Сделать домашней|Добавить в избранное
 
Главная » Медицина - Сахлъи магIарулазе » Медицинаялъул цебетIей
на правах рекламы

Медицинаялъул цебетIей

  • Версия для печати
Добавил(а): istina от 2-06-2017, 10:05

ТIолгодунялалъул  сахлъицIуниялъул идараялъул (ВОЗ) баяназда рекъон, рекIелгун бидурихьазул унтаби ккун холезул рахъалъ Россия рикIкIуна цебесеб кьерда ругел улкабазул цояблъун. Гьебго заманалда 2015 соналдаса нахъе Россия унеб буго  рекIелгун бидурихьазул унтаби сахгьариялъул рахъалъ цебетIураб анцIго пачалихъалде гьоркьобеги. ТIоцебесеб иргаялда, гьелъие гIилла буго рекIелгун бидурихьазул хирургия цебетIей, ва гьелъ унтарал сахгьариялъе, унтабазул цIех-рех гьабиялъул мурадалда, рентгенэндоваскулярниял къагIидаби хIалтIизари. Гьелъул кумекалдалъун сахгьарула рекIелгун бидурихьазул, неврологиял, ракалъул, руччабазул ва цоги батIи-батIиял унтаби. 

ДРялда дагьаб цебеги унтаразе гьеб тайпаялъул тIадегIанаб технологиялъул медицинаялъул кумек щвезего щолеб букIинчIин абизе бегьула. 2013 соналда, ахIвал-хIал лъикIлъизабиялъул мурадалда,  республикаялде ахIана А. Н. Бакулевасул цIаралда бугеб рекIелгун бидурихьазул хирургиялъул гIелмияб централъул  бетIерав профессор ГIусман МахIачев, ва гьев тIамуна Дагъистаналъул кардиологиялъул ва рекIелгун бидурихьазул хирургиялъул централъул нухмалъулевлъун. Росана цIех-рехалъе  ва сахгьариялъе къваригIунел алатал.  РекIел ишемикияб унти ва гьаруралдасаго рекIел ва бидурихьазул гIунгутIаби сахгьариялъе централъул клиникияб хIалтIулъ гIатIидго пайда босана рентгенэндоваскуляриял къагIидабаздаса. Къокъабго заманалда гьаруна тIадегIанал технологиязул кьучIалда гIемерал операциял. 2014 соналда ДГМУялъул гIелмияб советалъул хIукмуялдалъун, Дагъистаналъул кардиоцентралъул кьучIалда гIуцIана ФПКялъул ва ППСалъул рекIелгун бидурихьазул ва рентгенэндоваскулярияб кафедра. Кафедраялъул кьучIалда тIоритIула гIолохъанал тохтурзабазул лъай-махщел борхизабиялъул дарсал ва кардиологиялъул, рекIелгун бидурихьазул кIвар бугел масъалаби гIумруялде рахъинариялъул гIелмиялгун цIех-рехазул программаби. Гьединаб сахгьариялъул ва лъай-махщел кьеялъул идара цадахъ рекъон хIалтIиялъул кIвар букIуна централъул хIалтIухъабазул профессионалияб даража борхизабиялъе ва улкаялъул гражданазе тIадегIанаб технологиялъул кумек щвеялъе. Жакъа Дагъистаналъул кардиоцентр рикIкIуна тIадегIанаб даражаялда рентгенэндоваскуляриял цIех-рехал ва операциял гьарулеб клиникалъун. Кардиоцентралъул тохтурзабаз гIумруялде бахъинабуна ва жакъа бергьенлъиялда тIобитIулеб буго цIияб тайпаялъул дагьал халатал стентаздаса пайда босиялъулал операциял. (Стент ккола дандекъараб  бидурихь гIатIид гьабизе гьелда жаниб лъолеб тIеренаб маххул кварил хасаб баллон. Гьелъ рес кьола хадубккун бидурихь дандекъачIого букIиналъе). Халатаб стенталъ рес кьола, операция гьабулаго, жагъаллъи ккеялдаса цIунизе ва операциял бигьалъизаризе. Кардиоцентралъул бетIерав тохтур ГIусман МахIачевас абуна, цIияб стент бугила рекIел ишемикияб унтиялде тIадеги коронарияб артерия дандекъарал чагIазе унго-унгояб хвасарлъи. Жакъа къоялде щвезегIан гьеб букIун буго рекIел ва бидурихьазул бищунго тIибитIараб унти. 
"48 миллиметралъул халалъиялъул цIияб стенталъул кумекалдалъун бегьула цо артериялда бачIинахъего кIиго дандекъай лъугIизабизе. Цебе стент букIана 38 миллиметралъул халалъи бугеб ва кидаго гуро гьелъ къваригIараб хIасил кьолеб букIараб. Цо артериялда жаниб чанго дандекъай ва гьезда гьоркьоб кIудияб манзилги бугони, унтарасе гьабизе кколаан кIиго операция", - ян бичIчIизабуна ГI. МахIачевас. 
Цоги цIияб къагIида - бидурихьазулаб ультразвук хIалтIизаби. Гьелъул кумекалдалъун рес буго операция гьабилалде ва гьабун хадуб бидурихьазул жаниса бугеб хIал бихьизе. СКФОялда гьединал операциял тIоцере гьарулел руго. Жакъа къоялде цIиял стенталги хIалтIизарун,  Россиялдаго гьабун буго нусгоялде гIагарун операция. Жакъа Дагъистаналъул кардиоцентралъул цIар кибего рагIун буго. Клиникаялда сахгьариялда хIалтIизарулел руго киналго  рентгенэндоваскуляриял къагIидаби.  Гьелдалъун рикIкIуна, централъул нухмалъулев ГIусман МахIачевги, гьединго тохтурзаби - отделениязул заведующаял: Абакар МухIамадовги, Насрула ХIажиевги, Нариман Забитовги ва тIолабго коллективги Дагъистаналъул хIукуматалъул премиялъе мустахIикъаб бугин.
   Нури Нуриев  

Автор: Нури Нуриев

Газета №: 21, от 2. 06. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!