Сделать домашней|Добавить в избранное
 
Главная » Новости - ЦIиял харбал » Евразиялъул цIияб гIуцIи
на правах рекламы

Евразиялъул цIияб гIуцIи

  • Версия для печати
Добавил(а): istina от 2-06-2017, 10:41
27-28 маялда Москваялда тIобитIана Россиялъул халкъазул Ассамблеялъул VII съезд ва Евразиялъул халкъазул тIоцебесеб съездги. 1998 соналда Россиялда Рамазан ГIабдулатIиповасул жигарчилъиялда гIуцIараб гьеб жамгIияб идара нилъер улкаялъе лъугьана чара гьечIеблъун. Коммунист партиялъул кверщелги тIаса ун, халкъазул жидерго тарихги букIинесебги жедеего бокьухъе гIуцIизе лъугьараб мехалда кIудиял масъалаби раккана батIи-батIиял миллатазул мурадал дандрекъон ккезариялъулъ. Пайда дагьаб экономикаялде халкъазул жидерго букIинеселъул рахъалъ гьечIеб якъинлъиги тIадежубаялъ жамгIияталда киназулго рахIатхвезабулеб букIана. Заманалде дандекколеб миллияб политика гIумруялде бахъинаби мурадалда къабул гьабураб Концепция букIаниги, букIинчIо гьел масъалаби тIураялъе нухмалъи гьабулеб хIукуматалъулаб гIуцIиги. Гьеб кинабго тIаде ккана жамгIияб гIуцIилъун кколеб халкъазул Ассамблеялде. Абизе ккола, заманаялъ цебелъураб масъала тIубазабизе гьелъухъа бажаранилан. Гьелъ кумек гьабуна ккезе рес букIарал тунка-гIусиял гIодоцинаризе ва халкъазул цолъи цIунизе. Съездалда бицана араб 19 соналда жаниб гьабураб хIалтIул лъикIал хIасилазул хIакъалъулъ ва букIинеселда церечIарал масъалаби мухIкан гьаруна. С. Смирновалъул докладалда Россиялда Ассамблеялъул лъикI хIалтIулел гIуцIабазулъ рехсана Дагъистаналъул отделениеги.
Россиялъул халкъазул Ассамблеялъул Советалъул председательлъун нахъеги йищана политикиял гIелмабазул доктор, жамгIияй хIаракатчIужу  Светлана Смирнова. 
60 батIи-батIиял пачалихъаздаса рачIарал вакилзабазе цIакъго кIвар бугеблъун букIана Евразиялъул пачалихъазул халкъазул Ассамблеялъул тIоцебесеб съезд. Кинабниги Евразиялъ жанибе бачуна 94 улка. Гьел ккола экономикияб ва культурияб къуватги хIалбихьиги жидер бугел, дунялалдаго гIодобе биччараб, гIадамазе пайда бугеб ахIвал-хIал букIинабиялъе квербакъулел пачалихъал.
Съездалде кколеб хIадурлъи гьабиялъе гIоло араб соналдаго хIалтIизе байбихьун букIана 17 къватIисел пачалихъазул вакилзаби гъорлъе рачараб гIуцIиялъул Комитеталъ. Гьел улкабазул Ассамблея гIуцIиялъе гIиллаги ккола дунялалда рекъел цIуниялъулъ киналго халкъазул къуват  цолъизаби. 
Съездалъ церелъолел масъалаби мухIканго ричIчIизе кумек гьабуна цебесеб къоялъ тIобитIараб "РухIияб культура - халкъазул гIаммаб къадру-къимат"  абураб халкъазда гьоркьосеб конференциялда Рамазан ГIабдулатIиповас "Дунялалъул рухIияб  цIилъиялъулъ Евразиялъул цебехъанлъи" абураб темаялда гьабураб кIалъаялъ. Гьес загьир гьарурал пикраби тIолалго данделъаразе цIакъ рокьана. РухIияб бечелъи, лъай борхизаби  - гьел ккола жакъа жагьиллъиялде данде хIалтIулеб, гьелда тIад бергьенлъи босизе бажарулеб къуват. Амма нилъеца Советияб заман нахъа таралдаса байбихьун, рукIарал бергьенлъабазе дагь-дагьккун къолъикI гьабулеб буго. Масала,  гьоркьохъеб къагIидаялда цо чияс лъагIалида жаниб Франциялда цIалулеб батани лъабго тIехь, Германиялда - анкьго, СШАялда - 12, Россиялда гьезул къадар лъабго тIехьалдаса цIикIкIунеб гьечIо.  Доб заманалда дунялалда бищунго рухIияб рахъалъ цебетIун букIараб 13 тIехь цIалулеб улкаялъе гьеб буго цIакъго нахъеккей бихьизабулеб хIужа. Гьединлъидал инсанасул лъай борхизабиялъул суал Евразиялъул халкъазул Ассамблеялъ рикIкIунеб буго кIвар цIикIкIараблъун. Араб гIасруялъул 70-абилел соназ БакътIерхьул пачалихъаз гьеб рахъалъ цебехъанлъи бихьизабулаан, амма жакъайин абуни иш кколеб буго гьелъул гIаксалда - Евразиялъул улкабазул бергьенлъаби щаклъи гьечIел руго. Гьел жакъа хIадуралги руго гIумрудулъ дандчIвалел заманалъул дагIба-рагIиял тIагIинаризе ва гьезие дандрекъон кколел жавабал гьаризе. Гьеб иш гIумруялде бахъинабиялъе хIажалъула халкъазул цолъи. Араб гIасруялда киналго халкъаз жалго  жидедаго чIей  тIалаб гьабулеб букIараб батани, жакъа иш батIайиса буго: гьезие бокьун буго киназдаго бичIчIараб, цадахъаб цоцадарай букIинабизе, ай ракIчIараб кумекалъе ратизе. Евразиялъул гьеб съездалда тIадехун рехсарал 60 улкаялдаса ва Россиялдаса гIахьаллъана 3000-гIанасев делегат. Ассамблеялъе нухмалъи гьабизе вищана лъабго сопредседательги.
Съездазул къимат борхизабуна Россиялъул Президент В. Путинил баркиялъул кагъат бачIиналъги. Гьединго делегатаздехун хитIабал гьарун кагътал рачIана Россиялъул Федерациялъул Советалъул председатель Валентина Матвиенкоца, пачалихъияб Думаялъул председатель Вячеслав Володиница ва Россиялъул къватIисел улкабазулгун ишазул министр Сергей Лавровас.

Зикрула Илясов

Автор: Зикрула Ильясов

Газета №: 21, от 2. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!