Сделать домашней|Добавить в избранное
 
Главная » Политика » Сессия
на правах рекламы

Сессия

  • Версия для печати
Добавил(а): istina от 26-05-2017, 10:47
Проекталъулаб нухмалъи - гьеб ккола пикру дандекколел, иш цадахъал гIадамазул ракIбацIцIадаб хIалтIи
Дагъистаналъул Халкъияб Собраниялъул  иргадулаб анлъабилеб ахIиялъул анцIабилеб сессия байбихьана фракциязул вакилзабазул кIалъаяздасан. 

Коммунистазул  вакил А. ГIумахановас жиндирго  кIалъаялда депутатазул кIварбуссинабуна Хасавюрт шагьаралъул социалиябгун экономикияб цебетIеялъулъ ругел гIунгутIабазде. Гьес  бицана  шагьаралда школал ва цогидал социалиял идараби гIолел гьечIолъиялъул ва церечIарал масъалабазул хIакъалъулъ.  
Сессиялда  "ХIукуматалъул сагIаталда" халгьабиялде босун букIана  "Пайда цIикIкIараб пачалихъияб нухмалъи" абураб республика цебетIеялъул  проект гIумруялде бахъинабиялъул  суал. 
Аслияб докладгун кIалъарай Дагъистаналъул хIукуматалъул председателасул заместитель Е. А. Толстиковалъ бихьизабуна гьеб рахъалъ гьабулеб хIалтIи ахираб заманалда, цо-цо гIунгутIаби камун гьечIониги,   хIалуцун унеб бугилан. Амма гьеб суалалда тIасан жиндирго пикру  загьир гьабуна Дагъистаналъул бетIер Рамазан ГIабдулатIиповас. Гьес кIварбуссинабуна республикаялъул хIакимзабазул бицунеб жоялдаги  гьабулеб ишалдаги   гьоркьоб кIудияб батIалъи букIиналде. "ГьадигIан берцинго кIалъазе махщел бугел гIадамалги рукIаго, щай нилъер гIумру кколеб даражаялда цебетIолеб гьечIеб?" - ан суал лъуна  гьес. "Щайгурелъул пачалихъалъул ургъел гьабуларого", -  ян жавабги гьабуна. "Проекталъулаб нухмалъи - гьеб ккола пикру дандекколел,  иш  цадахъал гIадамазул ракIбацIцIадаб хIалтIи. Амма гьебин абуни гьабулеб гьечIо", - ян тIадеги жубана республикаялъул нухмалъулес.  
ХIакъикъаталдаги, нухмалъиялъул гьеб къагIида Россиялдаго тIобитIана Дагъистаналдаса мисалги босун. Амма гьелъул хIакъалъулъцин докладазда загьир гьабичIилан бадибчIвай гьабуна гьес.
Сессиялда, лъабабилеб цIалиялда, халгьабуна "Дагъистаналда ракьалдаса пайда  босиялъул  цо-цо суалал" абураб законалъулги. Гьеб халкъалда лъай мурадалда басмаялда бахъизе хIукму гьабуна. 
РухIияб рахъ бечед гьабиялда хурхун Дагъистаналда гьабулеб кIудияб хIалтIулъ гьунаралъулал  союзазул буго хасаб кIвар ва якъинаб бутIа. Гьединлъидал  парламенталда гьоркьоб лъуна ва ахирисеб цIалиялда къабул гьабуна "Дагъистан Республикаялъул гьунарал хIалтIухъабазул ва творческиял союзазул хIакъалъулъ"  абураб, Рамазан ГIабдулатIиповасул хIаракаталдалъун  халгьабиялде босараб  законги.
Республикаялъул жакъасеб жамгIияб гIумрудулъ кIвар  бугеблъун ккола гIолеб гIелалъе  тарбия кьеялъул суалги. Гьединлъидал депутатаз  халгьабуна "Балугълъиялде рахинчIезул жамгIиял тарбиячагIазул хIакъалъулъ" абураб законалъулги. 
Сессиялда халгьабурал суалазул кIвар бугеблъун букIана депутатаз къабул гьабураб "2017 соналъул ва 2018, 2019 соназе Дагъистан Республикаялъул бюджет"  абураб законги. Гьелда рекъон, Россиялъул бюджеталдаса гIарац биччан гьарулел тадбиразулъ республикаялъул гIахьаллъи цIикIкIинаби мурадалда  тIадеги  105 млн гъуруш  кьезе бихьизабуна. 
Зикрула Илясов

Автор: Зикрула Илясов

Газета №: 20, от 26. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!