Сделать домашней|Добавить в избранное
 
на правах рекламы

Байрам

  • Версия для печати
Добавил(а): istina от 5-05-2017, 10:56
Цолъиялде ахIула, ихтиярал цIунизе малъула 
ТIоцебесеб маялъул къоялъ цIакъ берцинго къачIан букIана МахIачхъала шагьаралъул 
ГIурустеатралъул минаялда цебе бугеб майдан
ДРялъул профсоюзазул идарабазул цолъиялъул ва профсоюзазул рескомазул нухмалъулезул хIаракаталдалъун гьениб тIобитIана Ихдалил ва ЗахIматалъул къо кIодо гьабун данделъи.  
Гьелда гIахьаллъана ДРялъул политикиял партиязул ва жамгIиял идарабазул вакилзаби, рескомазул председательзаби, тахшагьаралъул вузазул студентал, школазул учительзаби ва цIалдохъаби, батIи-батIиял идарабазул хIалтIухъаби, гIадатиял махIачхъалаялъулал ва республикаялъул батIи-батIиял районаздаса рачIарал гьалбал.
Тадбир нухда бачана ДРялъул профсоюзазул идарабазул цолъиялъул председатель ГIабдула МухIамадовас. Гьес бицана "мустахIикъаб хIалтIухъ мустахIикъаб харж ва гIумру" абураб ахIиялда гъоркь, Россиялда гьеб байрам исана 112-абилеб нухалда тIобитIулеб бугин. "Россиялда соналдаса соналде цIикIкIунеб буго мискинзабазул къадар, гьебго заманалда гIемерлъулел руго миллиардералги. Жакъа республикаялда  бугеб гьоркьохъеб харж (19,6 азарго гъуруш) Россиялда бищун гIодобегIанасеблъун ккола. ЦIакъго мукъсанаб пенсия букIиналдалъун пенсионерал хIалтIизе кколел руго. Гьанже баянлъана ЗахIматалъул ва Финансазул министерствабазе бокьун букIин учительзабиги, медикалги, творческиял хIалтIухъабиги заман щвелалдего пенсиялде ине бугеб ресалдаса махIрум гьаризе рукIинги. Бицине нечараб хIал буго студентазе кьолеб стипендиязул ва пособиязул. Вузазул студентазул стипендия бащалъула 1300 гъуршида, колледжазул студентазул - 480 гъуршида", - ян бицана ГI. МухIамадовас.  
ДРялъул жамгIияб палатаялъул член, №9 лицеялъул директор Шамсият Насрулаевалъ абуна, жакъа цIакъ хIалуцараб хIал бугила дунялалдаго. Гьединлъидал, къваригIун бугила киналго цолъизе ва цадахъ рекъон хIалтIизе. "Нилъеца гIолеб гIелалъе битIараб тарбия кьеялда бараб буго нилъер улкаялъул бергьенлъабиги гьелъул букIинесебги", - ян абуна гьелъ.  
«Дагъавтодоралъул» профсоюзалъул комитеталъул председатель Сулейман Варачановас абуна, республикаялъул нухазул хIалтIухъаби рачIун ругила гьаб байрамалде жидецаго нухазда гьабураб  хIалтIудаса рекIелъ чIухIигун ва рохелгун.
«ГIемерисел пачалихъазда маялъул байрам тIобитIула  батIи-батIиял цIаразда гъоркь, амма гьезул буго. Киса-кибго ахIиязулъ рукIуна  «Рекъел, ЗахIмат, Май ва Цолъи» абулел рагIаби. Жакъасеб митингалъул гIахьалчагIазги такрар гьарулел руго гьел рагIаби.
Нижер профсоюзалъул идарабазулги руго гьаб митингалда церелъезе  хадусел ахIиялги тIалабалги:
Россиялъул гражданинасе мустахIикъаб хIалтIи ва мустахIикъаб харж!
ЦIигьабизин производство-дагь гьабизин хIалтIи гьечIолъи!
ХIалтIи гьечIел гIолилал - букIинесеб гьечIеб пачалихъ!
ЧIахъаги Дагъистаналъул миллатазул цолъи ва республика цебетIезабизе бугеб ният».
Митингалъул ахиралда къабул гьабуна ДРялъул профсоюзазул идарабазул цолъиялъ хIадурараб резолюция. Гьелда хъвалеб буго, митингалъул гIахьалчагIаз рахъкколила  Россиялъул президент Владимир Путиница нухда бачунеб политикаялъул. Гьелдаго цадахъ хIажат бугила гъирабазабиялъул ва компенсациялъул гIарацги гъорлъе бачинчIого, МРОТалъул роцен, гIумру гьабиялъе къваригIунеб бищунго гIодобегIанасеб харжалда бащад гьабизе. 
Митингалдаса хадуб концертгун церерахъана "Кавказ - цолъараб хъизан" абураб халкъияб творчествоялъул халкъазда гьоркьосеб форум-фестивалалде рачIарал Ставрополь краялъул, Карачаево-Черкесиялъул, Кабардино-Балкариялъул, Воронеж шагьаралъул, Ингушетиялъул, Калмыкиялъул, Крым Республикаялъул, Чачан Республикаялъул ва Дагъистаналъул творческиял коллективал ва артистал. Гьеб гуребги, тахшагьаралъул парказда ва бульваразда махIачхъалаялъулазе ва гьалбадерие тахшагьаралъул администрациялъги спорталъул, туризмалъул ва гIолилазул комитеталъги тIоритIана рекIелгъеялъулал тадбирал .
ТIоцебесеб маялъул байрамалде дагъистаниязул бугеб бербалагьиги пикруги лъазабиялъул мурадалда, нижеца цIех-рех гьабуна батIи-батIияб ригьалъул гIадамазулгун. Нижеца гьезие кьуна лъабго суал:
1. Сунца мун тIамурав советияб заманалдаго гIадатлъун лъугьараб гьаб тадбиралда гIахьаллъизе?
2. Дур пикруялда, къваригIун бугищ гIадамазе гьаб байрам, щиб гьелъ кьезе бугеб гIадатиял гIадамазе?
3. Кинал рагIабаздалъун дуца дагъистаниязда, гIага-божаразда баркилеб жакъасеб байрам ва щиб гьарилеб?
Шигьабудинов МухIамад, МахIачхъала шагьаралъул №16 школалъул директорасул заместитель:
- Гьаб буго дие цIакъ бокьулеб байрам. Гьалъ гIадамал цолъиялде, лъикIлъиялде ва захIмат бокьиялде ахIула. 
ГIадатияв чиясе рес буго байрамалъул митингалда жиндирго масъалаби тIалъиялда церелъезе ва гьел тIуразари тIалаб гьабизе. 
Киналго дагъистаниязе гьарула сахлъиги, рохелги, аваданлъиги, лъикIал харжалги.
ХIусенов ХирамухIамад, ДГУялъул профкомалъул председателасул заместитель:
- Щивав чиясда тIадаб буго гьаб байрамалда гIахьаллъизе. 
Гьаб байрамалъ гIолилал цолъизарула, ругьун гьарула жидерго ихтиярал цIунизе рахъине. 
Студентазе лъикIаб стипендия, преподавательзабазе гьединалго харжал щвей  гьарула дица. 
Ибрагьимова Ирада, ДГУялъул управлениялъул факультеталъул ункъабилеб курсалъул студентка:
- Гьаб байрамалъ цолъизарула батIи-батIияб ригьалъул гIадамал. 
Дагъистаниязда баркула дица маялъул гьайбатаб байрам. Гьарула щивасе рекъел, талихI, чIара-хьараб яшав ва гIумру. Лъималаздаса рохун улбулги таги, эбел-инсудаса чIухIун лъималги таги. 
ХIажиев Малик, бесдаллъималазул школа-интернаталъул директорасул заместитель:
- Гьаб байрамалде вачIиндал цебечIола дирго лъимерлъи. 
Школлъималазда нижеца бицуна байрамалъул хIакъалъулъ, гIадамал цолъун ругони, хIасил лъикIаб кколеблъи. Гьаб буго чIахIияз гIолилазе жидерго ихтияразе гIоло къеркьеялъе кьолеб унго-унгояб дарс. 
Нури Нуриев

Автор: Нури Нуриев

Газета №: 17, от 5 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!