Сделать домашней|Добавить в избранное
 
Главная » Общество - ЖамгIият » Газеталъул юбилеялде
на правах рекламы

Газеталъул юбилеялде

  • Версия для печати
Добавил(а): istina от 5-05-2017, 10:45
ГIасру тIубанин абун, 
бетIер хъахIлъулеб гьечIо…
Салатавиялъги баркана "ХIакъикъаталда" байрам 
Казбек районалъул ракьалде ниж, газеталъул хIалтIухъаби Кавсарат Сулейманова, Шамай Хъазанбиева, Забида ГIабдулаева, Темирхан ХIасанов щолаго, дандего бортун бачIараб тIабигIаталъул берцинлъиялъ хIайран гьаруна. ГIурччинаб гIидраги, тIугьдулги, тIугьдул реэдулеб бугеб недегьаб гьуриги, гьороде данде гьелчелеб бугеб гIурччинхерги, харилъ расандилел ругел рухIчIаголъабиги - гьеб киналъго бицунеб букIана Салатавиялда их некIого рещтIанилан. Нижерги кIудияб гъира букIана, ракIалги рохалил цIун рукIана, миллаталъул газета хириял магIарулаз гьоболлъухъ ахIун унел ругелъул. Нижеда дандчIвай гьабуна Дилим росдал клубалда. Клубалъул жанахIалъуре лъугьаралго, берчIвана газеталъул гIумруялъул бицунеб выставкаялда. Байрам гIуцIун бугоан Дилималъул лицеялъул учительзабаз ва цIалдохъабаз.
Байбихьана "ХIакъикъаталъул" рорхалъаби" абураб литературиябгун музыкалияб композиция. Тадбир нухда бачунел лицеялъул магIарул мацIалъул учительзаби Зугьра Загьировалъ ва Марижат МухIамадрасуловалъ бицана газеталъул тарихалъул, магIарулазул гIумруялъулъ жакъаги гьелъ кколеб бакIалъул. ЦIалдохъабаз рикIкIана, ахIана, цIалана газеталде гьарурал кучIдул, рихьизаруна учительзабаз хъварал спектакляздаса сценкаби. Байрамалда рагIулеб букIана магIарул унго-унгояб калам. Гьелъулъ букIана гIагараб миллаталъул гIадатаздеги гIамалаздеги кIудияб рокьи. Лицеялъул директор Язрапат Юсуповалъ бицана магIарул мацIалъул дарсал кьеялъе чIезарун ругел шартIазул, кIудияб адабалда ва хIурматалда рехсана тадбир хIадурарал учительзабазул цIарал: Зугьра Загьирова, Марижат МухIамадова, ПатIимат МухIамадаминова, Марям ГIалиукаева, Зайнаб Хадаева. Газеталъул рахъалдасан Кавсарат Сулеймановалъ гьезие кьуна Баркалаялъул кагъталги шапакъаталги. Гьединго Кавсаратица бицана газеталъулги магIарул мацIалъул учительзабазулги бугеб бухьеналъул. КIвар кьуна гьеб бухьен дагьабги щула гьабизе ккеялде, бицана газеталъ цIалдохъабазда гьоркьор тIоритIулел конкурсазул. Масала, лъазарун руго "ХIакъикъат" газеталъ дир гIумруялъулъ кколеб бакI", "Дир магIарул мацI" абурал темабазда конкурсал. ЦIалдохъабаз хъвазе ккола  сочинениял яги кучIдул. Гьединго июль моцIалъул ахиралде щвезегIан лъазабун буго имам Шамил гьавуралдаса 220 сон тIубаялъул хIурматалда конкурс. Гьел конкурсазда лицеялъул цIалдохъабазулги букIине ккелин гIахьаллъиян абуна МахIачхъалаялъул №11 гимназиялда магIарул мацI кьолей Шамай Хъазанбиевалъ. Гьелъ бицана шагьаралъул лъималазда, рахьдал мацI малъулелъул, дандчIвалел захIмалъабазул, магIарул мацIалъул  учителасе "ХIакъикъат" газеталъул бугеб кумекалъул. Газеталъ жиндирго гIумруялъулъ ва творчествоялъулъ кколеб бакIалъул бицана шагIир, Хасавюрталда магIарул мацIалда къватIибе биччалеб "НасихIат" газеталъул редактор Париза Гереевалъ. ШагIиралъул кучIдузе роржен тIоцебе "ХIакъикъаталъ" кьун буго. Гьелъул жакъаги буго газеталъулгун бухьенги гьудуллъиги. Берцинал рагIабаздалъун газеталда ва магIарулазда миллияб байрам баркаразул цояйги ккола Париза. Цоги нухалда такрар гьаризе рокьун руго дирго рекIелъ цIакъго росарал шагIиралъул рагIаби:
ГIемерлъани, гьалмагълъи 
              чIалгIунеб гIадат буго,
ГIажаиблъи, къойил духъ 
             урхъун халккун ятула.
Халалъараб харбица 
                лъийго тату кьоларо,
Божа, дуде къулидал, 
        дир кIал-мацI гьуинлъула…
Тадбиралде рачIун рукIана лицеялъул учительзабиги шагIир ва прозаик, "НасихIат" газеталъул хIалтIухъан ХIалимат Каримоваги.
Гьединго байрамалда рихьизаруна "ХIакъикъат" газеталда 100 сон баркарал видеороликал. Гьел рукIана республикаялъул телевидениялдасан рихьизарурал передачаби.  Учительзабазги бихьизабуна жидерго пагьму-гьунар. Гьез хIараб "ЦIале "ХIакъикъат" абураб сценкаялда бицунеб букIана жакъа къоялъги газеталъул бугеб кIваралъулги, гIун бачIунеб гIелалъе гьелъул бугеб пайдаялъулги, миллаталъул маданиятги адабиятги цIуниялъулъ гьелъ лъолеб бугеб бутIаялъулги. 
Бихьулеб букIана миллияб байрам гIуцIарал Дилималъул цIалдохъабазулги учительзабазулги газеталъулгун бугеб щулияб бухьенги, гьезие газета бокьулеб букIинги. Руго жеги нилъеда гьоркьор миллаталъул букIинеселъул ургъалида ругел гIадамал. Гьединаздасан цоял руго Салатавиялдаса магIарулал. Гьанибго дие бицен гьабизе бокьун буго Дилималъул клубалъул хIалтIухъан МухIамад  Дудуевасул. Гьев заочно цIалулев вуго Дагъистаналъул культураялъул училищеялда. МухIамадихъ буго кIудияб махщел, театралъул сценаялда ролал хIазе. Гьесул мацIалъги, пагьмуялъги, рекIелъ бикIун хутIилеб хIалалда  ракIалдасан кучIдул рикIкIине, текстал пасихIго цIализе бугеб пагьмуялъ ниж хIайран гьаруна. Кинха цинги абилеб гьадинал гIолохъаби ругеб миллаталъул букIинесеб гьечIилан. Щиб лъалеб, цо заманалдасан магIарулазда рагIизеги бегьула махщел тIокIав артист МухIамад  Дудуевасул цIар. Руго нилъер МахIмуд ГIабдулхаликъовги ХIусен Казиевги хисизе махщел бугел гIолилал. Амма кьезе ккола гьединазул махщалие роржен.  
ЛъугIана байрам. Дилималъул лицеялъул учительзабазул ва цIалдохъабазул коллективаз хасаб лъалкI тана миллияб газеталъул гвангъараб тарихалда. Байрамалъул гIахьалчагIаз нижее сайгъат гьабуна берцинаб, гьуинаб, гьекъон къеч хьвалареб гIагараб калам.
Зубейрат Ибрагьимова  

Автор: Зубейрат Ибрагьимова

Газета №: 17, от 5.05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!