Сделать домашней|Добавить в избранное
 
Главная » Культура - Маданият » Театралъул хIаракат
на правах рекламы

Театралъул хIаракат

  • Версия для печати
Добавил(а): istina от 12-05-2017, 10:40
Рагъул гIахьалчагIазул хIурматалда МагIарул театралъул 
азбаралда гIуцIун букIана байрам
Гьелда гIахьаллъана республикаялъул машгьурал кочIохъаби, "ВатIан" абураб лъималазул кьурдул ансамбль ва культураялъул хIалтIухъаби. Тадбир хIадурана МагIарул театралъулги МахIачхъала шагьаралъул собраниялъул депутатазулги хIаракаталдалъун. Концерталдаса хадуб театралда бихьизабуна "АхIун бахъинчIеб кечI" абураб драма. Гьелъул аслияб тема букIана миллияб театралъе кьучI лъурал ва КIудияб ВатIанияб рагъдаса руссинчIел актеразул къисмат рагьи.
Хунзахъ росулъ магIарул театр гIуцIулев вуго ГIабдурахIман Магаев (арт. ИсмагIилов Шамил). Гьенир хIалтIулел руго Зайнаб Набиеваги (арт. Амантулла Къебедова), ГIайшат Къурбановаги (арт. Разият Дибирова), ГъазимухIамад ХIусеновги (арт. Рамазан ГIабдулгъаниев), МухIамадхIажи Муртазаевги (арт. МухIамад ГIабдулатIипов), Дайтбег Халилбеговги (арт. ХIайбула Хасаев), Сурхай ГIалибеговги (арт. Салим Батиров). Халкъалда театралияб махщел гьуинлъизабизе къеркьолел рукIаразул ишалъе дандечIей гьабизе къеркьолев вукIуна Дайтбегил имгIал ИсмагIил (арт. ГIабдухаликъ ГIабдухаликъов). Кинабго кIоченабизе гIадин улкаялдаго унеб буго боркьараб кьалул кор. Зама-заманалда гIолохъанал артистазе малъа-хъваял гьаризе гьезухъе вачIуна ЦIадаса ХIамзатги (арт. ХIусен Казиев). 
Гьеб киналъулго пикру гьабидал, якъинго цебечIолеб буго нилъер тIоцересел актеразул бахIарчилъи. Театралияб махщел щиб жо кколебалиги гьелъул кинаб кIвар бугебалиги бичIчIулареб халкъалда гьоркьоса рахъана къиматал жавгьарал. Миллаталъул чIухIилъун рукIинаан гьел киналго, амма ватIаналъул ахIуе мустахIикъаб жаваб кьуна актераз: 31 чи ана ватIан цIунизе, ва гьезул къадруял цIарал рагъулаб тарихалда даимлъана. Шамил имамасул роль хIачIого, жив холарин нигаталда вукIарав Дайтбегги, йокьулелъе саринал ахIизе анищалда вукIарав ЧIалдаса ГъазимухIамадги, Малла Насрудинил роль хIазе тIубачIеб анищгун МухIамадхIажиги, ишцоялъулгун къадар хъвалародаян вукIарав, амма кьалда даимго хутIизе къисмат хъван батарав Сурхайги. Чан гIолилав вукIарав гьединал анищал-мурадалгун, чан эбелалъ сардилъ балъго тIураб бухIараб магIу, чан гIолилалъ, каранда бахчун, хьихьараб бакIал ургъелазул гьир. 
Ана дол рагъде. Ва рагъана бахIарчиго, сверухълъиялдаго жидер хIинкъигьечIолъиялъулги бихьинчилъиялъулги хIакъалъулъ цIар тIибитIуледухъ. ГIашикъал сариналги ахIун, аскариял-гьудулзабазул ракIбохизабуна ЧIалдаса ГъазимухIамадица. Шамил имамасул ролалда сценаялде вахъине рес ккечIониги, вахIшияв Гитлерил сипаталда солдатазулъ рокьукълъи бижизабизе жигараб хIаракат гьабуна МухIамадхIажиясги. Гьезда цадахъ спектаклязулъ гIахьаллъана рагъде арал цогидал актералги. 
Эбелалъул рекIел рухIелги (актрисаби ПатIимат ГIабасова, Зайнаб ХIамзатова), вокьулесухъ бугеб урхъигун гIишкъуги, ишцоязул къисматалъухъ угьи-зигардиги балагьаразе загьир гьабуна махщалида. ЧIагояв ХIамзатида релълъун вихьулаан ХIусен Казиевги. Цо гьесул къадруяб каламги, пахруяб чIухIиги ("Ахилчиги МухIамадги церего ана рагъде, Расулги ХIажиявги ритIизе дун хIадур вуго", - ян абула гьес), ватIаналде бугеб рокьуцаги гьелъул къисматалъул ургъалицаги рекIелъанго цокIалаб хIухьеллъун угьарал кочIол мухъал цIализе актеразухъе вачIунеб мехалда! Гьев вохула, адабиятгун маданият цебетIезабизе гьунар бугел гIолилал театралде рачIиналдасаги. ГIолохъанал актералги рачIана театралде (вукIинесев магIарул Малла Насрудин МахIмуд ГIабдухаликъовги (арт. МухIамад МухIамадов) МухIамадги (арт. МухIамадхIажи МухIамадов)), цIилъана ва чIаголъана гьелъул хIалтIиги. ГьитIинабго магIарул росулъ данделъараб къокъаялъул хIаракаталдалъун бижана ва цебетIуна миллияб театр. Ва ГIабдурахIман Магаевасул нухмалъиялда гъоркь хIалтIизе байбихьараб театралъ гъоркьиса кIодо гьабуна 80-сонилаб байрам.
Спектаклялда гIахьаллъана батIи-батIияб ригьалъул актерал - гьебги буго театр цIилъулеб букIиналъул хIужа. Сценаялда лъугьа-бахъунелъул хIасил киниги гьоркьор речIчIизарурал ясазул къокъабаз ахIулел кучIдузги ургъизе тIамулаан драмаялда тIад. БукIинчIо гьел кучIдузулъ рохел - гьел релълъун рукIана ургъалилъ тIерхьарай эбелалъул магIуялда. Гьелъги батила, гьел жеги гъваридго рортулел рукIана рекIелъе.
ТIоцебесеб нухалда спектакль бихьизабуна гъоркьиса. Исана дагьа-макъабго хиса-баси гьабун бугин ккана ракIалде. Гьеб хиса-басиялъ спектаклялъул магIнаяб рахъ камиллъизабунги, гIолилал куцаялъул, гьезие тарбия кьеялъул рахъ цIикIкIинабунги буго. Авалалдаса ахиралде щвезегIан магIилъ рукIана дир берал: рагъда гIахьаллъана дир эбелалъул кIудияв вац МухIамад, захIматалъул фронталда вукIана дир кIудада. Гьезул чIагоял сипатал, сценаялдаги эхетун, дихъ ралагьун ругеб гIадаб асар гьабулеб букIана актеразул гьунаралъ. 
Спектаклялда рихьизарулел рукIана ЦIадаса ХIамзатил "Базалай", "Айдемир ва Умайгьанат" абурал ва цогидалги пьесабазде хIадурлъулел репетициялги. Гьеб сордоялъ сценаялде вахъарав щивав артистасухъа бажарана ролалде гъорлъе ваккун, сипат лъугьинабун. Масала, "Эбел ва яс" абураб сценкаялда эбелалъул роль хIалеб букIана МухIамад ГIабдулатIиповас. Гьесул гьунар-бажариялъ цIакъ рази гьаруна театралде рачIарал гIадамал. Унтарав васасул роль махщалида хIана "Базалай" спектаклялъул бутIаялда МухIамад МухIамадовасги.  Херав ИсмагIилица абухъе, "театралда кIичIардизе" гуребги, балагь бачIараб мехалда, чIагояв кумекалъеги ратана магIарул актерал: больницаялда цIа рекIун бугилан ахIи бачIиндал, гьеб свинабизе жигар бахъарал гьезие кванил нигIматал къанагIатаб доб заманалда тIубараб буханка чадилги чакарги сайгъат гьабуна унтараз.
Рокьуе ритIухълъи цIуни, тIаде ккараб къо "лъимлъун къулчIизе" бажари, ахIулъги бодулъги цадахърахъин, бихьиназул бахIарчилъиялдаса къей гьечIеб руччабазул къуват - гьел ва цогидал темабазда тIасан къиса бихьизабуна актераз. БукIана спектаклялда халкъазул вацлъи-гьудуллъиялъул темаги: гIурус офицерасда цадахъ рагъулъ гIахьаллъула нилъер актералги. Гьеб букIана гьез тушманасде щвезабураб ахирисеб кьаби…
КIудияб Бергьенлъи босаралдаса нахъе 72 сон бана. "Амма жеги пандур гIодулеб буго…".

Кавсарат Сулейманова

Автор: Кавсарат Сулейманова

Газета №: 18, от 12. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!