Сделать домашней|Добавить в избранное
 
Главная » Нахъеги рещтIана Яловаялда
на правах рекламы

Нахъеги рещтIана Яловаялда

  • Версия для печати
Добавил(а): Musa от 28-08-2013, 12:34

Кавказалъул фестивалалъул гIахьалчагIи – Турциялда

 

18 августалъул бакъанил гIужалда щвана ниж Турциялъул Стамбул шагьаралде. Самолеталда рекIаразул гIемерисел рукIана Яловаялде, Кавказалъул халкъазул фестивалалда гIахьаллъи гьабизе унел гIадамал. Гьезда гьоркьор рукIана Хасавюрт шагьаралъул мэр Сайгидпаша ГIумаханов, хъвадарухъан ШапигI Казиев, "Дагъистаналъул гIолохъанлъи" лъималазул кьурдухъабазул ансаблялъул гIахьалчагIи ва гIемерал цогидалги.

 

 Дагъистаналдаса рачIарал гьалбадерида дандчIвай гьабуна Турциялда вугев Дагъистаналъул вакил Тавлу Казакбиевас, гьенир ругел ракьцоял, жамгIиял хIаракатчагIи Шагьабудин Озденица, Жагьид Йилдириница, ГIали Буюкторгъаница, Нигьат Айдимирица...


   ГIезегIан бечедаб тарих буго Яловаялда хIалтIулеб Шималияб Кавказалъул халкъазул, гьениб абухъе, дернекалъул, ай культурияб цолъиялъул. Гьелъул хъвай-хъвагIай гьабуралдаса лъебералда щуго сон буго. Дернекалъул тIоцевесев председательлъун вукIана магIарулав ХIалим Озделим. Гьесдаса хадув - Фергьат Жанбакиш абулев черкесав. 1986-1994 соназда Яловаялда гIуцIараб Шималияб Кавказалъул халкъазул культурияб цолъиялъе нухмалъи гьабуна хъвадарухъан Шагьабудин Озденица.


   Гьесул заманалда цIакъ кIвар бугел лъугьа-бахъиналги ккана. Шагьабудинил хIаракаталдалъун Турциялда ругел ракьцоязул кIудияб къокъаялъе рес щвана къогоялдаса цIикIкIун соналъ цебе Дагъистаналда тIобитIараб Халкъазда гьоркьосеб тIоцебесеб конгрессалда гIахьаллъи гьабизе. Гьелдаса цебеги Шагьабудиница Турциялдаса цадахъ бачун ансабльгун тIоцебесеб сапар гьабун букIана Дагъистаналде. Гьев чанго нухалда щвана умумузул ватIаналде. Шагьабудинил бищунго кIудияб гьунарги махщелги бугин абизе бегьула гIадамал данде гьаризе, гьел цолъизаризе ва халкъалда гьоркьоб гьуинлъи-гьудуллъи бекьизе.


   Дернекалъул цадахъаб хIаракаталдалъун вацлъи рагIизабун буго Дагъистаналъул МахIачхъала ва Турциялъул Ялова шагьаразда гьоркьоб. Гьелъие нугIлъиялъего гIадин Яловаялда бугеб цо паркалъе кьун буго МахIачхъалаялъул цIарги.


   Шагьабудин ккола Дагъистаналъулги Турциялъулги магIарул  росабазда гьоркьоб вацлъи рагIизабиялъе гьабулеб хIалтIуе кьучI лъеялъе нух бахъарав аслияв хIаракатчиги. Араб соналда вацлъи рагIизабураб КIикIуниб ва Турциялъул Гюней росабазул вакилзабаз гьабуна цоцазухъе сапар. Гьелъул хIакъалъулъ бицунеб цIакъ берцинаб, кьер бугел суратаздалъун бечедаб "Вац росаби: КIикIуни-Гюней" абураб журнал хIадур гьабун къватIибе биччан буго Шагьабудин Озденица. Гьаниб абичIого гIоларо хъвадарухъанас Турциялда ругел мугьажирал гIагар гьариялъе гIоло Кавказалъул ва Дагъистаналъул цIаразда цереккунги риччарал журналал халкъазда гьоркьор тIиритIизарун рукIанин.


   Абизе бегьула гьесул гIакълуги, рагIиги, пикруги хIисабалде босуларел чагIи Турциялда ругел мугьажиразул жамгIиял церехъабазда гьоркьор ратиларин. ГIемерисел гьел руго Шагьабудинил цIалдохъаби. Гьединазул цояв ккола гьабсагIат дернекалъул бетIерлъиялда вугев МухIамад Айдемир. Къого сон бан буго МухIамадица Яловаялда хIалтIулеб Кавказалъул халкъазул цолъиялъе нухмалъи гьабулеб бугелдаса. Гьес гъираялда бицана гьеб заманалда мугьажиразул гIумруялда ккарал лъугьа-бахъиназул хIакъалъулъ. МахIачхъалаялъул цIар лъураб паркалда буго имам Шамилие бараб памятникги. Исана, октябрь моцIалда, Расул ХIамзатовасеги памятник лъезе бугин бицана гьес.


   Жакъа гIезегIан кIодолъун бугин абизе бегьула ракьцоязул жамгIияб гIуцIи. Байбихьи дагъистаниязги черкесазги лъун батани, жакъа гьезда цадахъ руго  Кавказалъул халкъазул гIемерисел миллатазул вакилзаби. Гьелъ данде гьавула азаралда щунусго чи.


   ЦохIо Турциялда гуребги, Кавказалъул вакилзабаздаса данделъараб кьурдухъабазул къокъаялъ жидерго гьунар бихьизабула батIи-батIиял улкабаздаги. Гьел анлъго нухалъ щвана Шамалде, цере рахъана Украинаялда, Кипралда ва цогидалги улкабазда.


   Жидецаго букъулеб буго кьурдухъабазе ретIел, малъулеб буго жидерго умумуз квен-тIех гьабулеб букIараб къагIида, гIурус мацI. Дагь-дагьккун дернекалде хьвадулел цIикIкIунел рукIиналъ, магIарул мацIалдехун ракI цIалезулги горсвери гIатIилъулеб буго. Гьеб мурадалъе ва нилъер халкъазул культура, гIадат, гIамал, фольклор, тIолабго рухIияб бечелъи кIоченчIого букIиналъе гIоло ахираб анцIго соналъ гьоркьоса къотIичIого тIобитIулеб буго Яловаялда бакI-бакIазде рикь-рикьун ругел Кавказалъул халкъазул фестиваль.


   Гьел киналго ишал нухда рачунеб Кавказалъул халкъазул жамгIияб цолъи хIебтIун буго гIемер кIудияб гуреб минаялъуб. Гьанже бицана иргадулаб фестиваль тIобитIулеб заманалде Яловаялда нилъер ракьцоязул культурияб централъе базе бугин азарго квадратияб метралъул гIатIилъиялда мина.


   Гьайгьай, лъалеб жо буго гьеб кинабго базе ккани гIарцулги гIуцIарухъабазулги къуват къваригIунеблъи. Амма гьеб рахъалъ кIудияб захIмалъиго бугин зигардичIо дернекалъул кIудияв МухIамад Айдемир. ХIатта, гьесие бокьана жидеца жамгIиял ишазе гIоло цIикIкIарал харжал гьарулезул цIарал балъго тезе. Гьебго заманалда МухIамад барахщичIо цо-цоязул цIаралда лъикIал рагIаби абизеги. Гьединазда гьоркьоре ккана Ялова шагьаралъул мэр Якъуб Бингин Кочар, Туркиялъул Культураялъул министерствоялъул, Ялова шагьаралъул кIвар бугел идарабазул нухмалъулел, Стамбул шагьаралъул бетIерлъуда ругел гIадамал, Дагъистаналдаса бизнесмен ГIумар ГIумаров, хасго Хасавюрт шагьаралъул мэр Сайгидпаша ГIумаханов.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!