Сделать домашней|Добавить в избранное
 
Главная » Конкурс » Бубудулеб гамачI
на правах рекламы

Оцените конкурсную работу по 5 бальной шкале

1
2
3
4
5

Бубудулеб гамачI

  • Версия для печати
Добавил(а): progman от 18-11-2013, 12:23

Щибаб росдал буго жиндирго къо-асс,  умумуз лъималазухъе ирсалъе кьурал гIадатал, жиндирго тарихалъул биценал.  

Нижер Данухъ росдалги руго росу кквеялъул хIакъалъулъ батIи-батIиял биценал. Цояз бицуна киналалиго чанахъабаз ккурабилан, цойгидаз абула цо нухлулаз ккурабилан. Лъица кин ккун батаниги, тIоцере гьенир щал рещтIун ратаниги, умумузул кинал би ценахъ балагьаниги, бихьулеб буго росу ккун букIин цIакъго цебе заманалда. Нилъер мугIрузулаб Дагъистаналда тIоцере ккурал росабазда гьоркьоб рехсон буго дир гIагараб росдал цIар. Гьединго, нижер умумуз 200-250-гIан соналъ цебе хъвараб цо кагътидаги абулеб буго: «Данхъадерил тIадегIанал тухумазул баян», - абун.  Дие гьаниб бицине бокьун буго росу ислам бачIинелдего цебеккун букIин бихьизабулеб цо хIужжаялъул бицен рехсезе.

Нужеда гьаб сураталда бихьулеб гIадатияб гуреб гьаб ганчIил хIакъалъулъ наслабаз цоцахъе кьун росулъ нахъе хутIараб биценалъе баян кьезе.  ГамачIин абизе, гамачIги гьаб гуро, гьаб буго гIадатияб кьурул речелалда жибги рекIараб, сверун цебе гIуру къанги букIараб, гьанже саназ сверухъ бакI кинабго цебе лъезубураб кьурул цо бутIа. Цебегоялдаса умумуз гьалда абулеб батана «Бубудулеб гамачI», - ан. Щибха гьелъул хIакъалъулъ бицине бокьараб жо, щай гьелда гьединаб цIар лъураб ва кисан гьеб бачIараб?
ХIакъикъаталда гьеб гIадамасул сипаталда релълъараб букIана. Гьанже гьелъул гьеб сипат хисизабун буго. Гьебги кканин абула араб гIасруялъул 60-абилел соназда росулъе машинаялъе нух бахъулелъул, гьеб кьвагьун гьабизе кканин гьеб нух, гьелъ ганчIил гъоркьияб рахъал хвезабунин ва сипатги хисизабунилан. Росулъ батараб бицен буго, цебе заманалда гьеб гамачI бубудулаанилан. Росулъе щив вукIаниги батIияв чи вачIунев вугонани, гьеб гамачIалъ гIасиял, гIадан хIинкъизавулел гьаркьал гьарулаанила ва гьелдалъун лъалаанила росулъе батIияв чи вачIунев вукIин. Гьеб букIанила росдаде кинаб бугониги хIинкъи бачIунеб букIин лъазаби. Гьел гьаркьал рагIидал, росдал халкъалъ жидеего цIодорлъи гьабулаанила, хал гьабулаанила тушманищ вачIунев вугев, яги жидее хIинкъи гьечIев хирияв гьоболищ гьев кколевали. ХIинкъи кьезе вачIарав тущман ватани, тIолабго халкъ бахъун росу цIунулаанила, тущман нахъчIвалаанила, гьев лъикIлъиялъе вачIунев ватани, гьесда лъикIаб дандчIвайги гьабун, къваригIелги тIубан, тIовитIулаанила.   
Буго росдал гьадинаб цойги бицен гьелъул хIакъалъулъ.  Цебе заманалда, гьеб гамачI рурударабго, гьелъие кьезе кколаанила квен, гьеб щвечIого, гьелъ росулъе нух къан, гьенисан щивго чи виччалароанилан. Гьеб кинабго бицадулъ хутIун буго бачIунебгIелалъе.
Кин гьеб букIараб батаниги, гьелъ нилъее нугIлъи гьабула росу Дагъистаналде ислам бачIинелде цебего ккураб букIиналъе, гьеб некIсиял росабазул цояб букIиналъеги.  Щайгурелъул, нилъеда бихьулеб буго гьеб бакIалда цо заманалда рукIин ганчIие лагълъи гьабулеб къавм. .Гьелъ бачIун батизе ккола гьеб бицен ва гьедин гьеб халкъалда гьоркьоб тIибитIун унги буго. Ратанин бицуна нижер харабаз цо-цо хобал, цадахъ кинаб бугониги гIарац-меседалъул алатал рукъарабги. Гьебги некIсиял, жеги ислам бачIинелде рукIарал къавмазе хасиятаб гIаламат ккола. Кида щиб ккун батаниги, гьел биценалги жакъаги руго. ГамачIги бубуданиги бубудичIониги, цIарги гьелъул - «Бубудулеб гамачI», хиси гьечIеб буго.   
ГамачI кидаго нижер халкъалъе бубудулеблъун хутIизеги буго. Руго нижер гьанир ганчIазда лъурал гьадинал батIиял цIаралги:  «Амал гамачI», «ХIажибутайил гамачI», «КIирекIараб гамачI», «Къалъул гамачI» «Гагудал гамачI» ва гьел гурел цогидалги. Щибалъул буго жиндирго цIар щвеялъул хасал биценги. Гьел киназдаго гьоркьоб гьаб «Бубудулеб гамачI» абураб цIар тIоцебесеблъун рикIкIуна нижер гьаниб. Гьеб цIар бищунго гIемер  хIалтIизеги гьабула росулъ.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!