Сделать домашней|Добавить в избранное
 
Главная » Образование - Лъай кьей, мактаб » ЦIуне миллат, цIуне мац!
на правах рекламы

ЦIуне миллат, цIуне мац!

  • Версия для печати
Добавил(а): istina от 5-05-2017, 10:47
ЦIуне миллат, цIуне мац!
Тарумовка районалде гьабураб сапаралдаса 
хъвай-хъвагIаял

Роржун унел цIумал, цIвабзазда хъвалел,
МоцIрода дагIнил лълъар лъуранин ккола. 
Лъаралги гIедерал гIоралги гучал, -
Гьеле дий рокьулел рорхатал мугIрул.
МагIарулазул шагIир ХIажи Гъазимирзоевасул гьал рагIабаз салам кьуна нижее, Тарумовка районалъул  Юрковка росдал школалъул азбаралъуре лъугьаралго. Гьедин хъвараб хъарщи чIван бугоан школалъул къадада. Дагьаб добегIан бакъги "щун" бугоан. Бакъул чIораз хIеренго нухбахъулеб букIана нижер ракIазулъе, ва, лъикI щваралиланги абун, ниж нухарегIана школалде жанире. ЖанахIалъуре лъугьаралго, магIарухъе щвараб гIадаб асар гьабуна - магIарул кечI-бакъанги, миллияб партал ретIарал мусудулги, бухари тIагъралги лъун магIарул кьурди гьабулел лебалал васалги, умумузул гъанситоги. Гьалеха,  магIаруллъиялъул гьадинаб берцинаб сипат цадахъ босун бугоан мугIрул тун авлахъалде рахъарал магIарулаз. 
МагIарул мацIалъул байрамалде рачIун рукIана районалъул школазул магIарул мацIалъул учительзаби, школазул директорал, лъайкьеялъул управлениялъул хIалтIухъаби ва мацIги миллатги хириял магIарулалги. Байрам байбихьана школалъул магIарул мацIалъул учитель Марзият МухIамадовалъул дарсидаса. Бахиллъана учителалъулги цIалдохъабазулги гьудуллъиялда, гьез бицунеб магIарул мацIалда. Школалда цIалулев вугев 250 цIалдохъанасда гьоркьоса 200-яв вуго магIарулав, хутIарал - гIурусал, даргиял, лъарагIал. ХIикмалъизе ккараб хIужа гьечIищха - рокъове айилан витIаниги, магIарул мацIалъул дарсидаса камулев гьечIо Ваня. Гьединго дарсазде рачIунел руго даргиялги лъарагIалги. МагIарулаз гIадин бицунеб букIана гьез жидее чияраблъун кколеб мацI. Школалъул директор Паризат МухIамадхIажиевалъ бицана рахьдал мацIалдехун жидерго бугеб адабалъулаб бербалагьиялъул.
Байбихьана байрамалъул аслияб бутIа. Ниж гьоболлъухъ щвана умумузул гъасде, магIаруллъиялъего салам кьуна цIалдохъабаз рикIкIарал ва ахIарал кучIдуз.
- Эбелалъ тIоцебе гьабураб лъимер 
ВатIаналъ тIоцебе кодой бачуна.
Гьеб букIана ВатIаналъул хIакъалъулъ бицунеб бутIаялъул аслияб пикру. 
Байрамалъул кIиабилеб бутIа сайгъат гьабун букIана киназулго талихIалъул аслияб гIаркьел - эбелалъе.
- Эбел, дида ккола киналго тIугьдул
Дур гьимиялдасан гьарун ратилин.
Лъималаз гьарулеб букIана жал гьеб талихIалдаса махIрум гьаругейилан - эбелалъ рахьдал мацIалда ахIулеб кинидахъ кечIалъ цIунизе бугин бабал талихIаб гьимийилан ахIулеб букIана гьез. 
Лъабабилеб бутIаялда бицана бабал гьимиги, лъималазул талихIги, ватIаналъул бакъги цIунарал советиял солдатазул хIакъалъулъ. ХъахIал къункърабазул ахIиялъги, васасухъги, росасухъги, вацасухъги тIолеб чIужугIаданалъул тIухьигIан бакIаб магIуялъги ракIалде щвезаруна вахIшияб рагъул захIматал къоялги ругъналги. 
Кинха хIайранлъиларел миллаталъул букIинесеб кодоб бугел гьел гьайбатал лъималазда. Кинха божилей мацI тIагIинехъин бугин абураб хIинкъиялдаги! МагIарул мацIалъул учительзабазул ассоциациялъул нухмалъулей Баху МухIидиновалъ, магIарулазул автономиялъул нухмалъулев Маркъо ШагIбановас, шагIир ТубхIат Зургьаловалъ, МахIачхъалаялъул №№ 11 ва 39 школазул учительзаби Шамай Хъазанбиевалъ ва ПатIимат  МухIамадовалъ  кIудияб гъира-шавкъалда, лъималаздаги лъималазул улбуздаги, тIубараб росдадаго бахиллъун, рухIдаллъун бицана умумузул гъасда жидеда батараб хинлъиялъул, гвангъиялъул. Гьединго кIалъазе рахъана данделъиялде рачIун рукIарал районалъул школазул директорзабиги. 
ТIадюссун ячIунелъулги пикрабаз рахIат толеб букIинчIо:
- Унго, лъугIиладай ракьалдаса магIаруллъиялъул сипат, букъиладай ракьулъ миллаталъул мацI... ТIагIинадай  тIубанго эбелалъул кочIол магIна. ЦIумаз тIавап гьабулел мугIрузул тIогьазги,  чвахун гIодоре унел тIокIкIарал иццазги, иццалгIан рацIцIадал магIарулазги ахIулел хIайранал кучIдузул магIна билиладай?!

Автор: ФИО или фамилия и инициалы автора

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!