Сделать домашней|Добавить в избранное
 
на правах рекламы

Подписка - 2017

  • Версия для печати
Добавил(а): istina от 16-06-2017, 11:07
2003 соналда "ХIакъикъат" газеталъул тираж букIана 23 азарго, гьанжейин абуни анкьазаргоялдаса дагьабго цIикIкIун буго. Гьелъие гIиллаби батIи-батIиял руго: гIадамал росабалъа гочунел рукIин, харжал дагьал рукIин, цIалдолел гIадамал дагьлъулел рукIин, газеталъул багьа хиралъи, гьеб заманалда щунгутIи, Интернет бакки ва цогидалги. Гьеб гIицIго "ХIакъикъат" газеталда сверухъ бугеб ахIвал-хIал гуро, гьедин буго киса-кибего. Цогидал миллиял газетазда дандеккун, "ХIакъикъаталъул"  тираж жакъа дагь гьечIо, амма магIарулазул къадаралъул хIисаб гьабуни, цIакъго гIей гьечIеб буго. Гьеб нижер  "унти" гуребги, хIалтIиги кколелъул, газета хъвалезул къадар щай дагьлъулеб бугебали цIехезелъун сапаралъ рахъана Шамилхъалаялде. Гьениса 13 магIарул районалде бикьула поч. Гьениб нижер хабар ккана Шамилхъалаялъул почтамталъул нухмалъулесул  заместитель ХIусен ХIусеновасулгун:
- Газетал хъвалезул къадар дагьлъиялъе гIилла ккола, дир хIисабалда, гьеб хиралъи. ГьабсагIаталда гIадамазухъ гIарац гьечIо. Газета хъвалаан,  аслияб куцалъ, пенсионераз, педагогаз ва цогидал хъулухъалъул гIадамаз, хъвалаан гьединго организацияздасанги. Щивав почтальонасда рекIехъе лъала чан цIалдолев жиндир сияхIалда дагьлъаравали. Гьез абула пенсионерал дагьлъулел ругин, амма гьезул бакIалде гIолохъанал газета цIалулел рачIунел гьечIин. Цере щибаб районалда цо течIого учителас хъвалаан районалъул ва республикаялъул газетал. Гьанжеги руго гьединал районал. Гумбет, ЦIумада, ЦIунтIа, ЛъаратIа районазул, БежтIа участокалъул учительзабаз киназго гIадин хъвала газетал.
-  Дуца рехсечIо бищун церетIураллъун, лъай бугел гIадамал цIикIкIараллъун рикIкIунел рукIарал Хунзахъ, Гъуниб, Унсоколо, Хьаргаби районал. Гьеб тIалаб гьечIолъиялъул хIасилищ, ялъуни гьенир лъай бугел гIадамал дагьлъулелищ ругел? 
- Дица рехсечIел районазул учительзабаз ва гIадамаз газетал  хъвангутIиялъе бугеб гIилла щибали лъаларо, амма гьенир цIакъ къадарго гурони газетал хъвалел гьечIо. 
Руго районал газет-журнал хъваялде кIвар кьолелги. Масала, ЦIумада районалъул бетIер Вечедов АнвархIажи. Гьениб щибаб организациялъе, учреждениялъе гьабураб план буго. Хъвала районалъул ва республикаялъул газеталгун журналал, жидерго махщалида хурхараб литература. Дир хIисабалда, гьеб буго районалъул кадрабазул лъай борхизабиялъул мурадалда гьабулеб хIалтIи. 
Гьединабго кIвар кьола Шамил районалъул бетIер ХIасанов МухIамадицаги. Гумбет, ГIахьвахъ, ЛъаратIа, ЦIунтIа районазда, БежтIа участокалда буго лъикI хIалтIи гIуцIун. ГьечIо Гъуниб районалда цебе гIадаб хIалтIи. Хунзахъ район букIунаан кидаго цебесеб кьерда, гьениб къадарлъун буго хIалтIи, гьечIо беццилеб хIал Унсоколо районалдаги.
- Ниж кIалъарал бакIазда гIайиб чIвалеб буго почалъул хIалтIуде, ай заманалда щоларин газетайилан…
- Поч заманалда щоларин абун багьанаги батун, газета хъвачIого тезе бегьиларо. Нижеца щибаб районалде щибаб анкьида жаниб  щуго нухалъ  поч босун машина битIула.  Бихьизабураб заманалдаса машинаги кватIуларо. Росабалъе поч щвезабизе почалъул бухьеналъул отделение абун 13 районалда буго 80 отделение, гьенибе  поч щвезабула анкьида жаниб лъабго нухалъ. ГIицIго гьабсагIаталда нухал рахъулел ругел районазде (ЛъаратIа, ЦIунтIа) кватIизе рес буго поч. 
Нагагьлъун гIарз бугони, заманалда газета щунгутIиялъул бицун кIалъазе бегьула районалъул почазул отделениязде ва росабалъ ругел отделенияздаса кIалъазе бегьула нижехъе гьал номеразде: 55-10-47, 89034289198. Щибаб почалъул отделениялда букIуна гIарз гьабун кIалъазе бегьулеб телефон хъвараб тIехь. Гьединаб хIужа ккани, гьебсагIатго нижеца почалъул хIалтIухъанасдаса жаваб тIалаб гьабула.  Абизе ккола, гьединаб хIужа цогIаги букIинчIо. 
- Гьанже лъугIулеб буго лъагIалил кIиабилеб бащалъиялъе гьабулеб подписка. РакIалде кколищ тIоцебесеб бащалъиялъе гIадаб къадаралда цIунизе кIвелин подпискайилан?
- РакIалде ккола "ХIакъикъат" газеталъул подписка гIодобе ккечIого хутIилин. Щайин абуни, бугеб подписка "кквезе" бигьаяб букIуна. Щивав почтальонасухъ букIуна жиндирго подписчикасул сияхI, гьел щибаб рокъоре щола. 
* * *
Сапаралъ рахъиналде цебе нижеца УФПСалъулгун бухьен ккун букIана. Сапаралдаса хадубги гьенире щвана республикаялда газетал-журналал хъваялъул иш щиб хIалалда бугебали цIехезе. 
ГIемерал соназ гьений нухмалъулесул заместительлъун хIалтIулей йиго Ангелина Акбулатова. Гьелъ байбихьудасаго гIайибчIвана дагъистаниязде, хасго  интеллигенциялде ва гьадинаб хитIаб гьабуна:
- Хириял дагъистаниял! Подпискаялъул кампания гьадин къадарго унеб букIиналдаса пашманго йиго дун. 2015 соналда Россиялдаго бищун цIалулеб регион букIана нилъер республика. Гьеб соналъ нилъеца ккун рукIана цересел бакIал. Нижер хIалтIухъаби, кIодо гьарун, ахIун рукIана Москваялде.  Щиб лъугьараб гьелдаса нахъе? Пашманго йиго республикаялда бищун цIалдолел чагIи пенсионерал ругин бицине ккеялдаса.  Интеллигенциялъ подписка гьабунгутIиялдаса нечон йиго дун. Нижеца киналго муниципалиял гIуцIабазул, администрациязул бутIрузухъе, министерствабаздегун ведомствабазде кагътал ритIана жидерго коллективазда подписка гьабеян. РекIее квешаб асар лъугьинабуна нилъер интеллигенциялъул жавабалъ.  Гьезул цояс абуна подписка бугин щивав чияс рекIее бокьун гьабулеб жо ва тIадеги жубана жакъа Интернетги бугилан. 
ХIурматиял ракьцоял, кинабгIаги Интернеталъ хисуларо газета. ЦIияб газеталъ рекIее кьолеб лазат, гьелдаса чIвалеб хасаб махI... Газеталда бихьизабун букIуна нилъер республикаялъул гIумру, гьенир рукIуна къваригIунел документалгун малъа-хъваял. Кинал дагъистаниялха нилъ кколел республикаялда кколелъул интерес гьабулеб, гьелъул  гIумруялъулъ гIахьаллъулел ва республикаялъул газетал цIалулел гьечIони.  
Нужехъе хъварал кагътал рукIана рекIел хинлъи гъорлъ бугел. Гьезда рорхулел суалал гIицIго нижер суалал гурелъул, гьел руго республикаялъулго суалал. Нижее бокьун гьечIо Дагъистан нахъеккезе, бокьун буго нилъ цебесеб кьерда рукIине.  Щай Дагъистаналъул хIакъалъулъ гIицIго квешаб пикру букIине кколел? Щай жакъа Ингушетия, Чачан нилъедаса цере рукIине кколел? Гьезул подписка жакъа буго 60 проценталдасаги цIикIкIун. Дун нечон йиго нилъер гьаниб гьабураб подпискаялъул тарих рехсезе. Жакъа нилъеца планалъул  25 процентцин тIубан гьечIо.  Нилъер республикаялда гIумру гьабун вуго 3,5 млн чи, щибаб хъизаналъ цогIаги газета хъвазе кIолареб бакIалдейищха нилъ ккун ругел? Щай нилъеца нилъерго лъикIал гIадатал цIунуларел, щай нилъеца нилъерго миллиял газетал кколарел? Гьел нилъер мацIалда гурищ ругел? Гьел нилъер улбуз нилъее кьураб,  нилъеца лъималазе ирсалъе тезе кколеб бечелъи гурищ?
* * *
Дандекквеялъе цо мисалги рехсела: "Лезги газет" хъвала 9000 чияс, лезгиязул буго 5 район, щуябго районалда хъвала лъабаза-азар, кинавниги гьезул вуго  385,2 азарго чи;  нилъер газета хъвала 7200 чияс, нилъер буго 14 район, вуго 850 азарго чи.
ЗахIматаб суал буго мунго вокье, миллат бокье абун гIадан тIами. Гьедин рокьи бижизабун бажарулареблъиги лъала. Амма абичIого гIоларо нилъерго, ай дурго, дурго наслуялъул, росдал, миллаталъул тIалаб гьабеян.  Рес гьечIин абулелги камиларо, балагье сверухъ гьечIищха нужер газета хъвазе рес? Ракке бокьараб рокъоре, гьанже рес гьечIел гIадамал гьечIо - кваназеги буго, ретIинеги буго, амма рухIияб рахъ къобахъанагIан нахъекколеб буго. Газета хъвазелъун абулеб рагIи гуро, гьикъе дуцаго дур лъималазда мацI лъалищ, гьезда МахIмуд лъалищ, Расулил кечI цIалулищ, гьикъе гьезда щив кколев Шамил имам, гьикъе анкьумумузул цIарал. Щиб лъалеб нилъеда нилъерго хIакъалъулъ? Нилъ сверулел гьечIищ  магIаруллъи гъорлъ гьечIел магIарулазде. Щал нилъ мацIги лъаларел, нилъерго рухIияб хазинаги бичIчIуларел, тарихги рагIичIел, рахьдал мацIалда газета-тIехьги цIалуларел?!
Газета хъвачIогоян бадибчIваял гьарулеб мех гуро, газета хъвангутIи нилъер чорхолъа магIаруллъиялъул махI тIагIунеб букIиналъул гIаламат батилин хIинкъун руго. 
Шамсият Султанбегова

Автор: Шамсият Султанбегова

Газета №: 23, от 16. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!