Сделать домашней|Добавить в избранное
 
Главная » Медицина - Сахлъи магIарулазе » Медицинаялъул цебетIей
на правах рекламы

Медицинаялъул цебетIей

  • Версия для печати
Добавил(а): istina от 12-05-2017, 10:32
Жакъа къоялде гьабун буго тIадегIанал технологиязул 229 операция, планалда буго 
600 гьединаб операция гьабизе
ТIолгодунялалъул сахлъи цIуниялъул гIуцIиялъул (ВОЗ) баяназда рекъон, рекIел ва бидурихьазул унтаби сабаблъун холезул къадар цIакъго цIикIкIун буго. Гьебго заманалда Россия рикIкIуна рекIел ва бидурихьазул унтабазда данде къеркьеялъул рахъалъ лъикIал хIасилал рихьизарулел пачалихъазул цояблъун. ТIоцебесеб иргаялда, гьеб буго унтаби сахгьариялъе тIадегIанал технологияздаса пайда босулеб букIиналъул хIасил. Гьеб рахъалъ дагьаб цебегицин Дагъистаналда гьеб иш цIакъго нахъеккараб къагIидаялда букIана. Гьединал унтаби ругел сахгьаризе ритIулаан Россиялъул цогидал регионазде. 
Гьеб хIал лъикIлъизабиялъул мурадалда,  2013 соналда Дагъистаналъул кардиологиялъул ва рекIелгун бидурихьазул централъул нухмалъулевлъун тIамуна А. Н. Бакулевасул цIаралда бугеб рекIелгун бидурихьазул хирургиялъул гIелмияб централъул профессор ГIусман МахIачев. Гьесул хIаракаталдалъун босана хIажатаб аппаратура, ралагьана лъайги махщелги бугел хирургал ва медсестраби. ПалхIасил, къокъаб заманалда жаниб бажарана гьениб ахIвал-хIал лъикIлъизабун.                                                                                                                                                                                                            
2015 соналда рекIелгун бидурихьазул централда гьабун буго 1065 операция. Гьебго соналъ коронарография абулел гIадатиял гурел операциязул къадар 1717-ялде бахана. 2013 соналда 943 гурони гьединаб операция гьабун букIинчIо. 
Россиялдаго цIар рагIараб центрлъун лъугьана гьеб. Гьелъие нугIлъи гьабула РАНалъул академик  Лео Бокерияца централъул директор ГI. МахIачевасе "За заслуги  перед  научным центром сердечно-сосудистой  хирургии  имени А. Бакулева" абулеб медаль кьеялъги.
2013 соналда ГI. МахIачевасул цIияб командаялъ хIалтIи байбихьана централъе къваригIунел шартIал гIуцIиялдаса: тIалаб гьабуна тIадегIанал технологиязул операциял гьариялъе къваригIунеб лицензия, низамалде бачана ток, лъим, газ чIезабиялъул ва канализациялъул хIалтIаби, рукIалиде ккезабуна стерилизациялъул отделениялъул хъулухъ.     
Жакъа централъул мина сверун чIун буго 1000-ялдаса цIикIкIун гъветI, гIурччинлъиялъ ва тIугьдуз къалъизарун руго гьенире рачIунел нухал. 
2013 соналде щвезегIан Дагъистаналда гьабулеб букIинчIо эндоваскулярияб операция. 2014 соналда гьабун буго 395,  2015 соналда - 1065 операция. Гьединго цIикIкIун буго коронарографиялъул операциязул къадарги:  2013 соналда -  943, 2014 соналда -  1243, 2015 соналда - 1717. 
Ункъо соналда жаниб хIалтIизарун бажарана рекIел ва бидурихьазул хирургиялъул цIиял къагIидаби.  Республикаялда тIоцебе байбихьана стресс-эхокардиография ва чреспи-щеводалъулаб эхокардиография абулел захIматал операциял гьаризе. Жакъа гьениб камураб жо буго гьаб заманалъул алатаздалъун хьезабураб реанимациялъулаб блок. Гьелъие гIарац биччан буго ва хьул буго кватIичIого гьебги хIалтIизе байбихьилин абураб. 
ГурхIел-рахIмуялъул фондалъул кумекалдалъун, эбелалъул чохьонисаго рекIел гIунгутIаби ругел лъималазе гъоркьиса централда гьабуна   планалда букIинчIеб 129 операция. Цере гьединал лъимал улбулгун цадахъ ине кколаан Россиялъул медицинаялъул центразде. 
Гъоркьиса централда, тIоцебе республикаялда, гьабуна  рекIел бидурихьалда стентирование абулеб операция. Гьеб рикIкIуна унтарав хвалдаса хвасар гьавулеб тадбирлъун.  Реанимациялъул блок хIалтIизе биччайдал, рес букIина гьединал операциязул къадар цIикIкIинабизе.
Гьоркьохъеб захIмалъиялъул унтаразе операция гьабула нилъерго хирургаз, цIакъго захIматаб унти бугел чагIазе операция гьабизе ахIула федералияб  централдаса хирург. 
ХIалтIуда рекъарал кьола централда харжалги. Гьоркьохъеб харж: тохтурзабазул -  43535 гъуруш (2013 соналде дандеккун гьеб 95 проценталъ цIикIкIун буго), гьоркьохъел медицинаялъул хIалтIухъабазул - 23871 гъуруш, гьитIинаб  медперсоналалъул - 16760 гъуруш.
2017 соналда централъул къуват буго 515 операция гьабизе. Жакъа къоялде гьабун буго тIадегIанаб технологиялъул  229   операция, планалда буго 600 операция гьабизе. ГурхIел-рахIмуялъул фондалъул кумекалдалъун гьезул къадар цIикIкIинеги бегьула. Гъоркьиса гьабун букIана 129  операция. Исанаги гьединабго къадар гьабуни, тIадегIанал технологиязул операциязул къадар 700-ялде бахине буго. КъваригIунеб къадаралда гIарцудалъун центр хьезабулеб бугони, рес буго гьединал операциязул къадар 1000-ялде бахинабизе. Щайгурелъул централда хIалтIулел руго гьунар бугел хирургал, ДРялъул СахлъицIуниялъул министерствоялъ гьенир чIезарун руго гьаб заманалъул киналго къваригIунел алатал. 
2014 соналда ДГМУялъул гIелмияб советалъул хIукмуялдалъун, централъул базаялда гIуцIана рекIелгун бидурихьазул (ФПК ва ППС) рентгенэндоваскулярияб хирургиялъул кафедра. Гьелъул базаялда тIоритIула гIолохъанал тохтурзабазул лъай-махщел борхизабиялъул дарсал ва кардиоло-гиялда церечIарал масъалабазул гIелмиялгун цIех-рехазул программаби. Жакъа Дагъистаналъул кардиологиялъул ва рекIелгун бидурихьазул хирургиялъул центр ккола профессионалияб даражаялда бищунго захIматал рентгенэндоваскуляриял цIех-рехал ва операциял гьарулеб гьаб заманалъулаб клиника. 
Сахгьарун централдаса унел унтараз гьарурал хъвай-хъвагIаязда цIакъ лъикIаб къимат кьолеб буго медперсоналалъул хIалтIуе ва гьенир чIезарун ругел шартIазе. Киназулго рахъалъ абураблъун рикIкIине бегьула 73 сон барав АхIмадов МухIамадица гьабураб калам: "Дие лъикIаб асар гьабуна централъул хирургазул махщелалъ, медсестрабазул гурхIел-рахIмуялъ ва тIадчIараб хъулухъалъ. Киса-кибго буго лъикIаб рацIцIалъи, парахалъи, отделениязда - гьаб заманалъул алатал ва къваригIунел дараби. Гьадинаб да-ражаялда гIадамал сахгьарулеб больница Дагъистаналда цониги гьечIо. Баркала киналъухъго". 
                       Нури Нуриев

Автор: Нури Нуриев

Газета №: 18, от 12. 05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!