Сделать домашней|Добавить в избранное
 
на правах рекламы

Унтугеги лъимер

  • Версия для печати
Добавил(а): istina от 9-06-2017, 09:51
Щивав чиясул букIуна анищ, цебелъураб масъала. Цоясул анищ букIуна бечелъизе, цогидасул машгьурлъизе, лъабабилесул лъикIаб хъулухъ щвезе. Щивасул руго гьел батIи-батIиял. Амма руго нилъеда гьоркьор тIадегIанаб хъулухъги, машгьурлъиги, бечелъиги къваригIунарел, гьелъул кIварги гьечIел гIадамал. Унтуца черх кIвекIун свакаразул анищ буго сахлъараб къо бачIине.

Гьеб анищгун гIумрудул 28 сон нахъа тана остеопетрозалъ унтарав АхIмад ХIабибовасги. КIиго соналда жаниб бакIарана гьез операция гьабизе ГIизраилалде ине гIарац. Остеопетроз ккола рукьбузул унти, гьелда абула мраморалъул унтиянги, гамачIгIан къвакIарал ва цIвакарал лъугьун рукIуна гьединазул рукьби. Ва бокьараб мехалда рекизе ресги буго. Гьоориса ХIабибовазул хъизамалда васги ясги унтана ирсалъе кьолебин рикIкIунеб гьеб унтуца. Гьезул хIакъалъулъ нижеца гъоркьисаги хъван букIана. ГIумруялъ тIасаго унареб унтиги хIехьон лъимал тезе кIвечIо АхIмадилги ПатIиматилги эбел-инсуда. Ахираб кIиго соналда гьез кумек гьаричIеб ва гьел инчIеб бакI тун батиларо. Кумек гьабуна гIадатиял гIадамаз, гурхIана гIадатиял улбул, гьикъичIо гьезда нуж щиб миллаталъулин, щиб диналъулин. БатIи-батIиял гурхIел-рахIмуялъул улкаялъулго фондаздаса кумек гьарана ва остеопетроз унти бугел лъималазе кумек гьабулеб хасаб фонд батана, гьенисанги кумек щвана. ГIизраилалде операция гьабизе 1700000 гъуруш бакIарана, гьелдаса хадубги донорасул мугъзагьодил нахухъ 500000 гъуруш бакIаризе ккана. Гьале моцIгун бащдабги ана АхIмадие операция гьабуралдаса. Гьеб квешаб унти сахлъула операция гьабуралдаса нусго къо индал, гьебгиха чорхолъ кколел хиса-басиял хIехьезе унтарасда кIвани. ГьабсагIаталда АхIмад унтигун къеркьолев вуго. 
Нилъер гIадамазул гIадат буго унти бахчулеб, лъимер хвасар гьабизе гъуршал гьаризе чияхъе ине нечолеб. Гьелъиеги гIилла буго, унтараб лъимадул багьанаги батун, жидеего гIарац гьаризе рахъун ругин цо-цояз рогьо бай, сакъатлъиялъе бачIунеб пенсия гIоларогонищ ругелилан бадибчIвай гьабулеб букIин. Гьединлъидал пачалихъалъ гьабулеб гIиси-бикъинаб кумекалдаса пайдаги босун, унтарал лъималги хьихьун руго гIемерисел улбул. ХIабибоваздаги абулаан чияда гIарац гьаричIого нужерго мина-рукъги бичун щайин васасе дару-сабаб гьабуларебин. Амма Бариятица гIадахъ босичIо чIалгIаде кIалъалезул хабар. Ясалъул унти сах гьабизе бажарулареб хIалалда батун, васасегIаги гIазаб гьечIеб гIумру букIинабизе хIаракат бахъана гьелъ. 
АхIмадил суратги социалиял гьиназда лъун, гIарац бакIарулел чияр гIадамал ратиялъул хIужабиги рукIана. Гьединал яхI гьечIел гIадамал сабаблъун кумек гьабизе рес бугезги гьабичIого толеб буго, божичIого. ГIадамалги махсараде ккун гьардолел нилъеда нух-нухалдаги ратула гьединал. Амма лъикIаб ниятгун, гьабулеб садакъа битIараб бакIалде ккеледухъ цин кумек хIажатавин абулев чиясул хIакъалъулъ кинабго халгьабизе кколеб буго. Нилъер щивас гьоркьо-гьоркьоб кьураб 10 гъуршилгицин цо къоялъ гIадан сах гьавизе бажарулеб къадар гIезе бегьула. 
Гьединабго къисмат ккана ХIабибовазул гIагарлъиялъул гьитIинав Шамил МухIамадовасулги. Бащдаб лъагIалида жаниб бакIарана гьесие операция гьабизе гIураб гIарац. Гьал къоязда Шамилиеги операция гьабизе буго. 
АхIмад ХIабибовасул эбел Бариятица ва Шамил МухIамадовасул хъизаналъ жидер лъимал хвалилаб унтудаса хвасар гьаризе кумек гьабуразе баркала кьолеб буго. 
Дагъистаналда хехаб хIалалда сахгьаризе кколел ва багьа хириял дараби хIажалъулел лъимал гIемер руго. Гьезул гIемерисезе хIажат буго нилъ гIадинал гIадатиял гIадамазул кумек. Сакъатлъи ва чияр кумекалде ккей рогьо-нич гуреблъи бихьизабуна Барият ХIабибовалъ къаси-къад чIечIого Интернеталдасан васасе кумек гьарун. Цогидал унтарал гьитIичазеги сахлъиялъе гIарац бакIаризе кумек гьабуна гьелъ жиндирго васасул социалиял гьурмазда гьезул сураталги лъун. 
Унтарал лъимал расанкIабигун хIаларо, гьел кинабгIаги кумек щвечIони, дагь-дагьккун хIедучирахъал гIадин ссун уна. Унти лъараб къоялдаса нахъе жамагIаталъул бербалагьиялъ бокIнилъе ккезарун рукIуна сакъатал лъимал. Цогидал лъималгун гIадатияб школалде хьвадизе рес гьечIо сакъатазе, гьечIо нилъер республикаялда инклюзивияб школалъул кIудияб хIалбихьиги. Цо-цо гурхIел-рахIмуялъул жамгIиял гIуцIабаз ва фондаз яхI бахъулеб буго сакъатал лъимал жамагIаталда гьоркьор ругьун гьариялъе хIалтIи гьабизе. Гьединазул цояблъун ккола аутизмалъ унтараб лъимадул эбелалъ гIуцIараб "Дир бакъулаб дунял" абураб сахлъиялъул рахъалъ захIмалъаби ругел лъималазе гIадамазда гьоркьор рукIа-рахъиналъе кумек гьабулеб гурхIел-рахIмуялъулаб фонд. Гьелъул хIакъалъулъ нижеца бицине буго "ХIакъикъат" газеталъул хадусеб номералда. 

 

Сахав эмен хIажат вуго



ЧIарада районалдаса ГIумарасхIаб ЖабрагIилов коляскаялде ккана авариялдаса хадув. Гьесул мугъзагьод бекана. ГIумарасхIабил мугъзагьодалъе операция гьабун букIана МахIачхъалаялда, амма гьеб мекъи гьабун батана. Гьединлъидал гьанжеги цIидасан гьабизе кколеб буго операция. Гьеб гьабизе буго Санкт-Петербургалда. Операция нахъбахъизе бегьуларо, гьединлъидал анцIго къо гурони хутIун гьечIо ГIумарасхIаб Санкт-Петербургалде ине. ЖабрагIиловазул хъизамалъул рес гьечIо, мугъзагьод сахгьабизе хехаб къагIидаялда 150000 гъуруш балагьизе. 
Лъеберилъе вахинчIев ГIумарасхIабил буго ункъо лъимер. Гьединлъидал ЖабрагIиловазул хъизамалъ гьарулеб буго гIарац бакIаризе кумек гьабеян. ГурхIел-рахIму бугел гIадамазул кумекалдалъун ГIумарасхIабие операция гьабизе 78000 гъуруш бакIарана. Операциялъе заман дагьаб гурони хутIун гьечIелъул, гьел къоязда жаниб гIарац бакIаризе кколеб буго. Ункъо лъимадул эмен гIумруялъго коляскаялде ккеларедухъ, хIалкIвараб кумек гьабизин.  

Кумек гьабизе бокьаразе гьале
реквизитал: Сбербанк:
639002609069930361,
ГIумарасхIаб ЖабрагIилов.


Автор: ФИО или фамилия и инициалы автора

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!