Сделать домашней|Добавить в избранное
 
Главная » Медицина - Сахлъи магIарулазе » Медицинаялъул цебетIей
на правах рекламы

Медицинаялъул цебетIей

  • Версия для печати
Добавил(а): istina от 24-05-2017, 10:18
12 маялда "Дагъистан" РИАялда тIобитIараб "Рагьараб тIалъи" абураб пресс-конференциялда ДРялъул сахлъицIуниялъул министр Танка Ибрагьимовас бицана МахIачхъалаялда бараб перинаталияб центр тIоцебесеб июналда рагьизе бугин.  
"Дагъистаналда, цебеялде дандеккун, 2016 соналда улбул ва гьаруралго лъимал хвей дагьлъун буго. Перинаталияб центр рагьун хадуб гьеб къадар жеги дагьлъизабизе кIвелин абураб хьул буго. Гьеб къачIан ва хIажатаб къайиялдалъун хьезабун буго", - ян баян кьуна Танка Ибрагьимовас.
Министрас бицана, федералияб бюджеталдаса гIарацги биччан, лъималазул больницаби раялъул програмаялда гьоркьобе нилъер республикаги ккезабизе бугин. Анкьго регионалда лъималазе больницаби ралел руго гьеб программаялда рекъон. 
"Дагъистаналда лъималазул сахлъицIуниялъул идараби гIолел гьечIо, ва Россиялъул сахлъицIуниялъул министралъ рагIи кьуна федералияб кумек щвезе бугеб анкьго регионалде гъорлъе нилъер республикаги бачине. ЦохIо жо тIалаб гьабулеб буго - цIияб перинаталияб централъул лъикIаб хIалтIи. Лъималазе больница базе бакIги хIадурун буго", - ян абуна министрас.
Танка Ибрагьимовас бицана тIадегIанал технологиязул кумекалдалъун  республикаялда гьабулеб бугеб кумекалъул, 2017 соналда Дагъистаналъул медицинаялъул гIуцIабазда тIадегIанал технологиязул кумек щолезул къадар цIикIкIинабизе ракIалда букIиналъул.
"ТIадегIанал технологиязул медицинаялъул кумекалъе гIарац биччала ОМСалда рекъон, гьединго регионалдаса къватIибехунги гьабула гьелдаго рекъон кумек. Республика тун къватIирехун сахгьаризе унел ругони, нухда ва гIумру гьабизе чIараб бакIалъухъ унтарасул гIарац холеб буго. Нижеца масъала лъун буго республикаялдаги, цогидал регионаздаго гIадаб тIадегIанаб даражаялъул медицинаялъул кумек букIинабизе, дагъистаниял цогидал регионазде ине ккунгутIиялъе шартIал гIуцIизе.
2012 соналда тIадегIанал технологиязул кумекалдалъун цогIаги операция гьабун букIун батичIони, 2015 соналда гьединаб кумек гьабуна 3000 чиясе, 2016 соналда лъабазаргоялдаса цIикIкIун чиясе. Гьединал операциял гьаризе ккани, хIажалъула хасаб къайи-алат, специалистал ва федералияб централъ кьолеб лицензия. 2017 соналда гьединал операциял гьаризе ракIалда буго 4000 чиясе. Нижеда кIвана медицинаялъул гIуцIаби хасаб медицинаялъул къайиялдалъун хьезаризе ва специалистал хIадур гьаризе. Гьеб тайпаялъул щибаб гьабураб операциялъул нижеца хIисабкьола федералияб централъе. Дагъистаналда гIадин киналго регионазда гуро тIадегIанал технологиязул медицинаялъул кумек гьабулеб", - ан бицана Танка Ибрагьимовас.
ТIадегIанал технологиязул медицинаялъул кумекалде нилъер республикаялда бищунго хIажаталлъун кколел руго рекIелгун бидурихьазул хирургия, нейрохирургия, онкология, травматология, ЭКО.  
Министрасул рагIабазда рекъон, Дагъистаналда 2017 соналда ЭКО гьабизе буго 3000 чIужугIаданалъе. Дагъистаналда буго лъимер гьабулареб 19000 хъизан. ТIолабго улкаялдаго гIадин, нилъер республикаялдаги лъимал гьарулезул къадар гIодобе ккун буго. 
"Лъимал гьарулезул къадар дагьлъулеб букIинги хIисабалде босун, нижее бокьун буго ЭКО гьабиялъул кумекалдалъун лъимал гьари цIикIкIинабизе. Гъоркьисала хъизамалъул сахлъи цIуниялъул ва репродукциялъул централъ 386 ЭКО гьабун буго. Гьелъул хIасилалда 124 лъимер гьабуна. 600-гIанасеб хъизан ЭКО гьабизе республика тун къватIибе битIана", - ян бицана министрас. 
Гьал къоязда ДРялъул лъималазул клиникияб больницаялда хвараб лъимадул хIакъалъулъ социалиял гьиназда ахIи бахъинабун букIана, гьелда хадуб кколеб хъулухъ гьабичIолъиялъул гIайиб больницаялъул хIалтIухъабаздеги гIунтIизабун. Гьеб лъугьа-бахъиналъул хIакъалъулъ ДРялъул сахлъицIуниялъул министрас бицана лъимер букIанин гьабуралдасаго централияб нервабазул система ва хIухьел цIалел лугби унтараб. Лъимер гьабун буго роддомалда ва хадуб гьеб бачун буго ДРКБялде. ТIоцебесеб къоялдасаго искусственнияб къагIида хIалтIизабун хIухьел цIалеб букIана лъимералъ. ДРКБялда бараб 105 къоялъ тохтурзаби лъимадул гIумру хвасар гьабизе къеркьолел рукIана. "Тохтурзабаз гьабуна гьабизе кколебщинаб хIалтIи, эбел-инсуцаги гьезие баркала кьолеб букIана гьез гьабулеб хIаракаталъухъ. Больницаялда лъимер хвараб мехалда цIех-рех гьабичIого толаро. Гьаб ахIвал-хIалалъулги кколеб цIех-рех гьабулеб буго, хIукмуги гьабизе буго", - ян баян кьуна министрас.
Данделъиялъул хIасилал гьарулаго, сахлъицIуниялъул идарабазда ришватчилъи дандчIвани яги кинал рукIаниги гIунгутIаби рихьани, министерствоялда лъазабеян абуна Танка Ибрагьимовас. 
ПатIимат СултIанмухIамадова

Автор: ПатIимат СултIанмухIамадова

Газета №: 19, от 19. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!