Сделать домашней|Добавить в избранное
 
Главная » Спорт » Ясазул гугари
на правах рекламы

Ясазул гугари

  • Версия для печати
Добавил(а): istina от 16-06-2017, 10:58
10 июлалда Каспийскалда ГIали ГIалиевасул цIаралда бугеб спортивияб кIалгIаялъуб байбихьана эркенаб гугариялъул рахъалъ ясазул Россиялъул чемпионат.
Гьеб рагьиялъул тадбиралда гIахьаллъана ДРялъул хIукуматалъул председатель, Дагъистаналъул спортивияб гугариялъул федерациялъул председатель ГIабдусамад ХIамидов, ДРялъул бетIерасул ва хIукуматалъул администрациялъул нухмалъулев ИсмагIил Эфендиев, Россиялъул спортивияб гугариялъул федерациялъул президент Михаил Мамиашвили, ФСБРалъул тIоцевесев вице-президент ГIумар МуртазагIалиев. "Гьаб чемпионат тIобитIулеб буго Россиялъул къоялъул хIурматалда. Мурад буго киналго ясаз берцинаб ва балагьизе гъира кколеб гугари бихьизаби", - ян абуна ГIабдусамад ХIамидовас.
Гьес Михаил Мамиашвилие баркала загьир гьабуна Дагъистаналде кьолеб кIваралъухъ. "Гьадинал къецал тIоритIаралъухъ Россиялъул спортивияб гугариялъул федерациялъ нилъее тIадегIанаб къимат кьуна. Нилъеца тIобитIун ва тIадегIанаб даражаялда гIуцIун букIана Олимпиялъул хIаязда цебесеб Россиялъул чемпионат", - ан кIалъана республикаялъул хIукуматалъул председатель. Гьес юбилей баркана машгьурав гугарухъан ва тренер Юрий Шагьмурадовасдаги. 
ФСБРалъул президент Михаил Мамиашвилица республикаялъул нухмалъулезе баркала загьир гьабуна ясазда гьоркьоб гугариялъул рахъалъ тIолгороссиялъул чемпионат МахIачхъалаялда тIобитIиялъе бахъараб хIаракаталъухъ. 
"Гьаб ккола Дагъистаналъе тарихияб лъугьа-бахъин. Къецал гьанир тIоритIулел руго, щайгурелъул Олимпиялъул хIаязда гIахьаллъизе спортсменал тIасарищиялъул ва гьел хIадур гьариялъул иш гьабизе ккола Дагъистаналъул ракьалда. Дагъистаналъул гугарухъабазул гIемерал соназ билълъанхъараб бергьенлъиялъул гIадаталдаса мисал босизе ккола жакъасеб чемпионаталда гIахьаллъулел ясазги. РакIчIарав вуго, Парижалда тIобитIизе бугеб дунялалъул чемпионаталда улкаялъул вакиллъун букIине бугеб ясазул гугарухъабазул команда гIуцIизе нилъехъа бажарилин гьаб чемпионаталъул хIасилалги хIисабалде росун", - ан абуна Михаил Мамиашвилица.
Россиялъул спортивияб гугариялъул федерациялъул президентас "Дагъистан Республикаялда спортивияб гугари цебетIезабиялъе гIоло"  абурал грамотаби кьуна ДРялъул бетIер Рамазан ГIабдулатIиповасе, ДРялъул Халкъияб Собраниялъул председатель Хизри ШихсагIидовасе, ДРялъул хIукуматалъул председатель ГIабдусамад ХIамидовасе ва ДРялъул физкультураялъул ва спорталъул министр МухIамад МухIамадовасе.
Хадур рукIана улкаялъул 32 регионалдаса 120 гугарухъаналда гьоркьор хIалуцарал къецал. Россиялъул чемпионкабилъун рахъана: Дарья Лексина (48 кг, Краснодар край), Стальвира Оршуш (53 кг, Бурятия), Мария Гурова (55 кг, Москва область), Валерия Коблова (58 кг, Москва область - Санкт-Петербург), Любовь Овчарова (60 кг, Краснодар край), Валерия Лазинская (63 кг, Санкт-Петербург), Ханум Велиева (69 кг, Краснодар край), Алена Перепелкина (75 кг, Санкт-Петербург). 
Чемпионаталъул киналго призеразе кьуна ракIалдещвеялъе сайгъатал ва гIарцулал призал. ТIоцересел бакIал ккуразе  ДРялъул бетIер Рамазан ГIабдулатIиповасул цIаралдасан кьуна автомобилалги.

Автор: ФИО или фамилия и инициалы автора

Газета №: 23, от 16. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!