Сделать домашней|Добавить в избранное
 
на правах рекламы

ЛъикIал ишал

  • Версия для печати
Добавил(а): istina от 9-06-2017, 10:13
Хасавюрт районалъул Сивухъ росулъа пенсионеркаялъ жиндирго лъабго соналъул пенсия кьуна нухал рахъизе ва къачIазеАраб анкьалда Россиялъул информациялъул киналго агентствабаз  гьедин хъвалеб букIана ПатIимат СайгитмухIамадовалъул хIакъалъулъ. Киназго тамашалъи гьабулеб букIана херай гIаданалъ гIемерал соназ  бакIарараб гIарац нухде харж гьабиялда. Гьеб суалалъе жаваб балагьизелъун "ХIакъикъат" газеталъул мухбирзаби щвана Сивухъе. Росдал бегавул ГIали ГIалиевас ниж рачана ПатIимат-кIодохъе гьоболлъухъ ва гьединго росулъ гьарурал хIалтIаби рихьизе.
Росдал къисмат 

ПатIимат СайгитмухIамадова (МухIамадова) гьаюна 1933 соналда Гумбет районалъул Сивухъ росулъ. Гьелъул эмен гIумруялъго вехьлъун хIалтIана. 1944 соналъул марталда Сивухъ росулъа гIадамал гочинаруна чачаназул Ножаюрт районалъул Гендерген ва Даттах росабалъе. Сивухъ ккола Гумбет районалдаса Чачаналде гочинабураб цого-цо росу. Гьелъие гIиллалъунги рикIкIуна районалъул ва республикаялъул  нухмалъуда ва НКВДялда сахъадерил цониги хIаким вукIинчIолъи. ГьитIинаб мехалъ ПатIиматида бихьана ракъиги, къечги, колхозал гьарулаго букIараб гIакъуба-гIазабги. Гьелъ  11 сон бан букIана росу гочинабураб мехалда. 1951 соналда ПатIимат росасе ана ГIабдулатIип СайгитмухIамадовасе. КIиго соналдасан гьезие гьавуна васги. 
1957 соналда чачаназе рес кьуна ватIаналде тIадруссине, гьебго заманалда сахъал гочине ккана Хасавюрт районалде. Гьениб гIуцIана гьез гьанжесеб Сивухъ росуги. СайгитмухIамадовазул хъизамги гочана гьенибе ва хIалтIизабизе байбихьана гIурукъараб ракь. Пачалихъалъ гьезие кумек гьабулеб букIинчIо, жидецаго газа-белалъ рухъун гьаруна ракьулъ рукъзал. Хинлъиялъе хIалтIизабулеб букIана муцIи, къадал рохьулел рукIана хIатIуца. Квен хIадурулеб букIана хIатIул коразда жаниб. Корониб бакулаан тIинцIи. ТIохдаги кколаан муцIи. Хасалихъе, чвахунцIадал рараб мехалъ, рукъзал лъел цIолаан ва гьеб лъим къватIибе буххизе кколаан.  
Гьебго соналъ сахъал тIамуна "Ильичил васиятал" абун цIар лъураб колхоз гIуцIизе,  ракьал хIалтIизаризе. ЧIезарун рукIана захIматкъоялги, колхозалъул щивав членасда тIадаб букIана анлъго моцIалъ гьенив хIалтIизе. Инкар гьабуралги административияб тамихIалде цIалаан. 

ПатIиматил сахаватлъи

1964-1972 соназда "Ильичил васиятал" колхозалъе нухмалъи гьабулеб букIана ПатIиматил рос ГIабдулатIипица. Гьелдаса нахъе гьеб колхоз лъугьана районалда гуребги республикаялдаго церетIуразул цояблъун. ПатIиматил рагIабазда рекъон, гьелъул бищун кIудияб бечелъи ккола 9 лъимер, 35 лъималазул лъимер ва гьезулги 30 лъимер. Гьел щибаб къоялъ гIадин щола кIодохъе ва гьелъие кумекги гьабула.  
 - КигIан гIарац харж гьабураб нухал рахъиялъе, лъим бачиналъе ва чали къаялъе? - ян гьикъана нижеца ПатIиматида
- 200 азаргогIан гъуруш.
- Кинха дуца гьеб бакIарараб?
- Пенсиялъул гъуршал данде рехулаан. РакIалда букIана гьеб кинабго садакъаде бикьизе. Дир васият букIана, дун хведал, дида хадуб чакарги ролъги бикьейин абураб. Гьеб тIубазабизе тIадкъарав, Сириялда исламалъул институт лъугIизабурав дир яцалъул васас абуна, нухал рахъиялъе, лъим бачиналъе кьураб гIарцул гIемерго цIикIкIараб пайда букIунин, гьединаб садакъа бикьиялдаса. Щайгурелъул гьаб заманалда гIемер гьечIелъул ракъарал, ай садакъаялде ккарал  гIадамал. Гьебмехалда дицаги хIукму гьабуна нахъе лъун букIараб гIарац гьеб мурадалда харж гьабизе. 
- Нух ва кьо балел хIалтIухъабазе кигIан гIарац кьураб? 
- Гьел хIалтIана мухь босичIого. Гьенир гьединго хIалтIана дир лъималги лъималазул лъималги. 

ЖамагIаталъул газа

ПатIиматил яцалъул вас ХIасандибир ХIасандибировасул рагIабазда рекъон, гьанже цIияб нух гьабураб бакIалда букIинчIо гIадамал рилълъине бегьулеб хIал. 
"Нижеца, гьудул-гьалмагъзабигун, гIага-божаралгун цадахъ лъугьун, гьеб бакI бацIцIад гьабуна харидаса, гьенибе бана ракь, лъуна цIиял лъел рогIрал, хисана басрияб чали. Цинги нухде хъилги тIуна. Хадуб бана Хасавюрт районалъул чанго росулъе унеб бакIалда цIияб кьо, лъуна бетоналъул цIияб рогIоро.  Жеги хадубги бакIарана 60 азарго гъуруш. Гьелдаса хадуб байбихьана росулъ цIиял бакIал раялъе, къачIаялъе киназго гIарац бакIаризе.  ГьабсагIаталда гIолохъабаз гIарац данде гьабулеб буго хIухьбахъиялъул ах базе. Гьелъиеги росулъ гьарулел цогидал хIалтIабазеги  щивав чияс моцIие кьола 100 гъуруш. Цогидаз байбихьана гIадамал рилълъине тротуарал гьаризе. ГьабсагIаталда росулъ бан буго лъабго мажгит, кIиго мадраса (бихьиназулги руччабазулги), рес бугел гIадамаз къачIазе байбихьана стадион. Чанго соналъ цебе росулъа предприниматель ХIайдар ГIалиасхIабовас жиндирго сурсатаздалъун, ункъо миллион гъурушги харж гьабун, бана тазият. Цебе, квачараб заманалда, цIад балеб мехалда, къватIир эхетизе кколел рукIана бихьинал. Гьанже гьениб гьабун буго киналго санагIалъаби ругеб лъикIаб рукъ. Богучар шагьаралда гIумру гьабун вугев предприниматель Иляс МухIамадовас 100 азарго гъуршиде хисана  участковияб больницаялда лъел киналго рогIрал, сантехника. Гьединал предпринимателал росулъ гIемер руго, киналго рикIкIун хIалкIвеларо", - ян бицана ХI. ХIасандибировас ва ГI. ГIалиевас. 
2013 соналда ДРялъул хIукуматалъул квербакъиялдалъун росу бачун букIана "БацIцIадаб лъим" абураб проекталде гъорлъе. Гьекъолеб лъим чIезабиялъе харж гьабуна 72 миллион гъуруш. Жакъа къоялде киналго хIалтIаби рагIалде рахъун руго. Мини-футбол хIалеб стадион баялъе гIарац биччазе бугин абураб жиндирго рагIи ккуна хIукуматалъул председатель ХIамид ХIамидовасги. Гьес администрациялъул счеталде рехана 3 млн гъуруш. 
Исана сентябралда кIодо гьабизе буго росдае кьучI лъуралдаса 60 сон тIубаялъул юбилейги. 
Бияхъай МухIамадов 

Автор: Бияхъай МухIамадов

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!