Сделать домашней|Добавить в избранное
 
на правах рекламы

Данделъи

  • Версия для печати
Добавил(а): istina от 28-04-2017, 11:50

Бихьинал бихьиналлъун ругебгIан мехалъ, руччабиги руччабилъун рукIунаМагIарулай кидаго йикIана хIеренайлъун ва хIалимайлъун, хIажалъи ккаралъуй лебалайлъун ва къуватайлъун. Къуватав бихьинчиясда нахъа кидаго чIужугIадан йикIунин абиги буго. Кавказалъул рагъдаги магIарул руччаби рукIана жидерго бихьиназда нахъа гурелги, гьезие кумекалъе хьибилалдаги.

Хъизамалда ва жамагIаталда гьоркьоб бихьиназ аслияб бакI кколеб букIаниги, исламалда ва мугIрузул законазда рекъон, чIужугIаданалъул кIудияб къимат-къадру гьабулаан. МагIарулай кидаго цIунарай йикIана чияр чиясул намус гьечIеб бердаса, хIатта гьелъул къадру гIодобегIан гьабулеб пикруялдасацин. 
Гьанжесеб заманалъул руччабазул рухIияб тарбиялъул тIалаб гьабизе хIаракат бахъула "Муслимат" абураб  Дагъистаналъул руччабазул регионалияб жамгIияб гIуцIиялъ. Жакъа чIужугIаданалда тIад бугеб борчалъул захIмалъи бичIчIула гьезда. Хъизан данде бачиялъулги лъималазе тарбия кьеялъулги захIматаб хIалтIи чIужугIаданалда тIад букIин хIисабалде босун, руччабазе кумек гьабизе кидаго хIадурал рукIуна жамгIияб гIуцIиялъул нухмалъулей Хадижат ШихгIалиеваги гьелъул гьалмагъзабиги. 
Дагьал церегIан къоязда "Муслимат"  гIуцIиялда тIобитIараб "Шамилил заманаялъул руччаби" абураб гIелмияб конференциялда бицана гьанжесел руччабаз мисал босизе мустахIикъал умумузул хIакъалъулъ. 
Данделъиялда цIалана гIелмиял докладал, Унсоколо, Болъихъ, Хунзахъ районаздаса рачIарал цIалдохъабазгун учительзабаз кучIдуздалъун ва театралиял церерахъиназдалъун бихьизабуна имам Шамилил заманалъул руччабазул бахIарчилъиги, къвакIиги, рукIа-рахъине лъайги, намусаб хьвада-чIвадиги, ретIа-къайги. 

Бихьиналго гIадин къеркьана 
Дагъистаналъул ва Чачаназул имам Шамил гьавуралдаса исана 26 июналда 220 сон тIубаялъул хIурматалда тIобитIараб данделъиялда имамасул ясазулги бицана тарихиял гIелмабазул доктор Доногъо ХIажимурадица. Эменгун цадахъ рагъда ва хадуб асирлъуда гьезда гIемер къо бихьана. Шамилие цIакъ рокьулаан жиндирго ясал. Цогидал руччабиго гIадин, имамасул ясалги гIахьаллъана Гъуниб букIараб къеркьеялъулъ. Амма Шамилил заманалда рукIарал руччаби къварилъабазе ва захIмалъабазе къуркьичIо. 
РАНалъул ДНЦялъул ИИАЭялъул аспирантка ХIасбат Тилакаевалъ бицана Шамилица чIужугIаданалъул гьабулеб букIараб къиматалъул хIакъалъулъ. БецIал гIадаталги чIужугIадан инжит-хIакъир гьаюлеб хьвада-чIвадиги тIагIинабулеб букIана имамас. Исламалда рекъон, чIужугIаданалде букIине кколеб бербалагьи гьес бихьизабуна гIадамазда. 

Намусалда тIанкI лъезегIан…
Гьанжесел руччабаз бихьиназул ретIел чIухIдае ва модаялъе ретIунеб батани, нилъер бахIарчиял умумуз бихьиназул гьеб ретIел ретIунеб букIана тушманасулгун гьабулеб рагъда. Чан чIужугIадан, хварав росасул парталги  ретIун, борчун ярагъгун ягъизе ккарай. Тушманасул кверде инчIого рукIине гIоло чан бахIарчияй чIужугIадан кьурса гъоркье кIанцIарай.  
Шамилил заманалда руччаби тушманасухъе кквезе чIеларин абун лъималгин цадахъ кьурса гъоркье кIанцIулел рукIун ратани, гьанже цо-цо руччаби "вокьулесул" машинаялде жанире кIанцIулел ругин ва гьезда кватIун гурони бичIчIулеб гьечIин жидерго гъалатIин бицана ДУМДалъул вакил АхIмад Пахрудиновас. 
Руго нилъеда гьоркьор кидаго тухумалъул къадруги цIунарал, кигIан гIакъуба бихьаниги хъизамалъул гъаситоги свине биччачIел руччаби. Унго-унгоги кинаб бакIха кколеб жакъасел руччабаз жамагIаталда жаниб? Имам Шамилица абулаан "Бихьинчи бихьинчилъун вугони, чIужугIаданги чIужугIаданлъун йикIунин". Амма жакъа чIужугIаданалъ бихьинчиясул хIалтIиги ихтияралги кодоре росизе лъугьин ва эмен, вац кIочон тун гьей тIадагьго хьвади лъида барабха бугеб? Законалда рекъон руччабазулги бихьиназулги ихтиярал ращад гьариялъищ цо-цо руччабаз намус рехун тун бугеб? 
Гьединал суалал гIемер рукIана гьеб данделъиялда. Гьелъул мурадги букIана эбел-инсуца ясазе тарбия, имам Шамилидаса мисалги босун, кьезе хIаракат бахъизе ккелин абураб. Рухун гуреб, къуват бихьизабун гуреб, шаргIалда рекъон, лъикIаб-квешабги малъун. 
ПатIимат СултIанмухIамадова


 

Автор: ПатIимат СултIанмухIамадова

Газета №: 16, от 28.04.2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!