Сделать домашней|Добавить в избранное
 
Главная » Общество - ЖамгIият » Заманалда щай щолареб?
на правах рекламы

Заманалда щай щолареб?

  • Версия для печати
Добавил(а): Musa от 15-08-2013, 12:32

Масъалаби гIемераб, амма тIубазабизе захIматаб суал

 

Почалъул хIалтIухъабазда тIасан гIемерал гIарзал рачIуна "ХIакъикъаталде". Заманалда газеталгун журналал цIалдолезухъе щолел гьечIолъиялъул бицарал рукIуна гьел. Гьеб мурадалда ЛъаратIе, БежтIе ва ЦIунтIе сапарцин бухьун букIана нижеца.

 

 ЛъаратIа районалда бугеб почалъул отделениялда хIалтIулев вуго Рамазанов МухIамадгIали. Гьелъулги буго щуго отделение: КIособ, Анцухъ, ЛъаратIа, ТIохьотIа, Гъерел росабалъ. БукIана цоги отделение, амма гьеб къанин бицана МухIамадгIалица. Гьанже киналго рехсарал отделениял руго Шамилхъалаялда бугеб почтамталъул нухмалъиялда гъоркь. ЛъаратIа районалъул почалъул хIалтIул бугеб ахIвал-хIалалъул хIакъалъулъ гьадин бицана гьес: "Цебе ЛъаратIа букIана почтамт. Жавабчилъиги дида тIад букIана. Гьанже почтамт цин Шамил районалъул ХIебде бахъун букIана, хадуб Шамилхъалаялде ана. Ниж ккола гьезул цо бутIалъун. Дица гьанже дирго бакIалъул жаваб кьезе ккола. БакIазде почта щвезабиялъул жаваб кьезе ккола ХIебда вугев начальникас. Почтаги гьез щвезабула. Гьезул буго кIиго машинаги. Нижер отделениялдеги, БежтIеги, ЦIунтIеги газетал-журналал, посылкаби - кинабго щвезабиялъул иш дозда тIалъула. Дица, дирго отделениялдеги рачIун ритIарал посылкабазул гурони жаваб кьоларо".
  
   Анкьида жаниб кIицIул бачIуна почалъул машина ЛъаратIе. Бихьизабураб заманалда ичIго тIубазе бащдаб сагIат хутIидал тIаде щола гьезул машина. Щибаб райцентралда букIараб почалъул отделение биххизаби битIараблъун рикIкIунеб гьечIо МухIамадгIалица. "Доба Шамилхъалаялдаги чIун, почалъул начальникасда росабалъ лъугьа-бахъунеб жо лъаларо. ХIебда почтамт бугеб мехалда кинабго рекъезабун букIана. Камурал газеталги, кватIарал цогидал жалги лъазаризе бигьаго букIана. Отчетал кьезе ине расги бигьаго букIунаро. Масала, уна гьаниса Шамилхъалаялде. Гьениса къасиго тIадвуссине рес рекъоларо - ЛъаратIе рекIине транспорт щоларо. Ине ккола МахIачхъалаялде. Гьениб сордоги бан, хадусеб къоялъ росулъе тIадвуссуна. Шамилхъалаялда гостиницаги гьечIо, тахшагьаралде ине кватIани, къватIивго хутIизе бегьула. Щибаб моцIалъ гьабизе ккола гьединаб сапар. Амма командировкаялъухъ гIарацги кьоларо", - ян бицана М. Рамазановас.


   Гьединалго гIузраби ратана БежтIа бугеб почалъул отделениялдаги. Участкаялда гIумру гьабулел гIадамаз газетал хъван гьечIилан гIайиб чIвазе бакI хутIулебго гьечIо. Щибаб анкьалъ республикаялда лъугьа-бахъунеб цIияб хабар лъазабиялъул мурадалда хъвала газетал. Амма гьел кIиго-лъабго анкьалъ кватIун щола цIалдолезухъе. Кинха гьезда абилеб газетал хъвалел гьечIилан?


   ЦIунтIа районалъул Мокъокъ росулъ буго почалъул отделение. Гьелъие нухмалъи гьабула СагIидов СагIидица. Почалъул отделениялдаса газеталги посылкабиги анцIила кIигониги росулъе щвезаризе ккола гьенир хIалтIулел почтальоназ. Гьезул моцIрол харжалги мукъсаналго ругин бицана СагIидица. "Машина нижер гьечIо. Шамилхъалаялдаса почта заманалда бачIаниги щиб, гьанисан росабалъе гьеб щвезаби захIматаб иш буго. Районалда аслияб кIвар кьезе кколеб масъала ккола нухал. ГьечIо машинаялда яги лъелго ине санагIатал нухал нижер отделениялде гъорлъе унел росабалъе. Риидални бигьалъи букIуна. Хасало кин абилеб поч щвезабизе айилан? Гьезул гIумруялъе хIинкъи букIинги лъалаго, гьел росабалъеги ритIун, цониги къварилъи ккани, дида гьезул жаваб кьезе кIоларо", - ян бицана СагIидица.


   Почалъул хIалтIи рукIалиде ккезабизе заман цебего щун букIин бичIчIулеб буго киназдаго: республикаялъул почалъул нухмалъулездаги, газетал-журналазул редакциязул хIалтIухъабаздаги, цIалдолездаги. Гьеб масъала тIубазабиялда тIад ургъичIони, информациялъулал миллиял алатазул хIалтIи цIакъго загIиплъизе букIиналда щаклъи гьечIо. Заманалда газетал щунгутIи сабаблъун тиражал  гIодоре ккола. Гьелда хурхараб буго редакциялъул хIалтIухъабазул харжал гуребги, тIолабго республикаялда бугеб ахIвал-хIалги. Газеталъул аслияб мурад буго цIалдолесе информациялда цадахъ жамгIиябгун рухIияб бичIчIи кьейги. Дагъистаналда кколел лъугьа-бахъиназда тIасан къадруял гIадамазул пикрабиги рагIулел гьечIони, хIакъикъатги лъачIого гьазухъ-дозухъ гIенеккун киналъулго хIасилалги гьарулел ругони, гIун бачIунеб гIелалъул бербалагьиялда хадургъоларо. Гьединлъидал, цебе букIараб хIалалданиги почалъул хъулухъ букIинабизе тIадаб буго. Гьадингоги хъулухъалда гьечIел, хIалтIудалъун хьезаричIел
   
Шамил районалъул Гьандихъ росулъа редакциялде бачIараб кагътида хъвалеб букIана кIиго анкь унеб бугин газет-журнал росулъе рачIинчIого. Гьелъие бугеб гIилла цIехон, нижеца гьеб ругьел битIун букIана "Россиялъул почта" ФГУПалъул ДРялъул УФПСалде. Гьенисан бачIараб жавабалда хъвалеб буго гьадин: "Июль моцIалдаса байбихьун "ХIакъикъат" ва "Ассалам" газетал заманалда цIалдолезухъе щвезарунгутIиялъул хIужаби, хIакъикъаталдаги, ккана. Гьаб соналъул июль моцIалда рехсарал газетазул кIиго номер ХIебда бугеб почалде заманалда щун букIаниги, гьел рачIун рукIана камизеги гьарун. Гьединлъидал, газетазул камурал номерал тIаде щвезегIан почалъул нухмалъулев И. МухIамадовас рикьугеян буюрухъги кьун чIезарун рукIун руго. ПалхIасил, газетал цIалдолезухъе щвана, амма дагьалъ кватIун".

Автор: Кавсарат СУЛЕЙМАНОВА

Газета №: 32, от 6 август 2013г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!