Сделать домашней|Добавить в избранное
 
Главная » Политика » Бухьенал
на правах рекламы

Бухьенал

  • Версия для печати
Добавил(а): istina от 26-05-2017, 10:40
Дунялалъул улкабазда гIемер руго гIажаибаб гIумру нахъа тарал, цогидазги мисал босизе бегьулел, бажари бугел нухмалъулел. Гьезул цояв ккола дагьал церегIан къоязда кIиабилеб нухалдаги Ираналъул президентлъун вищарав ХIасан РоухIаниги.
Гьесие гьаракь кьуна 23 млн 549 азарго чияс. ГIумруялъул 68 сон тIубарав гьесул рахъккуна Ираналъул халкъалъул  58 проценталъ.
Ираналда президент ккола хIукмаби тIуразарулел органазул бетIер. Амма хIукуматалъул  бищунго цIикIкIарал ихтиярал руго Ираналъул тIадегIанав нухмалъулесда кодор. Гьанже гьев ккола аятолла ГIали Хаменеи. Гьесул кверщаликь руго рагъулал къуваталги, судалги, пачалихъалъулаб телевидениеги, цогидал кIвар бугел идарабиги. Гьес рекъезабула  къватIисел пачалихъазулгун гьабулеб политикаги.
Рищиязда улкаялъул тIолабго халкъалъул 70 проценталдасаги цIикIкIун гIадамаз гIахьаллъи гьабиялъ бицуна Ираналда политикияб  гIумру хIалуцараб букIин. Рищиязда гьесул дандияв вукIана Ираналъул цеве вукIарав прокурор Эбрагьим Раиси. Цогидал, рищиязда гIахьаллъулел рукIарал кIигоязул щивасе щвана цо-цо миллионалде рахинчIел гьаркьал.
ХIасан РоухIани тIоцебесеб нухалъ Ираналъул президентлъун вищун вукIана  2013 соналда. Гьесул нухмалъиялда гъоркь пачалихъалда кIвана церехун кIвар бугел галаби лъезе. Дунялалъул улкабаз пикру буссинабулареб, санкциязда гъоркь бугеб ватIаналъе хIажат букIана цогидал пачалихъазул горсверуде лъугьине ва гьезулгун экономикиял, дармилал, технологиял ва гIелмиялгун маданиял бухьенал гIатIид гьаризе.
Дагъистаналъулги Ираналъулги гьоркьорлъаби байбихьана цересел гIасрабаздаго. Гьелъие нугIлъи гьабулеб буго нилъер республикаялъул ракьалда ратулел тарихиял хъвай-хъвагIаязги, археологиялъул, этнографиялъул алатазги асаразги, мацIазул хаслъиялъул хIужабазги.
Гьединлъидал Дагъистаналъул пачалихъияб университеталдаги Гиляналъул гIелмиял ва цIалул идарабаздаги гьоркьоб жакъа бугеб щулияб бухьен. КIиябго улкаялъул гIалимзабазул, вакилзабазул къокъаби хьвадула цоцахъе ва бикьула жидер бугеб хIалбихьи. Гьаб соналъул марталдагицин Кремлялда тIобитIана Россиялъул ва Ираналъул президентазул дандчIвай.
Жакъа Дагъистаналдасан унеб буго халкъазда гьоркьосеб Москва - Баку - Тегеран маххул нух. МахIачхъалаялъул ралъдал  порталъ къайи-цIа баччулеб буго Ираналъул ГIамир-Абад, Энзели, Нека, Нов Шахр портазде ва нахъе.
ГьабсагIат Россиялда  ва Ираналда гьоркьоб гIумруялде бахъинабулеб буго "гIурччинаб коридор" абураб проект. Гьеб бухьараб буго нилъер пачалихъазда гьоркьоб росдал магIишаталъул сурсатазе таможнялъул бигьалъаби рукIинариялда.
Ираналъул президентас хIаракат бахъулеб буго, рагъул къали бухичIого, ракълилаб сиясатги гIумруялде бахъинабулаго, бакътIерхьул улкабазда цадахъго батIи-батIиял пачалихъазулгун  гьоркьорлъаби лъикIлъизаризе. Амма гьелдаго цадахъ кIудияб кIваркьолеб буго Россиялъулгун, Европаялъул Экономикияб Советалъулгун гьоркьорлъаби щула гьаризеги. 
Гьединаб, кинабго рахъ хIисабалде босараб бербалагьиялъ квал-квал гьабулеб гьечIо Магърибалъулги, Россиялъулги, Китаялъулги мурадазе. 
Дагъистаналъулгун Ираналъул бухьенал щулалъулел рукIиналъе нугIлъи гьабулеб буго гъоркьиса октябрь моцIалда  МахIачхъалаялда, "Поэзиялъул театралда" Дагъистан Республикаялъул бетIер Рамазан ГIабдулатIиповасулги Россиялда вугев Ираналъул вакил Магьди Санаилги букIараб дандчIваялъги. 
Гьеб дандчIваялдаги Р. ГIабдулатIиповас бихьизабуна Россиялъул  ва Ираналъул гьоркьорлъаби хадурккунги церетIеялъе нилъер республикаялдасан унеб букIараб "Чилайдул нухалдаса" гьанжеги пайда  босиялъул кинаб кIвар бугебали ва гьединго гьес ракIалдещвезабуна Дербент щулалъиялда Ираналъул шагь Хосров Ануширван КIиабилес бараб Нарин-хъалаги нилъер гьудуллъиялъе чIагояб нугI букIин.  
Гьелдаго цадахъ нилъер республикаялъ ахирал соназда хIаракат бахъулеб буго Дагъистаналде Ираналъул инвестициязе нухал рагьизе. Гьелда бан, батIи-батIияб заманалда цоцахъе ана магIишаталъул батIи-батIиял бутIабазул вакилзабиги махщелчагIиги. Гьенирги цо-цо, кIудиял гьечIониги, галаби лъолел руго ва лъикIал хIасилазде божилъиги буго, щайгурелъул дагъистанияздехун гьеб пачалихъалъул лъикIаб бербалагьи буго. Дагьал церегIан соназда нилъер ва Иран улкабазда гьоркьоб къотIи-къай букIана нилъер гьанир Ираналъул машинаби ракIаризе завод базе.
Гьарулел ишазе квербакъулеб буго Ираналда бугеб Россиялъул дармил вакиллъиялда нилъер республикаялъул хIукуматалъул вакил хIисабалда Эмин ГIалиев вукIиналъги. 

Автор: ФИО или фамилия и инициалы автора

Газета №: 20, от 26. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!