Сделать домашней|Добавить в избранное
 
Главная » Общество - ЖамгIият » ГIаданлъи, яхI-намус
на правах рекламы

ГIаданлъи, яхI-намус

  • Версия для печати
Добавил(а): istina от 9-06-2017, 09:59
ГIемер рагIула гIадамазул гIамал-хасият хисун, цоцаде бугеб адаб-хIурматалъулаб гьоркьоблъи мигьлъун, дагьлъун, цебесеб гIагарлъиялда гьоркьобцин гIаданлъигун гьуинлъи лъугIун бугин бицунеб. Гьеб кинабго кьучI гьечIеб хабар бугин абизеги кIолеб гьечIо, кигIан бокьичIониги, гьелда божизеги кколел руго. 
ГIажаиблъи гьабизе бачIуна цебе гIадамазул цоцадехун букIараб вацлъи-яцлъиялъулаб, рахIму-цIобалъулаб бербалагьи, цоцазул гьабулеб букIараб адаб-хIурмат ракIалде щвараб мехалда. 
Хунзахъ районалъул Харахьи росулъ, 1950-1960 соназда, гIумру гьабун вукIана КъурамухIамадов Хъайтмаз. Гьесул мина букIана Буйнакскалдаса Болъихъ мухъалде машинаби хьвадулеб шагьранухда аскIоб. Доб заманалда мугIрузул районазде хьвадулел машинаби цIакъ къанагIат гурони рукIунароан. 1960-абилел соназда шагьаралда цIалулел нижееги кIудияб захIмалъи букIунаан шагьаралдеги нахъеги рекIине машина щоларого. РекIине щваниги, щолаан гIицIго машинаялъул рагьараб расаялда, гьебги гIемерисеб мехалъ кьварарабги квачарабги хасалил заманалда. Гьебго заманалда, рукъалъул магIишаталъе чара гьечIого къваригIараб-тараб босизе магIарухъ ресги букIинчIого, гIадамал гьелда хадур рахъине кколаан шагьаралде, аслияб къагIидаялъ, Буйнакскалъул базаралдегун тукабазде. Харахьи росдада сверухъ буго гьитIинаб-кIудияб 8 росу. Гьел росабазул гIадамал, жидецаго босараб къайи-къоногун, рещтIине кколаан Харахьир. РещтIунеб заманги гIемерисеб мехалда букIунаан къасимех. Харахьиве щварав, гьенисаги жиндирго росулъе ине кколев  нухлуласе рес букIинчIо шагьаралдаса босараб къайи гьеб росулъ течIого. Киналгоязде гIунтIун нухлулаз къайи-цIа толаан Хъайтмазил доба. Дол соназда дунги гIемер ине ккана мунагьал чураяв инсуца сапаралдаса бачIараб къайи босизе, хIамаги цебекъотIун, Харахьиве, Хъайтмазил бакIалде. Щибаб нухалъ Хъайтмазица, нижер  къайи-цIаги мухIканго, нухда квалквал ккеларедухъ хIамида щула гьабун, дун нухарегIулаан. Гьедин гьес регIулаан жидерго къайи босизе вачIанщинав. Гьев, жиндир мунагьал чураяв Аллагьасул валиясги хъизаналъги сордо-къоялъул бокьараб ригьалда, сардилъ кьижаралъуса рахъунги къабул гьарулаан нухлулал. КватIараб заман бугони, лъелго росулъе виччачIого, радаллъизегIан кьижизе санагIатги гьабулаан. Хъайтмазил кIудияб хъизамалъ гIумру гьабулеб минаялъул рагъи-къоноги, рукъзалги, хIатта жалго регулеб рукъгицин цIун букIунаан нухлулазул къайиялъ.
Гьанже-гьанжеги гIажаиблъи гьабизе бачIуна, кин гьеб хъизамалъ моцIаз  гуреб, лъагIалабазго гьеб лазатбахъи хIехьон букIарабилан. Цоги гIажаиблъизе ккараб хIужа, Хъайтмазил лъималазги, жеги гIисинго ругел гьезул лъималазги, тIасан гали тIамун ине кколел ругониги, чияр къайиялде квер бегьулароан. Гьеле гьединаб тарбия рокъоб щвараб букIиналъин, Хъайтмазил лъабавго васги рухIияб рахъалъ бечедаллъун ва ракIбацIцIадаллъун, захIмат бокьулеллъун, кинаб хъулухъ-ишалде кканиги тIадал ишал тIуралеллъун рахъарал. Гьесул кIудияв вас, жакъа нилъгун гьечIев, КъурамухIамадица чанго соналъ гьабуна Харахьи росдал советалъул председательлъи. ВукIана росдал агьлуялъе гIоло вахъун чIарав бегавул. Гьоркьохъев вас ГъазимухIамад пенсиялде инегIан хIалтIана херехьдерил колхозалъул, хадуб совхозалъул бетIерав бухгалтерлъун. Ясбер гIадин цIунана гIаммаб магIишаталъул буголъи. РакIбацIцIадаб хIалтIуе гIоло щвана гIадамазул рахъалдаса баркалаги хIукуматалъул рахъалдаса шапакъаталги. ГьитIинав вас ХIажи, бахIараб гIумруялъ вукIана колхозалъул, совхозалъул гIи-боцIул тIалабалда. ГIемераб заманалъ мегIер-гIалахалдаги, хъутаналдаги санагIат гьечIел шартIазда боцIул тIалабалда вукIиналъ, ХIажил чорхолъе унти ккана. Амма жакъаги гьев хIикматав инсанас Харахьи росдалги, сверухъ ругел росабазулги жамагIатал рухIдаллъизе тIамула. Кинаб росулъ, лъие бугониги къварилъи ккани, хIатта каранда хахулеб лъимер накълулъаниги, гьев чара гьечIого, сундухъго балагьичIого, къварилъи ккаразухъе зигара базе уна. Гьединго хьвадула унта-щокъазухъеги. ЦIикIкIаразул адабги цIунарал, гIисиназул тIалабги гьабулел, намусги, яхIги, иманги бергьарал руго Хъайтмазил васазул лъималги. КигIанго халалъулеб бугониги, чанго  рагIи абичIого гIоларо гьесул вас ГъазимухIамадил вас МухIамадил хIакъалъулъ. 1982 соналда Дагъистаналъул мединститут лъугIизабурав МухIамад витIана Белгород областалъул Б. Валуйк шагьаралъул больницаялде хирург-травматологлъун. 1992  соналда МухIамад тIадвуссана росулъе ва тIамуна росдал больницаялъул заведующийлъун. Хъайтмазов МухIамадида бихьана больницаялъе тIадеги кабинетал, палатаби, бихьиназегун руччабазе как балел рукъзал ва гIемераб цогидабги хIажат букIин. ГIемер векерахъдана районалъул нухмалъулезухъе, СахлъицIуниялъул министерствоялде ва жеги тIадегIанал идарабазде хIалтIи гьабизе гъуршазда хадув. ЩвечIо гьесие кинабгIаги кумек. Амма гьев хьулкъотIун чIечIо. Гьудул-гьалмагъзабаздасанги божараздасанги гIураб къадаралда сурсатги тIалаб гьабун, гъеж гурун хIалтIуде жувана. ГIемераб хIалтIи гьабуна гьес больницаялда. КватIичIого гьелъул жанисебги къватIисебги рахъ тIубанго хисана. РакIалде ккола, жакъа гьединал, киналго санагIалъаби ругел, унтаразул цIикIкIараб тIалаб-агъаз гьабулел больницаби Дагъистаналъул мугIрузул районазда гIемер ратиларин. 
МухIамад Лабазанов, 
ГIоротIа росу

Автор: МухIамад Лабазанов, ГIоротIа росу

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!