Сделать домашней|Добавить в избранное
 
на правах рекламы

Юбилей

  • Версия для печати
Добавил(а): istina от 5-05-2017, 10:41
"Искусствоялъул рыцарь"
ХIайбулагьица ХIебда данде гьаруна 

Шамил райцентралъул культуруялъул кIалгIаялда данделъун рукIана росабазул вакилзаби, бегавулзаби, шагьараздаса рачIарал гьалбал. Гьел данделъиялъе гIиллаги букIана режиссер, актер, драматург, таржамачи, шагIир, публицист ХIайбула  ГIабдулгъапуровасул гIумруялъул 75 ва театралъе кьураб 50 сон тIубай кIодо гьаби. Зурма-къолол сасалда гъоркь сценаялде рачIана ХI. ГIабдулгъапуровги, районалъул бетIер М. ХIасановги, Авар театралъул артисталги, районалъул художествиял хIаракатчагIиги, искусствоялъул школалъул ва ХIебда ясли-ахалъул лъималги. Данделъи рагьулаго гьадин абуна районалъул бетIер Мух1амад ХIасановас:

"Жакъа нилъ данделъун руго театралияв хIаракатчи ХIайбула ГIабдулгъапуровасул юбилей кIодо гьабизе. Нилъ чIухIарал ва рохарал руго гьадинав чи нилъер районалдаса вукIиналдаса. Дица, районалъул тIолабго жамагIаталъул рахъалдасан баркула ХIайбулагьида юбилей ва гьарула халатал соназул талихIаб гIумру ва творчествоялъулъ чIахIиял  бергьенлъаби". 
Районалъул бетIерас юбилярасда ретIана буртина ва тIад лъуна хъурайсин-тIагъур. Кьуна райадминистрациялъул рахъалдасан баркиялъулаб ХIурматалъул грамотаги. Хадув кIалъазе вахъарав Тарумовка районалъул депутатазул собраниялъул председатель М. ГIабдуловас бицана ХIайбулал гIумруялъул, гьес нахъа тараб бечедаб ва захIматаб нухалъул хIакъалъулъ. "Школалда цIалулеб заманалдаго гьев вукIана художествияб коллективалъул гIахьалчи. Районлъул "ЦIияб канлъи" газеталда рахъулаан гьесул кучIдул, махщел букIана кьурдизеги. КъахIиб росдал школа лъугIидал, цо соналъ хIалтIана гьев Ракьуб росдал библиотекаялда. Херай эбелалъе бокьун букIинчIо вас цIализе витIизе. Амма гьесул ракIалъ ахIулеб букIана лъай босизе кколин. Гьединаб мурадгун ана Тблисиялде, Шота Руставелил цIаралда бугеб театралияб институталде. 1964 соналда гьебги лъугIизабун хIалтIизе вачIана дол соназда Буйнакскалда букIараб музыкалиябгун драмаялъул театралде актерлъун. МагIарул театралда цониги профессионалияв режиссер вукIинчIолъиялда бан, гьев цIализе витIула режиссеразул курсазде, Тбилисиялъул  институталде. МагIарул театралда хIалтIана мухъилав режиссерлъун ва 1971 соналда тIамуна бетIерав режиссерлъун. 1970-1972 соназда гьев цIалана СССРалъул халкъиял артистал А. А. Гончаровасда, Е. В. Симоновасда цеве. Гьединго цIалана Ленинградалъул пачалихъияб музыкалиябгун драматургиялъул халкъияв артист Р. С. Агамирзянил нухмалъиялда гъоркьги. Руго гьесие щварал гIемерал шапакъаталги. С. Рабадановасул "Батирай" пьесаялда рекъон Авартеатралда лъураб спектаклялъухъ гьесие кьуна КПССлъул обкомалъул бюроялъулги, ДАССРлъул Министрзабазул Советалъулги хIукмуялда рекъон Пачалихъияб премия ва лауреат абураб цIар. 1980 соналда кьуна ДАССРалъул халкъияв артист абураб цIарги", - ян.  
ХIайбулагьиде  гьарурал кучIдул цIалана  С. ГьитIинамухIамадовас,  М. Зиявудиновас.
ШагIир Умарагьи СалихIовалъ бицана данделъиялде ячIунаго гендерил туннель бахъинегIан букIанин цIоройги накIкIги. Туннель бахиндал тIубан роцIун батанин дунял. ХIайбулагьилги хасият гьединабго тIабигIаталда релълъараб бугин. 
Ракьуб, Ругъелда, КъахIиб росабазул школазул цIалдохъабаз рикIкIана ХIайбулагьиде гьарурал ва живго ХIайбулагьица хъварал кучIдул.
КIалъазе вахъарав "ХIакъикъат" газеталъул хIалтIухъан Пайзула Пайзулаевас, ХIайбулагьил творчествоялъе къиматги кьолаго, абуна гьев мустахIикъав вукIанин пачалихъалъул тIадегIанал шапакъатазе. Гъоркьиса театралъ 80 сонилаб юбилей кIодо гьабулагоги гьес хIаракат бахъанин артистазе шапакъатал щвезе, жиндиегойин абуни щибго щвечIин 40-гIан соналъ бетIерав режиссерлъун хIалтIулев вугониги. Гьес рехсана республикаялъул театралияб жамгIияталъул нухмалъулев Айгум Айгумовас гьесул хIакъалъулъ абурабги:
"ХIайбула ГIабдулгъапуров вуго республикаялъул театралияб искусствоялъул  бищун лъикIав рыцарь", - ян.
Дандеруссин берцин гьабуна районалъул искусствоялъул школалъул лъималазул церерахъиналъ, гьаадерил, къелдерил, гьидерил, лъандерил кьурдабаздаса гIуцIараб "Дагъбаш" ансамблялъул гIахьалчагIаз. КочIолаб саламгун церерахъана ДРялъул мустахIикъай артистка П. ХIажиева, П. ГIисаева, М. Къурбанова, С. ГIумарова, ХI. ХириясулмухIамадов, ГI. ГьитIихIмаев. 
ХI. ГIабдулгъапуровас лъурал, "АхIун бахъинчIеб кечI", Р. ХIамзатовасул "Абадияб кечI", "МагIарулай", ГI. Хачаловасул «Аманат», З. ГIалихановасул "МугIрузул ГIали", ХI. Рустамовасул "РекIее бокьани" пьесабаздаса цо-цо бутIаби рихьизарун артистал церерахъиндал, цо батIияб асар гьабуна. РекIелъе бортуледухъ гьенир ролал хIана Россиялъул мустахIикъав артист М. НурмухIамадовас, ДРялъул мустахIикъал артистал М. ГIабдулатIиповас, А. Къебедовалъ, ГI. ГIабдухаликъовас, ХI. ХIажиевас, ДРялъул халкъияй артистка З. ХIамзатовалъ, артистал Ш. ИсмагIиловас, М. МухIамадовас, М. МухIамадрасуловалъ, Р. Дибировалъ, ГI. ИмангIалиевалъ ва цогидазги.
ГьанжелъизегIан ХI. ГIабдулгъапуровас лъун буго 200-гIанасеб спектакль Дагъистаналъул батIи-батIиял театразда, 18-ялде гIагарун адабияталъулгун драмаялъул асаралгун тIахьал хъвана. Дагьаб цебегIан авар мацIалде руссинаруна Навоил "Лейла ва Меджид", Коста Хетагуровасул "Фатима", Иона Вакелил "Хважаин ва гьобол" поэмаби, хъвана гIемерал кучIдул. 
Абизе ккола ХIайбула  ГIабдулгъапуровасул цIар Дагъистаналъулги Россиялъулги рухIияб культураялъул тарихалда меседил хIарпаз хъван бугин. Гьев вуго ритIухълъи бокьулев, мекъаб-тIекъалда тIад рекъоларев, ракIгIатIидав инсан. Данделъаразе баркала кьолаго ахиралда ХI. ГIабдулгъапуровас абуна: "Щивав чи талихIав вуго жиндирго халкъалъе пайдаяв вугони. Дунги талихIав вуго нужеца кIодо гьавиялъ. ТIолабго районалъ дун кIодо гьави буго дир хадусеб гIумруялъе аванс гIадаб жо.
Баркала буго районалъул бетIер МухIамад ХIасановасеги гьаб тадбир тIобитIиялъе квербакъаралъухъ. Гьесда цадахъ хIалтIизе нилъер щивасе тавпикъги кьеги", - ян.  

Мун, Дагъистаналъул 
                     зодихъ канаб цIва,
ЦIвабзазул борхалъуде 
                       вахине кIварав.
Мун, магIарулазулъ къадруяв инсан, 
Къо анагIан махщел 
                   камиллъун ккарав.

Театр хириял магIарулазе
БащдабгIан гIасруялъ 
                гIетIги хIалги кьун,
Мун гьаб маданият бечед гьабизе
Бичасго витIарав вакил ватана.

Икъбалги талихIги гьарила дуе,
Гьудулзабазулъ мун гIемералъ тезе.
Сахлъиги рохелги рехсела дуе,
Халатккун тагийин ГIабдулгъапуров.

Сайпула ГьитIинамухIамадов 

Автор: Сайпула ГьитIинамухIамадов

Газета №: 17, от 5.05. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!