Сделать домашней|Добавить в избранное
 
на правах рекламы

РакIалдещвей

  • Версия для печати
Добавил(а): istina от 24-05-2017, 10:31
Лъалевги лъаларевги. Вокьулевги вокьуларевги. ВичIчIулевги вичIчIуларевги. Драматург. Журналист. Литературияв критик. Юморист. Сатирик. Хъвадарухъан. ГъазимухIамад ГъалбацIов. ЦохIо жиндиего хасиятаб ва хасаб лъалкI Дагъистаналъул адабияталда тарав. Гьанжеги гIемер бицуна ГъазимухIамадил гьесул гьудулзабаз. Унго-унгоги гIолев гьечIев куцха жакъасеб магIарул прозалъе ГъазимухIамад. Жеги-жеги зама-заманалдасан рагIула хъвадарухъанасул "Кида кьватIулел умумузул занал" абураб биценалдаса инсул зани кьватIулеб хIинкъараб гьаракь. Гьеб гурищ умумузул адаб гьабиялде нилъ куцалеб мисал? Чан гьединал биценал тарал нилъее ГъазимухIамадица. Гьесул киназго бицуна рохун, гъира-шавкъалда. Гьединав вукIунха живго ГъазимухIамадги. 
Араб шамат къоялъ хъвадарухъаби, шагIирзаби, журналистал, ГъазимухIамадил гIагарлъи, гьудул-гьалмагъзаби, хъизан-лъимал данделъун  рукIана ГIарада (бекьечIдерил хъутан) росдал гьоркьохъеб школалда. Дагъистаналъул бетIерасул указалдалъун школалъе кьуна ГъазимухIамад ГъалбацIовасул цIар.  Школалъул азбаралъуре лъугьунаго, рагIулеб букIана ГъазимухIамадил гьаракь. Гьес цIалулел рукIана жиндирго къокъал харбал. Гьеб гьаркьица цевечIезавулев вукIана чIагояв ГъазимухIамад.  Школалъул цIалдохъабаз рикIкIана росуцоясде гьарурал кучIдул. ЦIалдохъабаз гьа бана ГъазимухIамадил цIаралъе мустахIикъаллъун рукIине ва хутIизе. Цоязда хадур цоял кIалъазе рахъун ГъалбацIов ракIалдещвезавуна Дагъистаналъул Хъвадарухъабазул союзалъул председатель МухIамад АхIмадовас, ИЯЛИялъул директор МухIамад МухIамадовас, шагIирзаби Шамил МухIидиновас, Залму Батировалъ, ТубхIат Зургьаловалъ, хъвадарухъан ГIайшат ГIалиевалъ, ГIарада гьоркьохъеб школалъул директор Бика МахIмудовалъ, БакьайчIи росдал гьоркьохъеб школалъул директор ПатIимат ХIамзатовалъ, ГъазимухIамадил гIагарав чи, тохтур ва шагIир Гъайирбег ГIалиевас, ИЯЛИялъул грамматикиял цIех-рехазул отделалъул нухмалъулев МухIамад МухIамадовас ва цогидазги. ИЯЛИялъул директор МухIамад МухIамадовас школалъе сайгъат гьабуна институталъ къватIибе биччараб, ГъазимухIамад ГъалбацIовасул хIакъалъулъ профессор ЗулхIижат ХIажиевалъ хъвараб тIехь. ТIахьал щвана гьалбадериеги. Школалъул учитель ГIарапат Гьудовалъ цIалана жинцаго ГъазимухIамадиде гьабураб кечI. МухIамад АхIмадовас ва ГъазимухIамадил вац Жаватханица рагьана школалъул къадада хъвадарухъан ракIалдещвеялъе чIвараб мемориалияб хъарщи.  
Хварал чIаго рукIуна, чIагояз гьезул бицунеб бугебгIан мехалда. ЧIаго вукIина нилъее даималъего ГъазимухIамадги - гьесул цIва кунчIахъе хутIана Дагъистаналъул прозаялда. ЧIаго хутIила гьев гьудулзабазул ракIалдещвеязулъги. ЧIаго вукIина гьев гьесул яцазе, эбелалъе, хъизаналъе, лъималазе. Гьедин ахIулеб букIана гьеб къоялъ гьезул магIуялъги, вас кIодо гьавулеб тадбиралде ячIун йикIарай  пашманлъиялъ къвал барай, къварилъиялъ дагьайги къулизаюрай сабурай магIарулай, ГъазимухIамадил эбелалъги.  
13 маялда 57 сон тIубалаан ГъазимухIамад ГъалбацIовас.
ЛъугIана ГъазимухIамад ракIалде- щвезавулеб къо. ЛъугIичIо, тIагIинчIо магIарулазе гьес тараб гIажаибаб хазина - жеги чанго нухалда тIадруссина нилъ хъвадарухъанасул прозаялъул гъасде. ГIенеккаразе кIудияб асар гьабуна гьесда цадахъ хIалтIарал РГВКаялъул хIалтIухъабазул ракIалдещвеязги. 
Ана ГъазимухIамад абадияб рокъове. Гьес гIемер хIалбихьана жиндирго "Имаматгун" "Сабабгун", унтараб дуниял сахгьабизе. Щибха гьес нахъе тараб? 
Нахъе хутIана "ГIаданги. ГIамалги. Заманги".  
Ва цIидасанги рагIулеб букIанин ккола ГъазимухIамад ГъалбацIовасул гьаракь: «Ва бана гIазу…».
Шамай Хъазанбиева

Автор: Шамай Хъазанбиева

Газета №: 19, от 19. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!