Сделать домашней|Добавить в избранное
 
Главная » Новости - ЦIиял харбал » Экологиялъул сон
на правах рекламы

Экологиялъул сон

  • Версия для печати
Добавил(а): istina от 13-06-2017, 09:42
Каналал къачIаялъе ва басриял хIорал цIигьариялъе федералияб бюджеталдаса биччан буго 200 млн гъурушДРялъул экологиялъул ва тIабигIиял сурсатазул рахъалъ министр Набиюла Карачаев, "Рагьараб тIалъи"  проекталда рекъон, дандчIвана СМИязул вакилзабигун. Гьебги тIобитIана "Дагъистан" РИАялда.   
Н. Карачаевас ракIалдещвезабуна Россиялъул президент Владимир Путинил амруялдалъун 2017 сон улкаялда экологиялъул лъагIеллъун лъазабун букIин. Гьеб гуребги, ДРялъул бетIер  Рамазан ГIабдулатIиповасул буюрухъалдалъун гьаб сон Дагъистаналда лъазабун буго Каспиялъул ва цогидалги лъел сурсатазул лъагIеллъун.   
Министрас бицана ахирал соназда Дагъистаналда тIабигIат цIуниялде кIудияб кIвар кьолеб бугилан. Гьесул пикруялда рекъон, гьабугьин бугониги, гьеб рахъалъ ахIвал-хIал лъалаго цебехун гирулеб буго. Гьес бицана жакъа Дагъистаналда бугила изну гьечIого хIалтIизабулеб кьишни балеб 1200-ялде гIагарун бакI. Гьезул гIемериселги ругила федералиял шагьранухазда ва поселоказда аскIоса гIебеде.  Гьез инсанасул сахлъиялъе гьабулеб заралги цIакъго кIудияб бугила, гьединлъидал гIадамал унтулел ругила батIи-батIиял унтабаз. Гьеб ахIвал-хIал лъикIлъизабиялъул мурадалда, къокъабго заманалда жаниб, МахIачхъалаялда ранила машинабазул гьакибурдуздаса ва рукIа-рахъиналъул кьишниялдаса пайда босиялъул мурадалда заводал. 
"Нижеца республика бикьана анлъго зонаялде, чIезаруна бищунго захIматал участкаби ва кумекалъе ахIана инвесторал. Гьез харжал гьарун, бакIаризе буго кьишни ва гьеб пайдаяб куцалда хIалтIизабизе буго.
Кьишниялдаса тIабигIат цIуниялъул масъала Дагъистаналда хIалуцараблъун хутIулеб буго. Командировкабаз районазде щведал дун, цадахъ районалъул бетIерги вачун, уна кьишниялъул полигоналда экологиял тIалабал цIунун ругищали балагьизе. Цо-цо районазул бутIрузда лъалебцин батуларо жидерго ракьалда кьишниялъул полигон бугеб бакI", - ан абуна министрас.
Карачаевас бицана республикаялда биологиял сурсатал цIуниялъе тIоритIулел ругел тадбиразулги. Гьес абуна Дагъистан кколин Северияб Кавказалдаго лъел рахъалъ бечедаб республика. Гьедин бугониги, нилъеца гIемер бицунила биосурсатал ва агропромышленияб комплекс цебетIезабиялъе лъел къварилъи букIиналъул. 
"Гьединлъидал, нижеца тIоритIула каналал къачIаялъе ва Каспий ралъдада сверухъ ругел басриял хIорал цIигьариялъе чара гьечIого къваригIунел тадбирал. Гьел тадбиразе федералияб бюджеталдаса биччан буго 200 млн гъуруш", - ан абуна гьес.
Министерствоялъул нухмалъулес тIадчIей гьабуна федералияб централъ рахъккун тIоритIулел проектаздаги. Гьездасан рехсана "Ак-Гель", "Муравейник", Аракумалъул хIорал цIигьарун къачIаялъул проектал.
ЧчугIил сурсатал гьарзалъизаризе ккеялъул бицунаго, министрас абуна, щибаб соналда республикаялъул  хIорахъегун гIорахъе биччалила багIараб ччугIил нус-нус миллион тIинчI. ГIемераб хIалтIи гьабулеб бугила Терек гIурумухъккун эхере ругел басриял  хIоразул магIишатал цIигьариялъе ва басриял хIорал къачIаялъе. Федералияб бюджеталдаса гьел хIалтIабазе биччанги рагIула  лъабго миллион гъуруш. 
"Республикаялда бищунго кIудияблъун кколеб Широколалъулаб ччугIил комбинаталъ щибаб соналъ гIезабизе буго  багIараб ччугIил 100 миллион тIинчI", - ан абуна Н. Карачаевас.
Министрасул кIалъаялдаса хадуб журналистаз гьесие кьуна "Ак-Гель" хIоралда сверухъ ралел ругел минабазул, Редукторнияб поселокалда, ай ралъдал рагIалда ралел минабазул, минаби ралел бакIазде пляжалдаса баччулеб бугеб салул, гьениб бугеб чороклъиялъул, районазул росабазда сверухъ, ГЭСалъул хIоразда жанибе бакIарун бугеб кьишниялъул хIакъалъулъ санагIат гьечIел гIемерал суалал. 
Гьезие жавабал кьолаго,  министрас бицана сверухъ бугеб тIабигIат чорок гьабулел ратарал чагIазе гьабулеб тамихIалъул. Гьединго абуна, щибаб муниципалияб гIуцIиялда ругила бакIалъулаб тIабигIат цIунизе тарал махщелчагIи. КъваригIун бугила щибаб районалъул ва росдал бетIерас гьел чагIи хIалтIизе тIамизе, ай жидерго муниципалиял гIуцIабазда сверухъ бугеб тIабигIат цIуниялъул масъалаялде кIвар кьезе.
Нури Нуриев

Автор: ФИО или фамилия и инициалы автора

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!