Сделать домашней|Добавить в избранное
 
Главная » Ваши письма - Нужер кагътал » Почалда барабги букIуна
на правах рекламы

Почалда барабги букIуна

  • Версия для печати
Добавил(а): istina от 9-06-2017, 09:48
Къун чIезе ракIалда гьечIо
Гъоркьиса Шамил районалда "ХIакъикъат" хъварав 560 чи вукIун ватани, исана гьеб хъван буго 658 чияс  
2012 соналда Шамил районалъул ХIебда букIараб почтампги къан, гьелъул хIалтIи рехана Шамилхъалаялде. Районалъул цо-цо росабалъ къана бухьеналъул отделениялги. Жакъа районалда хутIун буго бухьеналъул почалъул 10 отделение. Гьезул цояб, райцентралда бугеб почалъул отделениялъул хIалтIулги, гьезул гIолел-гIоларел рахъазул хIакъалъулъги цIехон, нижер мухбир Сайпула ГьитIинамухIамадовас гара-чIвари гьабуна ХIебда ОПСалъул начальникасул заместитель Рамазанов Рамазанилгун.
- Рамазан, почтамт Шамилхъалаялде бахъиялда бан районалъул гIадамазе лъикIищ ккараб яги квешищ?
- Квеш ккараб жо буго 30-гIанасев чи хIалтIи гьечIого хутIи. Амма халкъалъе гьабулеб хъулухъ мукъсанлъичIо.
- Газеталгун журналал хъваялъул рахъалъ щиб хIал бугеб?
- Гъоркьисаялде дандеккун, исана подписка гьабиялъул иш районалда лъикIлъана. Гьелъие гIиллалъунги ккана Шамилхъалаялъул почтамталъул начальник районалъул бетIер МухIамад ХIасановасухъе вачIин ва подпискаялъе квербакъизе къотIи гьаби. М. ХIасановас гьеб иш тIадкъана заместитель МухIамадов Камилида. Гьезул кумекалдалъун росабазул бегавулзабаз, школалъул директорзабаз ва мажгитазул имамзабаз подписка гьабизе жигар бахъана. РехсечIого гIоларо гьеб ишалъе квербакъарал Гьандихъ росдал школалъул директор М. Гъазалиев, КъахIиса туббольницаялъул тохтурзаби ХI. МухIамадов, ГI. ГIабдурахIманов, Ругъелда росдал бегавул Гь. ГьитIинамухIамадов ва школалъул директор М. ТIайгибов, Гьолокьа М. ГIалиев, КъахIиб, ТIидиб, Бакълъухъ росабазул бухьеналъул отделениязул нухмалъулел Х. Расулова, Х. ГIабдулбутаев, Р. Будунова, ТIогьохъ росдал школалъул директор ГI. ИбрагьимхIажиев гIадиназул цIарал. Гьезул хIалтIул хIасилалда районалдаго газеталгун журналал хъвай 106 проценталъ тIубана.
"ХIакъикъат" газета хъвана 658 чияс, гъоркьиса хъван букIана 560 чияс. 
Райцентралда бугеб хIалалъул бицани, гьеб рахъалъ лъикIаб хIалтIи гьабуна райадминистрациялъ, КЦСОНалъ, Пенсиялъул фондалъ, ветуправлениялъ, УСЗНалъ, финотделалъ, райполиклиникаялъ, школалъ, ОНОялъ. Амма газетал хъваялъулъ тасамахIлъи биччалеб буго райвоенкоматалъул, подстанциялъул, сельхозбанкалъул филиалалъул, налогазул инспекциялъул хIалтIухъабаз. 
ГIицIго подписка гьабиялъул иш гуребги, нижеца почалдасан кьола медхIалтIухъабазе, учительзабазе, ветхIалтIухъабазе коммуналияб гIарац; инвалидазе, ветераназе ЕДВялъул харжал. Нижеца босула токалъухъ гIарац, ГИБДДялъ гIакIа къотIарал шоферзабазул гIакIаби. Гьединго нижехъе рачIуна халкъалъе ричизе батIи-батIияб къайи-цIа, кванил нигIматал.
- Газеталгун журналал жиндир заманалда щоларин гIарзал рукIунищ?
- Кинабго хIалтIи лъикI бугин абизе кIоларо, кин бугониги, нижеца хIаракат бахъула гIадамал разияб куцалда хIалтIизе. Амма нижеда бачIебги букIуна хIалтIулъ цо-цо гIунгутIи. БукIуна ток гьечIого компьютерал хIалтIулареб заманги газетал жиндир заманалда рачIунареб мехги. Гьелъиеги буго гьадинаб гIилла: МахIачхъалаялдаса  Шамилхъалаялде поч босун бачIунеб машина щола радал сагIат 7-8-ялда. Гьенибги 13 районалде газетал, кагътал, посылкаби рикьизе заман бала. Гьениса нижехъеги кватIула. Нижеца хIаракат бахъула районалда жаниб жиндир заманалда поч бикьун лъугIизабизе. Росабалъе поч босулел чагIазул штатал къокъ гьариялъги квалквалал ккечIого хутIуларо. ГьанжегIагар Шамилхъалаялъул почтамталъул нухмалъулевлъун тIамуна цIияв чи. Гьесги жигар бахъулеб буго мухIканго хIалтIи гьабизе. МугIрузул районазда гьоркьоб хIалтIи лъикI букIине нижееги бокьиларищха. Гьединлъидал нижецаги Шамилхъалаялъул районазда гьоркьосеб почтамталъул нухмалъулезги баркала загьир гьабулеб буго Шамил районалъул бетIер ХIасанов МухIамадие ва гьесул заместитель МухIамадов Камилие,  росабазул бегавулзабазе, имамзабазе, учреждениязул, организациязул нухмалъулезе ва жамагIатазе тIоцебесеб бащдаб лъагIалие газетал хъвазе хIаракат бахъаралъухъ. Хьулги буго хадубккунги лъикIал хIасилал рихьизарилин.
Инсудасаги васасдасаги 
рази руго 
КъобахъанагIан халкъалъул гIумру цебетIолеб бугониги Интернеталъул ва электрониял басмабазул цебетIей цIикIкIаниги, руго гIадамал, хасго росабалъ,  рохел босун вачIунев чапарасда киниги газеталгун журналал росун почтальон вачIиналъухъ балагьун чIарал. Къечедал лъехъ киниги, урхъун рукIунин газетал щвеялъухъин абула Ункъракьалъул гIадамаз. ЦIалдолезухъе гIужда газетал, кагътал ва журналал щвезари почтальоназда тIадаб иш бугелъул, гьава-бакъалъул шартIазухъ балагьичIого, гьеб иш ракIбацIцIадго тIубазабулеб буго ЦIумада районалъул Метрада, Гъоркь ва ТIад Хъваршини, Цихилахъ, Хушет росабазе хъулухъ гьабулел МухIамад ва Асвад ГIабдулаеваз. Гьале гьезул лъабго сон тIубана шагьранух гьечIел росабалъ почтальонлъун хIалтIулелдаса. Метрадаса бахъараб Хушетире щвезегIан,  лъеберго  километралъ хIамузда почги лъун, хьвадула гьел. Цебейин абуни, Ункъракьалъул росабалъе поч бачIунарого букIун, гIарзал рукIунаан. Гьанже гьеб масъала гьечIо. Гьез тIаде босаралдаса лъалаго хисана почалъул хIалтIи. Щуябго росдал жамагIатаз ва нухмалъиялъ  баркала загьир гьабулеб буго ГIабдулаевазе, нухал ва  шартIал гьечIин абун течIого, щибаб анкьалъ жидехъе цIиял харбалгун поч щвезабуралъухъ.
ХIабиб Давудов, 
ЦIумада район, Метрада росу
Почалда барабги букIуна
Цебе мугIрузул рикIкIадал росабалъе поч бачIунаан анкьида жаниб кIиго-лъабго нухалда, гьебгиха мугъзада баччун.  Цо газета камуницин ахIи-хIурги бахъинабулаан. Гьанжейин абуни, гьелъул тIалаб гьабулев чиго гьечIо. Масала, цIунтIадерил росабалъе поч баччиялъул иш хашлъун буго ва гьелъие гIиллалъунги рехсола нухал лъикI гьечIолъи. Шамилхъалаялъул почтамталде кIалъайдал, гьелъул начальникас абуна, Агъвалиса эхеде унеб нух къабул гьабун гьечIолъиялда бан, гьенисан почта битIизе жидер ихтияр гьечIин. 
Бугогури Шаури-Эчеда нух, гьенисан щай битIизе бегьуларебали лъаларо. Гьедин битIулеб бугони, нусгогIан километралъ нухги къокълъула. ХIебдаса, БежтIаса, Гьинухъ габурлъиги тун, Кидеробе ва Мокъокъибе поч щвезабулаго, кIудияб свери бахъизе ккола. ТIабигIаталъул бугеб хIалги хIисабалде босун,  ЦIунтIе почта баччизе рес буго Агъвалиса Кидиробе, ГIандигIорккун лъабкъоялда анцIго километралъул манзилалда, Гьинухъ габурлъиги жибго тун. БежтIе поч щвезабизе бегьула ЛъаратIе унеб машинаялъ. Агъвалиса щуго километралъ эхедегIан бугеб ТIисси-Ахикь росулъа ункъого сон барав гьалмагъас гьоркьо-гьоркьоб ахIула хъвараб "ХIакъикъат" бачIинчIин яги лъабго-ункъо номер цадахъго бачIунин. 
Гьайгьай, хъвараб мехалда, газета цIализеги бокьула. Амма кватIун гурони бачIунареб мехалда, ракIбуссинчIогоги хутIуларо. Гьединаб хIал букIиналъ жакъа БежтIа участкаялда ва ЦIунтIа районалда "ХIакъикъаталъул" къадар нусгоялдецин бахунаро.

ГIиса  ГIабдулаев 

Автор: ГIиса ГIабдулаев

Газета №: 22, от 9. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!