Сделать домашней|Добавить в избранное
 
Главная » Общество - ЖамгIият » Терроралде данде
на правах рекламы

Терроралде данде

  • Версия для печати
Добавил(а): istina от 26-05-2017, 10:38
Заман тIадбуссинабизе рес бугебани, 
цабзаца ккунцин кивего виччалароан вас

РФялъул ДРялда бугеб МВДялъул УВМялъул  баяназда рекъон, Россиялда гьукъараб ИГИЛалъул кьеразулъ рагIула 1300 дагъистанияв, тIолабго Россиялдаса - 4000 чи.  
Рижараб ракьги гIагарлъиги тун арал гIолилазул улбузул ракIал киндай рукIуна?  Мекъаб нухде лъимер ккарай эбелалъул ракIбуссунадай васасдаса яги ясалдаса? Гьеб балагьалдаса нилъ цIунарал ругищ? Кин цIунилел гIолилал мекъаб нухде ккеялдаса? 
Гьел суалазе жаваб кьезе хIаракат бахъулеб буго, гIагарлъиялдаса балъго гьениве арав   ва хварав васасул хIакъалъулъ бицунаго, Красноармейск поселокалда гIумру гьабун йигей Зайнаб Идрисовалъ. 
"23 сон барав МухIамадрасул рокъоса ана 2015 соналъул 24 июналда.  Гьев унеб мехалда, дун рокъой йикIинчIо. Гьудуласул эмен хвеялда бан, зигараялъ унев вугинги абун, гьениве ун лъабабилеб къоялъ гурони ахIун бачIинчIо МухIамадрасулица. Дица гьесда абуна чияр бакIалда чанго къо базе бегьилищин, тIадвуссаян. Гьес абуна дагьалъги гьенив теян, гьогьомун  букIиналъ,  гьаниб кIал кквезеги бигьаго бугин. Гьеб букIана Рамазан моцI. Ункъабилеб къоялъ лъана цинагIалалъул васги рокъов гьечIолъи. Гьелъие ракI-макI гьабулей йикIана дунги, дир васасда цадахъ зигараялъ ун ватилин дуравгиян абун. Дида ракIалдего ккечIо васас гьереси бицинин".
КъватIисел улкабазде ине изну кьолеб паспорт МухIамадрасулие кьун буго 20 июналда. Рокъоса ун вуго 24 июналда. Зайнабида лъан гьечIо къватIисел улкабазде ине изну кьолеб паспорт васас гьабулеб букIинцин. 
"Вас къватIисеб улкаялде инехъин вукIин лъан букIарабани, дица гьев щиб гьабунги виччалароан, хIатта цабзаз ккунцин. ГIагарлъиялъ абулеб букIана вас нахъвуссун вачIунин, гьесда эбелалъул ракI къварид гьабизе кIоларин.
ГьитIинаб къоялдаса нахъе гьев дицаги дир эбел-инсуцаги хьихьана. Эмен гIемер вихьулароан. Гьединлъидал гьес диде бикьулаан ургъелги, гьересиги бицунароан, гIадамасул ракIги къварид гьабизе бокьулароан", - абун ракIалдещвезабуна Зайнабица.
Росгун ятIалъарай Зайнабица ункъо сон баралдаса нахъе жиндирго эбел-инсул рокъов хьихьана вас. Эбел хIалтIуде индалги вас вукIунаан кIодо-кIудида ва эбелалъул яцазда аскIов. ГьитIинаб къоялдасаго МухIамадрасул вукIана гIодовиччарав васлъун. Школалдаги гьес гъалмагъир гьабулароан, учительзабазул рахъалдасан гIарзалги рукIунароан. МухIамадрасулица 12 сон бараб мехалда, Зайнабил вацас гьев кьуна боксалде. КIиго-лъабго къоялъги хьвадун, тренировкабазде тIокIалъ инчIо. Гьес абулаан жив гIадамалгун вагъизе гьечIин, жинца кинабго рагIудалъун тIубалин. 
"Дица гьесда абулаан эбелалъул ракI къварид гьабугейин, мун гурони дир тIокIав чиги гьечIин. РакIалда букIана гьесие чIужу ячине, васасул лъимал хьихьизе. 
10 класс лъугIизабуна гьес. 11 классалде цIализе ине бокьичIо, хьитал гьарулеб бакIалде хIалтIизе ана. Ахирисеб кIиго моцIалъин абуни хIалтIи гьечIого хутIун вукIана. Гьев лъица къосинавуравали лъаларо, цогидазде гIайибал рехизеги бокьун гьечIо", - ян бицана чарахварай эбелалъ.
ГIиракъалъул Мосул шагьаралде МухIамадрасул ана цинагIалзабигун цадахъ. Цояв, гьесул цIаргIахьал МухIамадрасулица, чIужуги лъимерги рачана цадахъ. ГIагарлъиялда гьес абуна жив хъизамгун хIухьбахъиялъе унев вугин. 26 сон барав МухIамадрасулица балагьаб ва гIумрудул ахирисеб сапаралде цадахъ ячана хъамун ячарай лъадиги. ГIиракъалда гьелъ кIиабилев васги гьавуна. Дагьалъ цебе гьей тIадюссунги ячIана. Лъабабилес, ай МухIамадица бан букIана 22 сон. 
2015 соналъул 27 ноябралда Зайнабихъе бачIана, вас чIван вугин абураб чIегIераб хабар. Гьесда цадахъ вукIарав цинагIалалъул васас бицана Зайнабида гьеб хабарги. 
ГьитIинаб къоялдасаго МухIамадрасулица какги балаан, Къуръанги цIалулаан. Зайнабил рагIабазда рекъон, гьев мекъаб нухде ккун ватизе бегьула, Семендералъул мажгиталде хьвадизе байбихьаралдаса нахъе. 
"Хадуб лъана дида гьеб мажгиталде хьвадулел цо-цо гIолилал ихтияр цIунулез хIисабалда лъун рукIин. Дир вас МухIамадрасулги вукIун вуго хIисабалда. Киназдаго лъалеб букIун буго, амма эбел-инсуда ахиралда гурони лъачIо. Васас гьеб лъазеги толеб букIинчIо. ХIалтIудеги инчIого, 23 сон барав васасул кверги ккун, киса-киего кинха дун иней. Гьесул телефонги ноутбукги букIана. Дица кидаго гьарулаан гьесда, къваригIел гьечIел бакIазде ваккугейин, гIадамаз махсараде кквезе гурин. Лъаларо, гIолилазул бетIер сверизабулел гIадамал рукIунин абула. ЦогIаги жо гьабичIого, гIакълу хисизабичIого дир вас гьединаб ишалъулъе лъугьинароан, эбелалъул ракIбакъвазабилароан. ГIумруялда тIоцебесеб нухалда бицана гьес дие гьереси. Ниж террористал гурин, ниж туристал ругин абун махсара гьабулаан гьез нижее доре щун хадубги. Мосулалдеги щун, паспортал нахъе росараб мехалда, бичIчIана гьезда жал сундуе гIоло гьенире рачун ругелали. Доб заманалда Мосулалда кутакаб рагъ букIинчIо. Гьенире щваралдаса нахъе гьел моцIгун бащдалъ кIалъачIо. Гьел кIалъалаан, Интернет-кафеялдаса видеобухьен гьабун. Гьенир гIодорчIун ругеб мехалда гьезда нахъа чIун вихьулаан кIиго бихьинчиги. Гьел ватIаналде лъутилин хIинкъун, хадуб халккун букIараб къагIидаха. 
ИчIго къо бан буго гьез Турциялда. Гьенив вугеб мехалда васасул кIалъайцин батIияб букIана, жив цIализе унев вугин абулеб букIана гьес. Интернеталъул кумекалдалъун кIалъалагоги МухIамадрасулица абулеб букIана ургъел ккогейин, жив цIализе вугин, цIалун лъугIидал, лъабго-ункъо моцIидасан нахъвуссун вачIинин. МухIамадицайин абуни жиндирго яцалда бицун батана жалго ругеб бакIалъул хIакъалъулъ. Мосулалде щведал, гьесул ракIбуссин, рахIатхвей бихьулеб букIана. Гьениве щун дагьабго заманалдасан гьес ахIун бачIана жидеда бицараб жого батичIин гьаниб. Кинаб къотIи гьезул букIарабали лъаларо. Амма дир васасе гIарцул ургъел букIинчIо. Гьелда хадув лъугьарав чиги вукIинчIо гьев. Нужее щиб кьелин, щиб гьабилин гьез рагIи кьун букIарабин чанго нухалда дица гьикъидал, васас абуна гьеб хабар бицунгейин. Гьелдаса бичIчIулеб букIана кIалъалеб мехалда гьесда хадуб халккун букIин",- ан бицана Зайнабица.  
Жиндирго къваридаб къисматалъул бицун лъугIидал, Зайнабица абуна школалда лъималазулгун гьоркьоса къотIичIого бичIчIикьеялъулаб хIалтIи гьабизе кколин. Цо къо гьоркьоб биччачIого бицине кколин эбел-инсуцаги лъималазда квешаб рахъалде гали бегьугеян. 
"Лъималазда абизе бокьун буго, дир вас гIадин, гIадамазда божугейин.  Дие бокьун гьечIо цогидал улбузда  дида бихьараб бихьизе. Дида цо-цояз абула щай дуе гьеб къваригIарабин. Дур вас чIванин. Дирго васасул гIадинаб къисматалдаса цIунизе бокьун буго дие чияр лъималги",- ян магIу кквезе кIоларого лъугьана Зайнаб. 
Эбелги лъимерги. Рокьиги ццимги. БецIлъиги бакъги. ТалихIги талихIкъинги… ТалихIкъарай эбелалъ, кие щваниги, гьарулеб буго цоцазе хинлъи кьолеб гьеб талихIалъул бакъ хьухьикье ккезе биччагейилан.
ПатIимат СултIанмухIамадова

Автор: ПатIимат СултIанмухIамадова

Газета №: 20, от 26. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!