Сделать домашней|Добавить в избранное
 
Главная » Общество - ЖамгIият » Рамазан моцIалъул "хIурматалда" кванил нигIматазухъ багьаби цIикIкIинаруна
на правах рекламы

Рамазан моцIалъул "хIурматалда" кванил нигIматазухъ багьаби цIикIкIинаруна

  • Версия для печати
Добавил(а): istina от 9-06-2017, 10:16
ГIемер бицунеб буго картошка цIакъго хиралъун букIиналъул хIакъалъулъ. Гьединлъидал хIукму ккана хIакъикъат баян гьабизе. Щвана тахшагьаралъул тукабахъе ва базаразде. Шагьаралъул базаразда бичулеб Египеталъул картошкадул килограммалъул багьа буго 60-70 гъуруш, Азербайжаналъул - 60, нилъерго басрияб картошкаялъухъ 45-50 гъуруш. Нилъерго цIияб картошка анкьидаса бачIине бугин базаралдеян абуна базаралъул ричарухъабаз. 
ЦIех-рех гьабуна мадугьалихъ ругел республикабаздагун краязда бугеб ахIвал-хIалалъулги. Масала, Ставрополь краялда Египеталъул картошка 40 гъуршиде буго, жидергоябин абуни - 35 гъуршиде. Гьениб кванил нигIматазул багьа хисунго гьечIо.  
Гьединго, Ингушетиялъул хIукуматалъ Экономикияб цебетIеялъул министерствоялъул хIалтIухъабазда лъазабуна Рамазан моцIалъ кванил нигIматал хиралъизе риччагеян. Нилъер республикаялъул хIукуматалдаги ракIалде кколебани гьединаб хIукму гьабизе ва гьеб тIубаялда хадуб халкквезе...
Ингушетиялда, Рамазан моцIалъ учузлъана гьан, ччугIа, рахь ва гьуинал нигIматал. Дагьалго хиралъун руго чакар, ханжу ва макаронал. МахIачхъалаялъул базаразда, гьоркьохъеб хIисабалда, чакаралъул 50 килограммалъул хъапил багьа буго 2000 гъуруш, ханждал 50 кг хъапил - 1000-1450 гъуруш, пиринчIалъул кило - 48 гъуруш, макароназул кило - 35 гъуруш, помидоразул кило - 80-100 гъуруш, охцер - 50-60 гъуруш, порол ва ламадуралъул кило - 40 гъуруш. Амма щай гьаб куцалда картошка хиралъарабали лъазе кIвечIо.  
ДРялъул Росдал магIишаталъул министерствоялъул сайталда хъван буго исана 18 802 гектаралда бекьизе бугин картошкайин. Гьелъул бачIинги бащалъизе бугин 400000 тоннаялда.  
Гъоркьиса бакIарун буго 396000 тонна. Гьелъул 330000 тонна гурони республикаялъул гIадамазе хIалтIизабизе хIажалъуларин баян кьуна ДРялъул Росдал магIишаталъул министерствоялъ. 
Кибеха араб нилъер хурзабахъ гIезабураб картошка? Ялъуни нилъее къватIиса бачIараб гурони картошка данде кколарогойищ?
Гьел суалазе жавабал кьуна ДРялъул Росдал магIишаталъул министерствоялъул Хурдул гIезариялъул управлениялъул нухмалъулев АхIмад Расуловас. 
"Нилъерго гьаниб гIезабураб картошка цIунизе гIураб бакI гьечIо республикаялда. ЦIияб картошка баккизегIан басрияб цIунизе ккани, хIажалъула кIудиял холодильникал. КватIичIого республикаялъул югалда гIезабураб картошка бачIина бичизе. Амма аслияб къагIидаялъ республикаялда бичизе гIураб картошка бижула мугIрузул районазда. Октябрь моцIалда гурони гьебги нилъехъе щоларо. Гьединлъидал гIадамаз Египеталъул цIияб картошка босула. Гьеб хинаб бакI бугелъул, хехго бижула гьениб картошка ва Россиялда киса-кибего бичула гьеб. КъватIиса бачIунеб картошкаялъулъ бихьизабураб къадаралдаса цIикIкIун удобрение бугищали халгьабула Роспотребнадзоралъ. 
КватIун гурони барщулареб нилъерго картошка цIунизе республикаялда ралел руго хасал бакIал. Гъоркьиса бан лъугIана овощал цIунулеб бакI. Исана цоги балеб буго. Амма гьеб буго гIемераб гIарац харж гьабизе кколеб хIалтIи. 1000 тонна картошкадул цIунизе рес бугеб бакI базе ккани, хIажалъула 30-40 миллион гъуруш", - ан бицана АхIмад Расуловас.

Автор: ПатIиматзагьрат МухIамадова, ДГУялъул магистрант

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!