Сделать домашней|Добавить в избранное
 
Главная » Спорт » Гьанже сапар – Софиялде
на правах рекламы

Гьанже сапар – Софиялде

  • Версия для печати
Добавил(а): Musa от 16-04-2013, 13:42

Iасановасе щвана Сурдолимпиадаялде путевка

 

ГIинкъал инвалидал-спортменазда (васазда ва ясазда) гьоркьоб Хасавюрталда тIобитIараб тхэквондоялъул рахъалъ Россиялъул чемпионаталда гIахьаллъи гьабуна улкаялъул 12 регионалдаса тхэквондистаз. Гьединал къецал Хасавюрталда тIоритIана тIоцебесеб нухалъ. Чемпионат тIобитIизе шагьаралъул нухмалъулез лъикIаб хIадурлъи гьабун букIана ва гьел тIадегIанаб даражаялда, гIуцIадго ана.

 

 - Къецазул гIахьалчагIазе, судьябазе, тренеразе нижеца гIуцIун рукIана киналго щартIал - квана-гьекъезе, рега-рахъине бакIал. Къецал тIоритIиялъе киналго харжал гьаруна администрациялъ. ХIамид ХIамидовасул цIаралда бугеб  нижер гьайбатаб спортивияб кIалгIаялъуб Россиялъул тхэквондистаз бихьизабуна лъикIаб техника ва берцинаб гугари.  ГIинкъал инвалидазе гьел къецал байрам гIадин анилан рикIкIуна дица, - ян абуна "Хасавюрт шагьар" МОялъул бетIер Сайгидпаша ГIумахановас.


   Къецазде вачIун вукIана Россиялъул тIаса бищараб командаялъул кIудияв тренер, Россиялъул мустахIикъав тренер Роман Кувиковги. Диргун букIараб гара-чIвариялда гьес гьадин абуна:


   - КIудияб баркала загьир гьабула шагьаралъул нухмалъулезе ва къецал гIуцIаразе гьадинал лъикIал шартIал чIезаруралъухъ. Гьезда гIахьаллъи гьабуна цIар рагIарал тхэквондистал: дунялалъул чемпион Арсен ХIасановас, Муртазали ГIалиевас, Владимир Бобровникица, дунялалъул чемпионаталъул гIарцулав призер Артем Багаровас ва мазгарул призер Александр Баркаловас. Гьал къецал ккола исана 26 июлалдаса 5 августалде щвезегIан София шагьаралда тIобитIизе бугеб Сурдолимпиадаялде спортсменал тIаса рищулеллъун. Гьанир нилъеда рихьана лъикIаб техника, Болгариялда Россиялда тIаса бищараб командаялъул къадру цIунизе бажари бугел тхэквондистал.


   80 килограмм цIайиялда чемпионлъун вахъана Ш. ГIумахановасул цIаралда бугеб СДЮСШОРалде тренировкабазде хьвадулев Арсен ХIасанов. Гьесул тренер ккола Иманпаша ГIумаханов. Ш. ГIумахановасул цIаралда бугеб спортшколалда гIинкъазегун мацI лъаларезе тхэквондоялъул секция рагьун бугин рагIидал, цевехун киданиги спорталде машгъуллъун вукIинчIев Арсеница хIукму гьабуна спорталъул гьеб тайпаялда жиндирго хIалбихьизе. ТIоцеве гьев татамиялде вахъана 2012 соналъул октябрь моцIалда.


   Шамил районалъул ТIидиб росулъа 25 сон барав Арсен ХIасанов лъагIелгун бащдалда жанив вахъана Россиялъул ва 2012 соналда дунялалъул чемпионлъун. Исана Хасавюрталда тIобитIараб чемпионаталдаги гьесие щвана меседил медаль ва Софиялде Сурдолимпиялъулал хIаязде путевка.


   - Татамиялда Арсеница бихьизабуна лъикIаб техника. Финалалда гьес ракIчIараб бергьенлъи босана Воронежалдаса Андрей Рожковасда тIад. Нижер хьул буго ва божула Сурдолимпиадаялда Арсеница призалъулаб бакI кквезе букIиналда. Гьелде хIадурлъизе руго тIадчIун ва кIвахIтун. Ш. ГIумахановасул цIаралда бугеб СДЮШОРалдаса Артем Багаровасе 80 кг цIайиялда щвана гIарцул медаль. 80 килограммалдаса цIикIкIараб цIайиялда мазгарул медалалъе мустахIикълъана Руслан Зульпукъаров, - ан абуна Иманпаша ГIумахановас.


   Москва шагьаралъул тIаса бищараб командаялда гъорлъ татамиялде рахъарал Муртазали ГIалиевасегун Муса Аджиевасеги (тренер А.  Хегай) щвана мазгарул медалал.

 


  

Автор: Измулла АДЖИЕВ

Газета №: 14, от 12 апрель 2013г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!