго низамалде дандекколарел хIужабазул хIакъалъулъ ДРялъул нухмалъулесул вакиласда лъазабизе ккола гIолилаз.


    ГIолилазул сессиялдаги, "Каспий - 2013" форумалдаги, цогидал дандеруссиназдаги нижеца кьун рукIарал проектал ва ишалъулал пикраби цо-цо пачалихъиял хъулухъчагIаз гIумруялде рахъинариялъулъ гIахьал гьаричIого толел руго. Гьединлъидал, нижер багъа-бачариялда гъорлъ рукIарал гIолилаз  гьеб проекталде квер хьвагIун  тана. Гьединал хIужабаздаса цIунулеб тадбирлъун букIине буго бакIазда гIуцIулеб гIолилазул багъа-бачари.


    - ГIолилазда гьел масъалаби ричIчIизаризе, баянал кьезе гьел ракIаризе ккеларищ?


    - ГьабсагIаталда нижер гIуцIиялда гъорлъ вуго кIинусгогIанасев чи. Гьел руго "Каспий - 2013" форумалда ва цогидал данделъабазда тIоритIарал ишалъулал хIаязда куцарал гIолилал. КватIичIого зоналиял ишалъулал хIаял тIоритIизе руго. Республикаялъул тIолалго районаздаса гIолилазул вакилзаби МахIачхъалаялде ахIичIого, росабалъго масъалаби гьоркьор лъезе ва гьел тIуразарулел нухал ратизе руго. Гьениб гьоркьоб лъезе буго лъабго рахъ. ТIоцебесеб къоялъ бицине буго бакIазда ругел социалиял масъалабазул ва гьелда хурхарал проектазул. КIиабилеб къоялъ экономикияб рахъалда тIасан бахIсал тIоритIизе ракIалда буго ва лъабабилеб къо политикияб гIуцIиялда сверухъ тIобитIизе буго. Нижеца хIадурарал проектал рукIине бегьула росабалъ гIумруялде рахъинарулел ва росабалъа гIолилазул - тIолабго республикаялъул гIумру цебетIезабиялъул мурадалда хъварал.


    - Гьединаб хIаракаталъулъ гIахьаллъизе гъира бугел гIолохъаби ругодайха районазда?


    - Киназулго кIалдиб ругьунаб калима буго жидее хехго щвезе бугеб бечелъиялъул, жалго гIахьаллъичIого, жидер гIумру-яшав лъикIлъизабиялъул гурони гIолилаз пикру гьабуларилан. Республикаялда тIоритIарал гIолилазул мажлисаз бихьизабуна сахаватал гIолилал гIемер рукIин ва гьел, аслияб къагIидаялъ, росабалъа рукIин. 2013 соналъул  апрелалда тIобитIараб ГIолилазул стратегияб сессиялда тIоцебе дица борхана муниципалитетазда ругел гIолилазул суал. Росабазул социалияб рахъ цебетIезабиялъул ургъалида руго гьезул цIикIкIарасел. Гьезул хIалтIи цо чIара-хьараб тартибалде бачине къваригIун буго. Нижеца ва бакIалъулаб самоуправлениялъул нухмалъиялда гъоркь хIалтIулел гIолилаз хIадурарал проектазул цоцазда бицин, пикраби дандрай, проект гIуцIизе кумек гьаби ва хадубккун гьеб гIумруялде бахъинабиялъе нухал рати, шартIал ралагьи - гьеб буго нижеца борхулеб суал. Бажари бугел гIолилазда гьоркьоса цо-цоялниги хIалтIудалъунги хьезаризе руго муниципалитетазда.


    - Дур пикруялда, республикаялъул тIалъиялъе унго-унголъун хIажат ругищ гIолилазул гIуцIиял, багъа-бачариял?


    - Р. ГIабдулатIиповас абуна гьеб расанди гурилан. Ишалъулал хIаязда куцарал, гьенир тIоритIулел тадбиразулъ гIахьаллъун камиллъарал гIолилал рекъонкколел министерствабазда отделазул нухмалъулеллъун, махщелчагIилъун хIалтIуде росеян лъазабуна. БакIалъулал администрациязул бутIрузул данделъи ахIараб мехалда жинца гьеб суал гьоркьоб лъелилан абуна ГIабдулатIиповас. Щибаб районалъул администрациялда гIуцIизе бугеб ГIолилазул багъа-бачариялъул нухмалъулесухъе удостоверениеги кьезе буго. ХIажалъи ккараб министерствоялде ине нух рагьила гьелъ. ГьабсагIаталда ГIолилазул хIукуматалъул председателасухъе ва гьесул кIиявго заместителасухъе кьун руго пропускал ва ниж бокьарав хъулухъчиясда аскIоре ине, къваригIел тIубазе жанире риччала, квекIенал гьаричIого министраз къабулги гьарула.


    - Нужер хIалтIи буго жамгIияб багъа-бачари хIисабалда гIуцIараб. Гьелдасан бичIчIула нужее харж чIезабун гьечIеблъи. ЧIобого хIалтIизе рази ругищ гIолилал?


    - Стратегияб сессиялда президентас абун букIана бакIалъулаб бюджеталдаса 0,5 % гIолилазул политикаялде биччазе кколилан. Амма гьеб тIалаб тIубазабулеб гьечIо цо-цо муниципалитетазда. ГIолилаздехун лъикIаб бербалагьи бугев бакIалъул нухмалъулев вугони, гьениб иш гIуцIун буго. Болъихъ районалдаги администрациялъул бетIерасул бербалагьи хисана. Хисана, нижеца гIуцIарал проектазул магIна бичIчIидал. Цогидал районаздаги иш гьедин ккеялде хьул буго.


    - ДандчIваялдаса разилъанищ? Щиб бугеб тIубазабизе кколеб аслияб масъала?


    - Дида бихьана нижедехун тIалъиялъул лъикIаб бербалагьи букIин. Республикаялъул нухмалъулес абуна ишалъулаб хIаялъулъ кIиго-лъабго къоялъ нижгун хIалтIизе живги хIукуматалъул хъулухъчагIиги хIадурал ругин. Туризмалъул кластер гIумруялде бахъинабиялъе рехун тарал росабалъе ине  хIадурлъеянги тIадкъана гьес нижеда. Лъай кьеялъул министр Ш. Шагьовасги абуна щибаб школалда спортклубал гIуцIизе ва гIемерав чи гъорлъе вачараб спорт цебетIезабиялъулъ ниж гIахьаллъизе бегьилин. Цоги кIвар бугеб иш ккола росабалъ ругел гIадамаз кредит босулеб мехалда ва цогидал тадбиразе хIажатал документал хIадуризе кумек гьаби. ДРялъул ЖамгIияб палатаялъул председатель ХI. ХIамзатовас абуна гIолилазул парламенталъул хасаб телепередача гIуцIизе бегьилилан. ЦеречIарал масъалабазул, гьаризе бокьарал ишазул ва тадбиразул хIакъалъулъ миллиял газетазде макъалаби хъвайилан гIолилазде хитIаб гьабизе бокьун буго дие. Росабалъ руго газетал цIалун гурони, батIиял СМИяздасан пайда босуларел чагIи. Гьелдалъун росабазул жамагIатазда ва бакIалъулал администрациязул бутIрузда гIолилазул багъа-бачари "гьадингосеб расанди гуреблъи" бичIчIизе буго.

Автор: Кавсарат СУЛЕЙМАНОВА

Газета №: 14, от 11 апрель 2014г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!