Сделать домашней|Добавить в избранное
 
Главная » Культура - Маданият » ГурхIел-рахIму
на правах рекламы

ГурхIел-рахIму

  • Версия для печати
Добавил(а): istina от 9-06-2017, 09:54
Ятимго хутIарал лъимал яхI бугел, хIал бугел, букIинеселде нигат щулиял рукIунин абула. Цо-цоял жидее кьураб къисматалдаса барщун рукIуна, цогидал хIаракат бахъулел рукIуна гIумруялъго жидеего щвечIеб щвезабизе гIоло. Амма нахъасан лъилго кверчIвай гьечIел пагьмуял бесдалазул анищазул ва гьунаралъул цIа ссвинеги бегьула. Ятимазда кверчIвазе ва гьезул пагьму цебетIезабизе хIаракат бахъулеб буго "Бесдалал гьечIеб Дагъистан" жамгIияб гIуцIиялъ. 
Къисмат ва анищал

«Бесдалал гьечIеб Дагъистан» гурхIел-рахIмуялъул жамгIияб гIуцIиялъ 1-6 июналда ДРялъул Художниказул союзалъул выставкабазул залалда гIуцIана эбел-эмен гьечIел ва аутизмалъ унтарал пагьмуял лъималазул суратазул ва кверзул махщалил тIагIелазул «Дир дунял» абураб иргадулаб выставка. Исана гьеб тIобитIун букIана Лъимал цIуниялъул халкъазда гьоркьосеб къоялъул хIурматалда. 
Гьелъул мурад букIана бесдалал ва унтарал лъималазул махщел халкъалда бихьизаби, гьезул пагьму цIубазабиялъе квербакъи ва лъималазе гIарцудалъун кумек гьабизелъун гьезул хIалтIаби ричи.
Выставкаялда рукIана гьитIинал устарзабазул цIулал тIагIелалги, расанкIабиги, сураталги. Гьезухъ ралагьарал рачунел рукIана батIияб дунялалде ва гьеб букIана бесдалазул ва аутизмалъ унтарал лъималазул жидерго хасаб дунял. "Дир талихIаб хъизан", "Ургъел гьечIеб лъимерлъи", "Дир цIияб хъизан" абурал суратаздасан бихьулеб букIана талихIкъараб лъимерлъиги тIуразе захIматал анищалги. 

Рихьдае гIоло гьабуларо

Выставкаялде рачIун рукIана ДРялъул гIолилазул ишазул министр Арсен ХIажиев, ДРялъул руччабазул союзалъул председатель Интизар Мамутаева, ДРялъул Художниказул союзалъул председатель КъурбангIали МухIамадов, Избербаш шагьаралдаса жамгIиял хIаракатчагIи, цо-цо хIалтIабазул авторал ва цогидалги. ДРялъул гIолилазул ишазул министр Арсен ХIажиевас лъималазда баркана байрам ва абуна жамгIияб гIуцIиялъ гьабулеб хIалтIуе бажарараб квербакъи гьабилин. 2014 соналда тIоцебесеб нухалда гIуцIун букIараб выставкаялде вачIун вукIана ДРялъул бетIер Рамазан ГIабдулатIиповги. Гьес абун букIана  бесдал лъималаз рахъарал суратал ричун росизе тIадаб бугин щивав чиясда. Амма исана къанагIат гурони рукIинчIо суратал росулел. Республикаялъул бетIерасда берцин рихьизе гурони бесдал лъималазе кумек гьабизе къуват гьечIогойищ ругелали, бичIчIичIо. Выставка тIобитIараб щуго къоялда жаниб 292 хIалтIуда гьоркьоса 32-яб гурони бичун инчIин бицана "Бесдалал гьечIеб Дагъистан" жамгIияб гIуцIиялъул нухмалъулей Раисат ГIусмановалъ. ХIалтIабазухъ щун буго 13200 гъуруш. Щибаб сураталда яги къайи-алаталда нахъа хъван буго авторасул телефоналъул номерги цIарги. Выставкаялдаса сурат босарав чиясул рес бугоан жидеца гьабураб кумек, авторазухъе щун бугищали халгьабизе. 

"Бакъул лъимал"

Жидерго батIияб дунялалда гIумру гьабун ругел, гIемерисезда ричIчIуларел лъималазулъ батула къанагIатаб пагьмуги лъайги. КIалъазе гьунар кьечIел ва гIакълуялъул рахъалъ дагьаб хиси бугел лъималазулъ дандчIвала цогидал гIадамазулъ гьечIеб пагьму-гьунар. "Дир бакъулаб дунял" гурхIел-рахIмуялъул фондалъул бетIер, сахлъиялъул рахъалъ захIмалъаби ругел лъималазул эбел-инсул ассоциациялъул нухмалъулей Бегум БахIандовалъги хIаракат бахъулеб буго аутизм ва цогидал унтаби ругел гьитIичазда гьоркьор пагьму бугел ралагьизе. Аутизм унти бугев, ункъо сон барав Мансур Вагьабовги вукIана жинцаго рахъарал суратал эбелалда рихьизарулев. Гьесул эбел Светлана Болдыревалъ бицунеб букIана суратал рахъизе гьесул букIунеб гъираялъул хIакъалъулъ. Гьелъул щуго лъимада гьоркьоса цохIо Мансурил гурони гьечIо аутизм унти. "Дир бакъулаб дунял" абураб гурхIел-рахIмуялъул фондалъ кумек гьабула аутизм, Даунил синдром, ДЦП унти бугел лъималазе. Гьел унтаби ругел лъимал гIадамазда ричIчIуларо, гьединал лъимал тарбия щвечIеллъун ва гIакълуялъ нахъе ккараллъун тола ва гIадатиял школазде гьел цIализе росуларо. 

Рагъ хIажат гьечIо

Гъуниб, Унсоколо, Хунзахъ ва цогидалги районаздаса, Избербаш ва Южно-Сухокумск шагьараздаса батIи-батIияб ригьалъул ва гьунаралъул лъималазул хIалтIаби ракIарун рукIана выставкаялде.
Жидерго цIалдохъаналъул хIалтIабазухъ ралагьизе рачIун рукIана Хунзахъ районалъул ГIарада школалъул учительзабиги цIалдохъабиги. 15 сон барай Хадижат МухIамадовалъ рахъарал суратазул хIакъалъулъ бицана ГIарада школалъул педагог Нуцалай Хъазанбиевалъ. ГьитIинай художник жийго ругьунлъана суратал рахъизе. БатIи-батIиял машгьурал гIадамазул суратал лъун ругоан гьелъул  выставкаялда. Суратал рахъизе гуребги, кьурдуеги махщел бугин Хадижатилин бицана гьелъул учительзабаз ва эбелалъ. Дагьал церегIан къоязда гьей ва гьелъул гьалмагъзаби ана Москваялда тIобитIулеб тадбиралда гIахьаллъизе.
Выставкаялде рачIаразе асар гьабуна Сириялде арал эбел-инсул лъималаз рахъарал суратазги. Гьездасан бихьулеб букIана лъималазе рагъ хIажат гьечIеблъи, гьезие кидаго роцIараб зоб къваригIун букIин. Гьеб масъала борхун бугоан Раисат ГIусмановалъ лъималазул хIалтIабазда гьоркьоб цо бокIоналда гIуцIараб, Сириялда ругел гIадатиял гIадамазе гурхIел-рахIмуялъулаб кумек гьабиялъул фото-выставкаялда.  
"Бесдалал гьечIеб Дагъистан" жамгIияб гIуцIиялъул нухмалъулей ун йикIана Сириялда ругел ракълилал гIадамазе гурхIел-рахIмуялъулаб кумек гьабизеги. 
Россиялъул инсанасул ихтияр цIуниялъул ва гурхIел-рахIмуялъул гIуцIабазул церехъабигун цадахъ Сириялда кIодо гьабулеб эбелалъул къоялде гуманитарияб кумек щвезабизе Раисат ГIусманова щвана ХIалабалдеги ва гьенир Дагъистаналъул рахъалдаса сайгъаталги кьуна. 
ГурхIел-рахIмуялъул хIалтIи гьабизе ккани, батIи-батIиял гIадамазул кумек гьечIого гIоларо. Раисат ГIусмановагун цадахъ лъималазул суратазул выставка хIадуризе хIалтIана ДГУялъул социалияб ва юридикияб факультетазул студентал, "Благосфера" абураб гурхIел-рахIмуялъул фондалъул волонтерал. Гьединал выставкаби тIоритIулаго, кумек гьабула ДРялъул Художниказул союзалъул Выставкабазул залалъул директор ГIамирхан МухIамадовасги. 
Лъималазе кумек гьабун, суратал росизе бокьараз ахIизе бегьула Раисат ГIусмановалъул телефоналъул номералде: 89882935064.
ПатIимат СултIанмухIамадова

Автор: ПатIимат СултIанмухIамадова

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!