Сделать домашней|Добавить в избранное
 
Главная » Новости - ЦIиял харбал » ЛъикIаздаса лъикIав
на правах рекламы

ЛъикIаздаса лъикIав

  • Версия для печати
Добавил(а): istina от 9-06-2017, 10:11
Спорт ва цIали, цIали ва спорт - гьеле МухIамадрасулил аслияб хIалтIиги, хIухьбахъиги, гIумругиРоссиялдасаго лъимал рачIуна Москваялде, телевидениялъул тIоцебесеб каналалдасан Максим Галкиница бачунеб "Киназдасаго лъикI" абураб теле-шоуялда жидерго гьунар-махщел бихьизабизе. Гъизилюрт районалъул Кироваулалдаса гьитIинав гугарухъан МухIамадов МухIамадрасулицаги гIахьаллъи гьабуна гьениб.  МухIамадрасулил гьунаралъ хIайран гьарурал гIадамазда  гьесул эмен, Россиялъул спорталъул мастер, Хасавюрталъул  эркенаб гугариялъул Олимпиялъул резервабазул училищеялъул тренер МухIамадов ХIасаница абуна: "Дир васас бихьизабураб гьунар буго Аллагьас гьесие кьураб сайгъат, гьесул щибабкъойилаб хIалтIул ва низамалъул хIасил", - илан.  
МухIамадрасулицайин абуни гьадин бицана: "Радал щугоялда вахъуна, цаби чурула, как бала, Къуръан цIалула, дарсал такрар гьарула, кванала ва школалде уна. Школалдаса хадуб как бала, къадекванала, тренировкабазде уна, къаси кванала, как бала, дарсал гьарула, Къуръан цIалула ва, анцIго тIубарабго, вегула", - ян. 
Гьединаб низам цIуничIони, ГIали ГIалиев гIадав, дунялалдаго цIар рагIарав гугарухъанлъун жив вахъунарин тIадеги жубана гьес.         
Россиялдаго машгьурлъарав МухIамадрасулгун дандчIвазе дун щвана Кироваул росулъе. "Киназдасаго лъикI" теле-шоуялде иналъул хIакъалъулъ гьадин бицана гьес:
- Интернеталда бугеб дир гьунаралъул хIакъалъулъ бицунеб видеороликалъухъ балагьаразул къадар миллионалдасаги тIаде ун букIана. Гьеб бихьарай "Киназдасаго лъикI" программаялда хIалтIулей Алиса Личевскаялъ ахIана кастингалде вачIайин. Останкиноялда тIобитIараб кастингалда дие кьуна мун киса, щив, гIумру гьабун кив вугев гIадал  суалал. Хадуб, жидеца мун кватIичIого передачаялде ахIизе вугинги абун, рокъове витIана. Анлъго къоялдасан ахIана хIадурлъиялъулаб репетициялде. ГIумру гьабун рукIана "Мосфильмалъул" гостиницаялда. Цо номер бахъулаго, унаан сагIаталдаса цIикIкIараб заман. Номер бахъулаго, залалъул щибаб бокIнилъ эхетун вукIуна режиссерасул кумекчи, гьес ишарабаздалъун гIодорчIаразда малъулаан кин-щиб гьабизе кколебали. Масала, гьес квер борхидал, залалда гIодорчIараз хъатчIвазе кколаан, бетIер кIибикIидал - релъизе тIадаб букIана. 
МухIамадрасулица бицана живго БагIараб майданалде щвеялъулги, цогидал лъималазулгун лъай-хъвай ккеялъулги, Галкиниде "гьужум" гьабиялъулги, ГIабдурашид Садулаевгун гугариялъулги хIакъалъулъ.  
ГьитIинав МухIамадрасулил гьунаралда  гIажаиблъарав Максим Галкиница абуна: "Гьанире рачIуна цо батIияб гьунар-махщел бугел лъимал. МухIамадрасул гIадинав анкьгьунарав дида жеги дандчIвачIо. ЦIакъ кIудияб борхалъиялде ишан босун буго гьас ва кватIичIого МухIамадрасулил цIар Россиялдаго рагIизе буго", - ян.
МухIамадрасул вуго лъикIав гугарухъан. Республикаялъул турниразда гьес щуго нухалда  тIоцебесеб бакI босана. Дагьаб цебе Агъвалиб тIобитIараб "КIиго нартав" абураб турниралдаги ккуна тIоцебесеб бакI. 
МухIамадрасулица бицана жиндир анищ бугила Олимпиялъул чемпионлъун вахъине, амма цIализе вугила минаби ралев чиясул махщалие.  
"ЛъикIаздаса лъикIав васасул" учительница Муслимат ГIисаевалъ абуна, МухIамадрасул вугила кинабго рахъ рекъарав, Аллагьас гьесие кьун бугила берцинаб куцги, черхги, берккеялда хIинкъараб гIамал-хасиятги, гьунар-махщелги. Гьев кколила бищунго лъикIав цIалдохъанги. ЦохIо магIарул мацIалъе гурони ункъил къимат гьечIила, бачIунеб цIалул соналъ гьелъиеги щуйил босизе рагIи кьун бугила гьес. 
Жинца васасе  тарбия кьолеб къагIидаялъул хIакъалъулъ ХIасан МухIамадовас гьадин бицана: "Къаси сагIат анкьго-микьго тIубаралдаса нахъе лъималги къватIир тун, рокъор хIалхьиялда чIезе кIолел эбел-инсуда гIажаиблъи гьабула дица. Рокъоб лъимадуе хIалтIи камуларо, нагагь батичIони, кIалъай гьевгун, бице, гьикъе, ругьун гьаве, расанде. Эбел-инсуда тIадаб буго гIумруялъе къваригIунебщинаб лъималазда малъизе. ГIадада заманчIвалел лъималаз гьарула къваригIел гьечIел ишал. Дир лъимал кидаго рукIуна хIалтIулел, цIалулел, пайдаяб ишалде руссун. МухIамадрасулил гьудулзабиги, гьалмагъзабиги, классцоялги, гIагарал чагIиги ккола гьев гугарулеб ургу. Спорт ва цIали, цIали ва спорт - гьеле гьесул аслияб хIалтIиги, хIухьбахъиги, гIумруги. БетIер гьечIев гугарухъанасул чемпион вахъунаро, гьединлъидал гьев цIализе ккола къаси-къалъи гьечIого". 

Нури Нуриев 

Автор: Нури Нуриев

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!